Search form

NUMERI 2

Go hloma mešaša

1Morena o boletše le Moshe le Arone a re: 2Baisiraele ge ba aga mešaša, e mongwe le e mongwe a age sefokeng sa gabo, mo go lego leswao la leloko la gabo. Ba hlome mešaša ba dikologe le Ngwako wa Kgwerano, ba lebane nawo.

3Ba ba tlogo hloma mešaša ka kgono ya bohlabela ke ba sefoka sa mešaša ya Juda, ka mephato ya bona. Nahasone morwa wa Aminadaba e tlo ba letona la ba Juda. 4Sera sa gagwe ke ba dikete tše masome a šupago a metšo e mene, le makgolo a selelago, a ba ba badilwego. 5Ba leloko la Isashara ba batagane le bona. Letona la ba moloko wa Isashara ke Nethaniele morwa wa Tsuari. 6Sera sa gagwe ke ba dikete tše masome a mahlano a metšo e mene, le makgolo a mane a ba ba badilwego. 7Ba batagane le ba leloko la Sebulone. Letona la Basebulone ke Eliaba morwa wa Helone. 8Sera sa gagwe ke ba dikete tše masome a mahlano a metšo e šupago, le makgolo a mane, a ba ba badilwego. 9Ka moka ba ba badilwego, ba e lego ba sera sa Juda e be e le ba dikete tše lekgolo le le nago le masome a seswai a metšo e selelago, le makgolo a mane. Ke bona ba go tsoga pele ge go tšwiwa ka makoko.

10Ba sefoka sa mešaša ya Rubeni ke ba kgono ya borwa; ba hlome mešaša ya bona ka mephato ya bona. Letona la bona bao ba Rubeni ke Elitsuri morwa wa Sedeuri. 11Sera sa gagwe ke ba dikete tše masome a mane a metšo e selelago, le makgolo a mahlano, a ba ba badilwego. 12Ba leloko la Simeone ba batagane nabo. Selumiele morwa wa Tsurisadai ke yena letona la Basimeone. 13Sera sa gagwe ke ba dikete tše masome a mahlano a metšo e senyane, le makgolo a mararo, a ba ba badilwego. 14Ba batagane le ba leloko la Gada. Letona la Bagada ke Eliasafa morwa wa Rehuele. 15Sera sa gagwe ke ba dikete tše masome a mane a metšo e mehlano, le makgolo a selelago a nago le masome a mahlano, a ba ba badilwego. 16Ka moka ba ba badilwego ba e lego ba sera sa Rubeni ke ba dikete tše lekgolo le le nago le masome a mahlano a motšo o tee, le makgolo a mane a masome a mahlano, ka mephato ya bona. Ke bona ba sera sa bobedi, ge ba tsoga ba lokologana.

17Ba latelwa ke Ngwako wa Kgwerano le makoko a Balefi; bona ba ba gare ga madira. Ba tsoga ba lokologana ka mešaša le ka difoka, bohle ba tseba felo ga bona.

18Ba sefoka sa Efuraimi ke ba kgono ya bodikela. Ba age mešaša ya bona ka mephato ya bona. Letona la Baefuraimi ke Elisama morwa wa Amihudi. 19Sera sa gagwe ke ba dikete tše masome a mane, le makgolo a mahlano, a ba ba badilwego. 20Ba leloko la Manase ba batagane nabo. Letona la Bamanase ke Gamaliele morwa wa Pedatsuri. 21Sera sa gagwe ke ba dikete tše masome a mararo a metšo mebedi, a ba ba badilwego. 22Ba batagane le ba leloko la Benyamini. Letona la Babenyamini ke Abidani morwa wa Gideoni. 23Sera sa gagwe ke ba dikete tše masome a mararo a metšo e mehlano, le makgolo a mane, a ba ba badilwego. 24Ka moka ba ba badilwego, e lego ba sera sa Efuraimi ke ba dikete tše lekgolo le le nago le metšo e seswai, le lekgolo letee, ka mephato ya bona. Ke bona ba sera sa boraro ge ba tsoga ba lokologana.

25Ba sefoka sa Dani ke ba kgono ya leboa; ba age mešaša ya bona ka mephato ya bona. Letona la leloko la Dani ke Ahiesere morwa wa Amisadai. 26Sera sa gagwe ke ba dikete tše masome a selelago a metšo e mebedi, le makgolo a šupago a ba ba badilwego. 27Ba batagane le ba leloko la Asere. Letona la ba leloko la Asere ke Pagiele morwa wa Okorane. 28Sera sa gagwe ke ba dikete tše masome a mane a motšo o tee, le makgolo a fetšago seatla a ba ba badilwego. 29Ba batagane le ba leloko la Nafutali. Letona la leloko la Nafutali ke Ahira morwa wa Enani. 30Sera sa gagwe ke ba dikete tše masome a mahlano a metšo e meraro, le makgolo a mane a ba ba badilwego. 31Ka moka ba ba badilwego, ba e lego ba sefoka sa Dani, ke dikete tše lekgolo le le nago le masome a mahlano a metšo e šupago, le makgolo a selelago. Ke bona ba khunyeletšo ge ba etšwa ka difoka.

32Ke bona Baisiraele ba ba badilwego ka meloko ya bona ba ba badilwego ka mešaša ya bona. E be e le ba dikete tše makgolo a selelago a nago le metšo e meraro, le makgolo a mahlano a nago le masome a mahlano. 33Balefi bona ga ba ka ba balwa gotee le Baisiraele, ka mo Morena a laetšego Moshe ka gona.

34Gomme Baisiraele ba dirile tšohle tše Morena a di laetšego ka Moshe. Ba hlomile mešaša ba eya ka difoka tša bona. Le go tšwa ba tšwile ka mokgwa woo; motho a tšwa le ba leloko la gabo, a na le ba gabo bona.

BIBELE

© 1951, 1986 Bible Society of South Africa. Used by permission. All rights reserved.

More Info | Version Index