Search form

NUMERI 12

Miryama o tšwa lephera

1Miryama, a na le Arone, o be a fela a tsota Moshe ka baka la mosadi wa Mokuše yo a bego a mo tšere, a re, o tšere mosadi wa Mokuše. 2Le gona ba re: Afa Morena o bolela ka Moshe fela? A ga a bolele le ka rena? -- Gomme Morena a di kwa. 3Yena Moshe e be e le monna yo boleta ruri go fetiša batho ka moka ba lefase.

4Gomme Morena a bolela le Moshe le Arone le Miryama ka go akgofa a re: Tšwelang Ngwakong wa Kgwerano boraro bja lena. 5Morena a fologa a le lerung la thololo, a ema mojako wa Ngwako, a bitša Arone le Miryama, ba tšwela gona bobedi bja bona. 6Morena a re: Bjale kwang se nna ke se bolelago. Ge mo go lena go na le moporofeta, nna Morena ke itsebiša go yena ka pono, ke bolela le yena ka diloro. 7Ge e le Moshe mohlanka wa ka ga ke mo dire ka mokgwa woo; mo lapeng la ka ka moka e a botegago ke yena. 8Ke bolela le yena re lebantše difahlogo, re bonana, e se go bolela ka nyepo. Yena o bona sebopego sa Morena. Ke ka baka la eng le sa ka la boifa go mmolela gampe, yena Moshe mohlanka wa ka?

9Ba tukelwa ke kgalefo ya Morena; mme Morena a tloga. 10Ya re leru le sa tšo tloga mo Ngwakong ba tšhoga Miryama a tšwile lephera, e le e mošweu bjalo ka leswela. Arone ge a retologela go yena, a bona a tšwile lephera. 11Arone a bolela le Moshe a re: Joo, mong wa ka a nke o se re lefetše sebe se re wetšego go sona ka botlatla mme ra senya. 12A o se ke wa lesa ge a etša mohu e a belegwego a šetše a bodile ka thoko.

13Gomme Moshe a hlatlošetša lentšu go Morena, a re: Joo Modimo! A ko mo fodiše!

14Morena a fetola a re: Ge tatagwe a ka be a mo tshwetše ka mare sefahlogong, naa a ka be a sa dule matšatši a šupago a na le dihlong? Le bjale a a dule kua ntle ga mešaša a tswaleletšwe matšatši a šupago, a kgone go amogelwa. 15Miryama a dula matšatši a šupago a tswaleletšwe kua ntle ga mešaša. Setšhaba sa se ke sa khuduga, sa letela go amogelwa ga Miryama. 16Ya ba gona se khudugilego sa yo hloma mešaša lešokeng la Parana.

BIBELE

© 1951, 1986 Bible Society of South Africa. Used by permission. All rights reserved.

More Info | Version Index