Search form

NUMERI 17

Lehlotlo la Arone

1Morena o boletše le Moshe a re: 2Bolela le Baisiraele ba go nee mahlotlo a lesome la metšo e mebedi e tšwago go meloko ya bona. Matona a meloko ya bona ka o tee ka o tee ba go neele lehlotlo le tee le tee. E mongwe le e mongwe o mo ngwalele leina la gagwe lehlotlong la gagwe. 3Lehlotlong la leloko la Lefi o ngwale leina la Arone, ka gobane mahlotlo a e be a bagolo ba meloko. 4Mahlotlo a o a bee mo Ngwakong wa Kgwerano pele ga polokelo ya Molao, mo ke gahlanago le lena gona. 5Ke mo lehlotlo la monna yo ke mo kgethago le tlogo hloga; e tlo ba gore ke fediše dikomang tša Isiraele, tše ba le omanyago ka tšona; ke se hlwe ke di kwa.

6Moshe a bolela le Baisiraele; matona a bona a mo nea mahlotlo ka o tee ka o tee, ya ba mahlotlo a lesome la metšo e mebedi, lehlotlo la Arone la ba mo gare ga ona. 7Gomme a bea mahlotlo ao pele ga Morena mo Ngwakong wa Kgwerano.

8Ya re ka moswana ge Moshe a tsena Ngwakong wa Molao, a hwetša lehlotlo la Arone, la leloko la Lefi, le hlogile le palegile matšoba, le emule dienywa. 9Moshe a tšea mahlotlo ao ka moka a bego a le pele ga Morena, a a iša go Baisiraele; ka moka ba a bona. E mongwe le e mongwe a tšea lehlotlo la gagwe. 10Morena a bolela le Moshe a re: Lehlotlo la Arone le bušetše polokelong ya Molao, le bolokwe e be seeletši sa go eletša dinganga; gore o nkhutšiše dikomang tša bona, le gore ba se hwe. 11Moshe a dira tšona tšeo tše Morena a mo laetšego tšona.

12Baisiraele ba bolela le Moshe ba re: Di molaleng; re ba go hwa; re a fela; re felela ka moka ga rena. 13Mang le mang e a kago batamela Ntlo ya Morena o a hwa. A re ka se ke ra felela sa ruri?

BIBELE

© 1951, 1986 Bible Society of South Africa. Used by permission. All rights reserved.

More Info | Version Index