Search form

LEFITIKO 6

Melao ya Sehlabelo le ya Sebego le ya Seloba

1Morena o boletše le Moshe a re: 2Laela Arone le barwa ba gagwe, o re: Molao wa sehlabelo šo: Sehlabelo se se swanetše go tuka ifo bošego ka moka aletareng go fihla ge go esa, mollo o fele o bešeletšwa gona moo. 3Moperisita a apare kobo ya gagwe ya leokodi, a tšware sethema sa leokodi, a ole molora wa mollo wa sehlabelo, a o tšhele hleng ga aletare. 4A tsebo apola diaparo tša gagwe, a apare tše dingwe, a ntšhetše molora ntle ga mešaša felo go sekilego. 5Mollo wa aletareng o tuke mo go yona, o se ke wa tima. E sa le bosasa moperisita a fele a beše dikgong tše dingwe go yona, a lokiše sehlabelo mo go yona, a tšhume makhura a dihlabelo mo go yona. 6Mollo o tuke mo aletareng ka mehla le mehla, o se ke wa tima.

7Molao wa sebego sa dijo šo: Barwa ba Arone ba se fiše aletareng pele ga Morena. 8E mongwe wa bona a ntšhe bupi bjo bo tokilwego bja sebego sa dijo, a fo tabola, le makhura a sona a a tsapare, a tšee diorelo ka moka tša sebego, a di tšhume mo aletareng, e be sa monko o bose le sa kgopotšo sa Morena. 9Se se šalago, Arone le barwa ba gagwe ba se tšee ba se je; se lewe se se na komelo, se lewe felo gokgethwa. Ba se jele Ngwakong wa Kgwerano. 10Se se ke sa apewa le komelo; ke ba neile gore e be kabelo ya bona ya tša mello ya ka; ke tše kgethwakgethwa bjalo ka seloba le selefa. 11Di lewe ke banna ka moka ba leloko la Arone. Ke taelo ya lena ya ka mehla melokong ya lena, taelo ya tša mello ya Morena. E a di swarago e be e mokgethwa.

12Morena o boletše le Moshe a re: 13Sebego sa Arone le sa barwa ba gagwe sa mohla go tlotšwago e mongwe wa bona sese: Ke ntlatlana ya bupi bjo bo tokilwego bja sebego sa ka mehla; karolo e nngwe e tlišwe bosasa, e nngwe e tlišwe ka mantšiboa. 14Di gadikwe ka makhura ka lebeana; o di tliše di gadikilwe; ke sebego se se kumagantšwego, ke sa monko o bose wa Morena. 15Tšona tše di dirwe ke morwa wa gagwe e a tlotšwago bakeng sa gagwe. E be molao wa ka mehla. Di tšhumelwe Morena ka moka ga tšona. 16Sebego sa moperisita se tšhumiwe ka moka ga sona; se se ke sa lewa.

17Morena o boletše le Moshe a re: 18Botša Arone le barwa ba gagwe o re: Molao o lebanego seloba šo: Se hlabiwe felo mo go hlabelwago dihlabelo, gona moo pele ga Morena; ke se sekgethwakgethwa. 19Moperisita yena eo e a tlišitšego seloba, a se je; a se jele felo gokgethwa, lapeng la Ngwako wa Kgwerano. 20Motho e a swarago nama ya sona, e be o mokgethwa; gomme e a kago gašetšwa ke madi a sona seaparong, a hlatswe fa go gašitšwego; mme a go hlatswe felo gokgethwa. 21Pitša ye e se apeilego e bolawe; ge se ka ba se apeilwe ka pitša ya tshipi, yona e falwe, e tsebo hlatswiwa ka meetse. 22Se lewe ke banna ka moka ba baperisita; ke sekgethwakgethwa. 23Ge e le seloba seo madi a sona a tsenego Ngwakong wa Kgwerano a dira poelanyo sekgethweng, seo se se ke sa lewa, se fišwe ka mollo.

BIBELE

© 1951, 1986 Bible Society of South Africa. Used by permission. All rights reserved.

More Info | Version Index