Search form

NUMERI 1

Palo ya banna ba bahlabani

1Morena o boletše le Moshe lešokeng la Sinai a le Ngwakong wa Kgwerano, ka la pele la kgwedi ya bobedi, ka ngwaga wa bobedi wa ge ba tšwile Egipita, a re: 2Balang batho ba phuthego ya Baisiraele, le ye ka meloko ya bona le ka mašika a bona, banna ka moka ka o tee ka o tee; 3banna ka moka ba nywaga e masome a mabedi le go fetiša fao, ba ba kago tšwa dira mo go. Baisiraele, le ba bale ka mephato ya bona, wena le Arone. 4Mo molokong o mongwe le o mongwe le hlaole monna o tee wa go le thuša, e lego e mogolo motseng wa tatagwe. 5Maina a banna ba ba tlogo le thuša šea: Wa leloko la Rubeni ke Elitsuri morwa wa Sedeuri. 6Wa leloko la Simeone ke Selumiele morwa wa Tsurisadai, 7wa leloko la Juda ke Nahesone morwa wa Aminadaba. 8Wa leloko la Isashara ke Nethaniele morwa wa Tsuari. 9Wa leloko la Sebulone ke Eliaba morwa wa Helone. 10Mo go leloko la Josefa wa la Efuraimi ke Elisama morwa wa Amihudi, wa la Manase ke Gamaliele morwa wa Pedatsuri. 11Wa leloko la Benyamini ke Abidani morwa wa Gideoni. 12Wa leloko la Dani ke Ahiesere morwa wa Amisadai. 13Wa leloko la Asere ke Pagidi morwa wa Okorane. 14Wa leloko la Gada ke Eliasafa morwa wa Dehuele. 15Wa leloko la Nafutali ke Ahira morwa wa Enani. 16Ke bona ba ba kgethilwego ke phuthego, e lego bagolo ba leloko la botatabo, matona a dikgao tša Isiraele. 17Moshe le Arone ba biditše banna bao ba ba boletšwego ka maina; 18ba kgobokanya phuthego ka moka ka la pele la kgwedi ya bobedi; mme batho ba ngwalwa ka go ya ka meloko ya bona, le ka malapa a gabo, gwa balwa e a nago le nywaga e masome a mabedi le a fetišitšego yeo, ka o tee, ka o tee. 19Moshe o ba badile lešokeng la Sinai ka mo Morena a mo laetšego ka gona. 20Ba leloko la Rubeni, yena morwa wa pele wa Isiraele, ba lešika la bona, ka palo ya maina ka o tee ka o tee, ge go balwa banna ka moka ba ba feditšego nywaga e masome a mabedi le e fetago yeo, ka moka ba ba kago tšwa dira, 21go bona bao ba leloko la Rubeni go badilwe ba dikete tše masome a mane a metšo e selelago, le makgolo a mahlano. 22Ba leloko la Simeone, ba lešika la bona, ge go iwa ka meloko le ka malapa, ka palo ya maina, ka o tee ka o tee, ge go balwa banna ka moka ba ba feditšego nywaga e masome a mabedi le e fetago yeo, ka moka ba ba kago tšwa dira, 23go bona bao ba leloko la Simeone go badilwe ba dikete tše masome a mahlano a metšo e senyane le makgolo a mararo. 24Ba leloko la Gada, ba lešika la bona, ge go iwa ka meloko le ka malapa, ka palo ya maina, ge go balwa ba ba feditšego nywaga e masome a mabedi le e fetago yeo, ka moka ba ba kago tšwa dira, 25go bona bao ba leloko la Gada go badilwe ba dikete tše masome a mane a metšo e mehlano le makgolo a selelago a masome a mahlano. 26Ba leloko la Juda, ba lešika la bona, ge go iwa ka meloko le ka malapa, ka palo ya maina, ge go balwa ba ba feditšego nywaga e masome a mabedi le e fetago yeo, ka moka ba ba kago tšwa dira, 27go bona bao ba leloko la Juda go badilwe ba dikete tše masome a šupago a metšo e mene, le makgolo a a selelago. 28Ba leloko la Isashara, ba lešika la bona, ge go iwa ka meloko le ka malapa, ka palo ya maina, ge go balwa ba ba feditšego nywaga e masome a mabedi le go fetiša yeo, ka moka ba ba kago tšwa dira, 29go bona bao ba leloko la Isashara go badilwe ba dikete tše masome a mahlano a metšo e mene, le makgolo a mane. 30Ba leloko la Sebulone, ba lešika la bona, ge go iwa ka meloko le ka malapa, ka palo ya maina, ge go balwa ba ba feditšego nywaga e masome a mabedi le e fetago yeo, ka moka ba ba kago tšwa dira, 31go bona bao ba leloko la Sebulone go badilwe ba dikete tše masome a mahlano a metšo e šupago, le makgolo a mane. 32Ba leloko la Josefa, ba la Efuraimi, ba lešika la bona, ge go iwa ka meloko le ka malapa, ka palo ya maina, ge go balwa ba ba feditšego nywaga e masome a mabedi le go fetiša yeo, ka moka ba ba kago tšwa dira, 33go bona ba leloko la Efuraimi go badilwe ba dikete tše masome a mane, le makgolo a mahlano. 34Ba leloko la Manase, ba lešika la bona, ge go iwa ka meloko le ka malapa, ka palo ya maina, ge go balwa ba ba feditšego nywaga e masome a mabedi le e fetago yeo, ka moka ba ba kago tšwa dira, 35go bona bao ba leloko la Manase go badilwe ba dikete tše masome a mararo a metšo e mebedi, le makgolo a mabedi. 36Ba leloko la Benyamini, ba lešika la bona, ge go iwa ka meloko le ka malapa, ka palo ya maina a bona, ge go balwa ba ba feditšego nywaga e masome a mabedi le e fetago yeo, ka moka ba ba kago tšwa dira, 37go bona bao ba leloko la Benyamini go badilwe ba dikete tše masome a mararo a metšo e mahlano, le makgolo a mane. 38Ba leloko la Dani, ba lešika la bona, ge go iwa ka meloko le ka malapa, ka palo ya maina, ge go balwa ba ba feditšego nywaga e masome a mabedi le e fetago yeo, ka moka ba ba kago tšwa dira, 39go bona bao ba leloko la Dani go badilwe ba dikete tše masome a selelago a metšo e mebedi, le makgolo a šupago. 40Ba leloko la Asere, ba lešika la bona, ge go iwa ka meloko le ka malapa, ka palo ya maina, ge go balwa ba ba feditšego nywaga e masome a mabedi le e fetago yeo, ka moka ba ba kago tšwa dira, 41go bona bao ba leloko la Asere go badilwe ba dikete tše masome a mane a motšo o tee, le makgolo a mahlano. 42Ba leloko la Nafutali, ba lešika la bona, ge go iwa ka meloko le ka malapa, ka palo ya maina, ge go balwa ba ba feditšego nywaga e masome a mabedi le e fetago yeo, ka moka ba ba kago tšwa dira, 43go bona bao ba leloko la Nafutali go badilwe ba dikete tše masome a mahlano a metšo e meraro, le makgolo a mane. 44Ke bona ba ba badilwego, ba Moshe a ba badilwego a na le Arone le mantona ala a lesome le metšo e mebedi a Baisiraele, a a tšwilego ka o tee ka o tee mo molokong o mongwe le o mongwe. 45Baisiraele ka moka ba badilwe, gwa iwa ka meloko ya bona, gwa balwa ba ba feditšego nywaga e mansome a mabedi le e fetago yeo, ka moka ba ba kago tšwa dira mo go Baisiraele. 46Ka moka ba ba badilwego e be e le ba dikete tše makgolo a selelago a metšo e meraro, le makgolo a mahlano a nago le masome a mahlano.

