Search form

LEFITIKO 24

Melao ya dipone le dinkgwaponwa. Go otlwa mogoboši wa Sabatha. Kotlo ya mmolai

1Morena o boletše le Moshe a re: 2Botša Baisiraele o re: Ba go tlišetše makhura a mohlware a sekilego, a hlotlilwego, gore a tšhelwe mo diponeng, gore di gotetšwe ka mehla. 3Arone a di gotetše mono pele ga lešira la polokelo ya melao Ngwakong wa Kgwerano, a tuke go tloga mantšiboa go fihla ka moswana pele ga Morena ka mehla. 4Dipone tše a di gotetše di le mo ga sehlomapone sa letago pele ga Moreno ka mehla.

5O tšee bupi o apee dinkgwa tše lesome le metšo e mebedi; se sengwe le se sengwe se dirwe ka bupi bjo bo tlatšago leselwana. 6O di hlophe o dire dihlopha tše pedi mo sethaleng sa letago pele ga Morena; sehlopha setee se be le dinkgwa tše di selelago. 7Godimo ga dihlopha tšeo o bee diorelo tša makgonthe; e tlo ba seeletši mo dinkgweng tšeo; e tlo ba tša mello ya Morena. 8O di hlophe ka tšatši la Sabatha, di tle pele ga Morena di etšwa go Baisiraele, e be kwano ya ka mehla. 9Mme e be tša Arone le tša barwa ba gagwe; ba di je felo gokgethwa, ka gobane ke tše kgethwakgethwa tša bona tša mello ya Morena. E be molao wa ka mehla.

10Monna e mongwe eo mmagwe e bego e le Moisiraele, tatagwe e le Moegipita, o kile a tla mo go Baisiraele. Gomme monna eo a thoma go omana le Moisiraele e mongwe mo mešašeng. 11Mme ngwana yoo wa mosadi wa Moisiraele a goboša leina la Morena, a rogaka. Bjale ba mo tliša go Moshe. Leina la mmagwe e be e le Selomithe morwedi wa Dibiri wa leloko la Dani. 12Ba mo iša kgolegong, ba letela go laelwa ke Morena.

13Gomme Morena a botša Moshe a re: 14Morogaki eo mo ntšhetšeng ntle ga mešaša, gomme bohle ba ba mo kwilego, ba mmee diatla hlogong ya gagwe, mme phuthego ka moka e mo thume ka maswika. 15Gomme o botše Baisiraele o re: Mang le mang e a rogago Modimo wa gagwe, o oba molato. 16Gomme e a gobošago leina la Morena o tlo hwa lehu. Phuthego ka moka e mo thume ka maswika. Le ge e ka ba modiiledi, le ge e ka ba wa gae, ge a gobošitše leina la Morena, a hwe.

17E a bolayago motho a hwe lehu. 18E a bolayago kgomo a bušetše e nngwe; bophelo bo lefišwe ka bophelo.

19E a kutlago wa gabo, a dirwe ka mo a dirilego ka gona. 20Thobego e lefiwe ka thobego, leihlo ka leihlo, leino ka leino; e a kutlilego motho, a dirwe ka mo a dirilego ka gona. 21E a bolailego kgomo, a lefe; e a bolailego motho, a bolawe. 22Le be le kahlolo e tee. O šele a dirwe se se dirwago wa gae; ka gobane ke nna Morena Modimo wa lena.

23Gomme Moshe a di anegela Baisiraele. Morogaki eo ba mo ntšhetša ntle, ba mo thuma ka maswika, ba dira ka mo Morena a laetšego Moshe ka gona.

BIBELE

© 1951, 1986 Bible Society of South Africa. Used by permission. All rights reserved.

More Info | Version Index