Search form

LEFITIKO 21

Melao ya Baperisita

1Morena o boletše le Moshe a re: Botša baperisita barwa ba Arone o re: Mo go bona go se ke gwa ba le e a itšhilafatšago ka mohu wa gabo; 2ge e le wa gabo wa lapa la gabo, e ka ba mmagwe, goba tatagwe, e ka ba morwa wa gagwe goba morwedi wa gagwe, e ka ba ngwanabo, 3e ka ba kgaetšedi ya gagwe wa mothepana, e a lego lapeng la gabo a sešo a tšewa, ka yena a ka itšhilafatša. 4A se ke a itšhilafatša ge a tšea mosadi setšhabeng sa gabo, a se ke a ikgoboša.

5Ba se ke ba boola dihlogo tša bona, ba se ke ba kota mathoko a maledu, ba se ke ba phatša mebele ya bona dihlaka. 6A e be ba ba kgethetšwego Modimo wa bona; ba se ke ba goboša leina la Modimo wa bona; ka gobane ke bona ba go fihliša tša mello ya Morena, dijo tša Modimo; a e be ba bakgethwa. 7Ba se ke ba tšea mosadi wa seotswa, le ge e le e a gobogilego, le ge e le e a hladilwego ke monna; ba se ke ba tšea e mobjalo; ka gobane moperisita o kgethetšwe Modimo wa gagwe. 8Ka baka leo o mo dire e mokgethwa, ka gobane ke yena mofihliši wa dijo tša Modimo wa gago; le mo dire e mokgethwa, ka gobane nna Morena e a mo kgethilego ke e Mokgethwa. 9Gomme morwedi wa moperisita, ge a ka thoma go otswa, o goboša tatagwe; a a fišwe ka mollo.

10Ge e le yena Moperisita e mogolo mo go bana babo, e a tšhetšwego makhura hlogong, e a beilwego gore a apare dikobo tše kgethwa, yena a se ke a rola hlogong a se ke a gagola diaparo tša gagwe sellong. 11A se ke a tla setotong sa mohu; le ge e ka ba sa tatagwe goba mmagwe, a se be a itšhilafatša ka bona. 12A se ke a tšwa sekgethweng; a se ke a goboša sekgethwa sa Modimo wa gagwe, ka gobane o rwele mofapahlogo ka makhura ala a mola a tloletšwa Modimo wa gagwe. Ke nna Morena. 13A tšee kgarebe e be mosadi wa gagwe. 14A se ke a tšea mosadi wa mohlologadi, le ge e le e a hladilwego, le ge e le e a gobošitšwego, goba seotswa; a se ke a tšea e mobjalo, 15gore a se ke a goboša leloko la gabo mo setšhabeng sa gabo, ka gobane o kgethilwe ke nna Morena.

16Morena o boletše le Moshe a re: 17Bolela le Arone o re: Ge mo lelokong la geno, le mo go ditlogolo tša lena, go ka ba wa segole, a se ke a batamela go fihliša dijo tša Modimo wa gagwe. 18Wa segole a se ke a batamela, le wa sefofu, le wa sehlotša, le wa nko e kgerogilego, le e a nago le ditho tše di fetanago, 19le e a robegilego leoto le ge e le letsogo, 20goba wa lehutla, goba wa lekhoro, goba e a nago le ntaka e tshehla, goba e a tšwilego lekhwekhwe, goba wa kgologo. 21E a nago le bogole, le ge e le wa leloko la Arone moperisita, a se ke a batamela go fihliša tša mello ya Morena, ka gobane ke segole; ke gona a se ke a batamela go fihliša dijo tša Modimo wa gagwe. 22Go ja gona a je dijo tša Modimo wa gagwe, a je tše kgethwakgethwa le tše kgethwa. 23Fela, a se ke a tsena ka lešira, a se ke a tla aletareng, ka gobane o golofetše, a ka tlo goboša dilo tše kgethwa tša ka.

24Gomme Moshe a di anegela Arone le barwa ba gagwe le Baisiraele bohle.

BIBELE

© 1951, 1986 Bible Society of South Africa. Used by permission. All rights reserved.

More Info | Version Index