47Balefi bona, ba leloko la gabo bona ga se ba balwa gotee le ba bangwe bao. 48Ka gobane Morena o be a laetše Moshe a re: 49Ge e le moloko wa Balefi o se ke wa o bala wa hlakanya palo ya bona le ya Baisiraele. 50Balefi bona o ba balele Ngwako wa Melao le dilo tša wona ka moka, le tšohle tše e lego tša wona; bona ba rwale Ngwako woo le dibjana tša wona ka moka, ba dire mediro ya wona, ba age mešaša ya bona ba dikologe nawo. 51Ge Ngwako o khuduga, Balefi ba o hlahlamolle. Ge Ngwako o emišwa, o hlongwe ke Balefi. O šele e a kago batamela a bolawe. 52Baisiraele bona ba age mešaša ya bona mo go lego mešaša ya ba gabo, le mo go lego sefoka sa gabo, le mphato wa gabo. 53Balefi bona ba age mešaša ba dikanetše Ngwako wa Melao, gore phuthego ya Baisiraele e se tlo welwa ke kgalefo. Balefi ke ba go šielana madišo a Ngwakong wa Melao. 54Gomme Baisiraele ba dirile tšohle ka mo Morena a laetšego Moshe ka gona.

BIBELE

© 1951, 1986 Bible Society of South Africa. Used by permission. All rights reserved.

More Info | Version Index