Search form

LEFITIKO 2

Sebego

1Ge motho a tlišetša Morena sebego sa dijo, gona a e be sa bupi bjo bo tokilwego. A bo tšhele makhura, a bee diorelo godimo. 2A di iše go baperista, barwa ba Arone. E mongwe wa bona a tabole buping bjoo, a tsapare makhura le diorelo ka moka, mme a di tšhume, e be kgopotšo aletareng, mollo wa monko o bose wa Morena. 3Se se šalago sa sebego seo sa dijo ke sa Arone le sa barwa ba gagwe, ke se sekgethwakgethwa sa mello ya Morena.

4Ge o tliša sa dijo tše di tšwago sebešong, gona e be dinkgwa tša bupi bjo bo tokilwego, tše di sa omelwago, tše di tšhetšwego makhura, le dinkgwa tša dimatla tše di tloditšwego makhura.

5Ge sebego sa gago e le dijo tše di gadikilwego, gona e be tša bupi bjo bo tokilwego, tše di tšhetšwego makhura, tše sa omelwago. 6O di ngwathaganye maratha, o di tšhele makhura. Ke sebego sa dijo.

7Ge sebego sa gago e le se se apewago ka pitša, gona se dirwe ka bupi bjo bo tokilwego, le ka makhura. 8Sebego se se dirilwego ka tšeo, o se tlišetše Morena, se neelwe moperisita, gore a se iše aletareng. 9Moperisita gona moo sebegong a tabole sa kgopotšo, a se tšhume aletareng. Ke mollo wa monko o bose wa Morena. 10Se se šalago sa sebego seo ke sa Arone le sa barwa ba gagwe. Ke se sekgethwakgethwa sa mello ya Morena.

11Dibego ka moka tše le di tlišetšago Morena, di se ke tša omelwa; ka gobane tše di nago le komelo le ge e le nose, le se ke la di tšhumela Morena. 12Tšona le ka di tliša go Morena e le dibego tša dithakangwaga; fela, mo aletareng di se ke tša tla go ba tša monko wa go natefela Morena. 13Dibego tša gago ka moka o di noke letswai. O se ke wa ba wa hlokiša sebego sa gago letswai la kgwerano ya Modimo wa gago. Dibego tša gago tšohle o di tliše di na le letswai. 14Ge o tlišetša Morena sebego sa dithakangwaga, o tliše ditsetwa tše di gadikilwego; le mabele a a fogohlilwego a magollelo o a tliše e le sebego sa dithakangwaga tša gago. 15O di tšhele makhura, o bee diorelo godimo ga tšona. Ke sebego. 16Moperisita a tabole sa kgopotšo, a se tšhume; a ntšhe go mabele a a fogohlilwego, le go makhura, diorelo a tšee ka moka. Ke tša mollo wa Morena.

BIBELE

© 1951, 1986 Bible Society of South Africa. Used by permission. All rights reserved.

More Info | Version Index