Search form

LEFITIKO 7

Melao ya Selefa le ya Seleboga

1Molao wo o lebanego selefa šo: Ke sekgethwakgethwa. 2Selefa se hlabiwe mo go hlabelwago sehlabelo; madi a sona a gašwe lehlakoreng la aletare thoko tšohle. 3Makhura a sona ka moka, a mosela, a lebipi, a tlišwe, 4le dipshio ka dipedi, le makhura a tšona, le a moseko, le sebetšana, -- a tlošwe mo go dipshio. 5Moperisita a a tšhume mo aletareng, e be tša mollo wa Morena. Ke sona selefa. 6Banna ka moka ba baperisita ba ka se ja; se jelwe felo gokgethwa; ke sekgethwakgethwa.

7Selefa se dirwa ka mokgwa wa seloba, di ya ka molao o tee; ke sa moperisita e a dirago poelanyo ka sona. 8Moperisita e a dirago sehlabelo sa motho e mongwe, o tšea letlalo la sehlabelo seo, ke la gagwe. 9Dibego ka moka tša dijo tše di apeilwego sebešong, le tšohle tše di apewago pitšeng goba tša gadikwa lebeaneng, ke tša moperisita e a di tlišago. 10Dibego ka moka tša dijo tše di tšhetšwego makhura, le tše di omilego, ka moka e be tša barwa ba Arone, ofe le ofe.

11Molao o lebanego dileboga tše di tlišetšwago Morena, šo: 12Ge sedimo se tlišwa e le sa theto, ba se tliše le dinkgwa tše di sa omelwago, tše di tšhetšwego makhura, le dinkgwa tša dimatla tše di tloditšwego makhura, le bupi bjo bo dubilwego ka makhura. 13A di tliše le dinkgwa tše di ometšwego, e be sebego sa gagwe sa go tlatša sedimo sa theto le sa seleboga. 14Mo go dibego tše ka moka a taboletabole tša go neela Morena; tšona ke tša moperisita eo e a gašitšego madi a sedimo sa seleboga. 15Ge e le nama ya sedimo sa theto, e lewe ka tšatši lona leo la sebego, go se ke gwa šala molatša wa yona.

16Ge e ka ba sedimo sa keno, le ge e le sa boithatelo, se lewe ka tšatši le a se tlišago ka lona; gomme molatša wa sona o ka lewa ka la ka moswana. 17Dinama tša sehlabelo tše di šalago, tšona di fišwa ka mollo ka letšatši la boraro. 18Ge nama ya sedimo e ka lewa ka letšatši la boraro, go ka se ke gwa kgahliša, gomme se motho a se tlišitšego se tlo nyatšega, e tlo ba makgapha; gomme e a se jago o oba molato. 19Nama ye e kgwathilwego ke tšhila e se ke ya lewa; e fišwe ka mollo. Nama ye e se nago taba, e ka lewa ke mang le mang e a se nago ditšhila.

20Ge motho wa tšhila a ka ja nama ya sedimo sa seleboga, e lego sa Morena, mola tšhila e le mo go yena, motho e mobjalo o tlo ripiwa setšhabeng sa gabo. 21Motho e a kgwathago tšhila, e ka ba ya motho, goba ya kgomo, goba se sengwe se se nago le tšhila, mme a tla a ja nama ya sedimo sa seleboga, e lego sa Morena, motho e mobjalo o tlo ripiwa setšhabang sa gabo.

22Morena o boletše le Moshe a re: 23Botša Baisiraele o re: Le se ke la ja makhura a kgomo le a pudi le a nku. 24Makhura a se se hwilego ka noši, le a se se bolailwego ke sebata, ona a ka dira modiro ofe le ofe; fela, le se ke la a ja. 25Gobane e a jago makhura a kgomo ya tše di išitšwego mellong ya Morena, o tlo ripiwa setšhabeng sa gabo. 26Mo maagong a lena go se ke gwa lewa madi, e ka ba a nonyana goba a seruiwa. 27E a jago madi afe le afe, o tlo ripiwa setšhabeng sa gabo.

28Morena o boletše le Moshe a re: 29Botša Baisiraele o re: E a tlišetšago Morena sedimo sa gagwe sa seleboga, a a tliše neo ya gagwe, e ntšhwe go sedimo sa gagwe sa seleboga. 30Tša mello ya Morena a di tliše ka diatla tša gagwe, a tliše makhura le leumo. Leumo e be seekaro pele ga Morena. 31Moperisita a tšhume makhura aletareng; leumo e be la Arone le la barwa ba gagwe. 32Leoto la le letona le le nee moperisita, e be kabelo ya gagwe ya sedimo sa seleboga. 33Yena yoo wa barwa ba Arone, e a fihlišitšego madi a sedimo sa seleboga, le makhura a sona, ke yena a newago leoto la le letona. 34Ka gobane nna ke tšea leumo la seekaro le leoto la kabelo go Baisiraele; mme nna ke di neile Arone moperisita le barwa ba gagwe, e be molao wa ka mehla. 35Ke yona kabelo ya Arone, le kabelo ya barwa ba gagwe mo mellong ya Morena, kabelo ye ba e fiwago mohla Morena a ba batametša gore e be baperisita ba gagwe. 36Ke tšona tše Morena a laetšego tšona ka tša mohla ba tlotšwa, a re ba newe tšona di etšwa go Baisiraele. Ke molao wa ka mehla go iša ditlogolong tša bona.

37Ke wona molao wa sehlabelo, le wa sebego, le wa seloba, le wa go bewa ga baperisita, le wa sedimo sa seleboga. 38Ke tšona tše Morena a di laetšego Moshe thabeng ya Sinai mohla a laetšego Baisiraele go tlišetša Morena dibego tša bona lešokeng la Sinai.

BIBELE

© 1951, 1986 Bible Society of South Africa. Used by permission. All rights reserved.

More Info | Version Index