Search form

NUMERI 6

Melao ya Moitlami. Tšhegofatšo ya Arone

1Morena o boletše le Moshe a re: 2Bolela le Baisiraele o re: Ge monna goba mosadi a itlama a re ke ena keno ya Moitlami gore a ikgafele Morena, 3a ikone sebela le bjalwa, a se ke a nwa sedila sa morara goba mogope wa morara; a se ke a ja dienywa tša morara le ge e le lengagale la wona. 4Lebakeng ka moka la boitlami bja gagwe a se ke a ja se se dirilwego ka seenywa sa morara, le ge e le matata a wona, le ge e le mahlogedi a wona.

5Mehla ka moka ya keno ya boitlami bja gagwe legare le se ke la fihla hlogong ya gagwe; a be mokgethiwa go be go fele matšatši ao a ikgethetšego Morena ka ona, mme a lese moriri wa hlogo ya gagwe o gole. 6Mehla ka moka ye a ikgethetšego Morena ka yona a se ke a batamela setoto sa mohu. 7A se ke a itšhilafatša ka tatagwe, le ge e le ka mmagwe, le ge e le ka ngwanabo, le ge e le ka kgaetšedi ya gagwe, ge ba ka hwa, ka gobane boitlami bja Modimo wa gagwe bo mo hlogong ya gagwe. 8Mehla ka moka ya boitlami bja gagwe o kgethetšwe Morena.

9Ge mo hleng ga gagwe go ka hwa motho ka sewelo ka bjako, a tšhoga hlogo ya boitlami bja gagwe e tšhilafetše, gona a kotwe hlogo ka tšatši la thakgafatšo ya gagwe, a kotwe ka tšatši la go šupa. 10Ka tšatši la seswai a tliše mekurwanyane e mebedi, le ge e le maebana a mabedi go moperisita mojakong wa Ngwako wa Kgwerano. 11Ka le lengwe la ona moperisita a dire selefa, ka le lengwe a dire sehlabelo, a mo direle poelanyo ka gobane a sentše ka setoto seo, e be go kgetha hlogo ya gagwe mohla woo. 12E be go ikgethela Morena matšatši a boitlami bja gagwe; a tliše kwanyana ya ngwaga o tee, e be selefa; matšatši ala a fetilego a se ke a balwa, ka gobane boitlami bja gagwe bo tšhilafetše.

13Molao wa moitlami šo: Mohla go phethegago boitlami bja gagwe moitlami a tlišwe mojako wa Ngwako wa Kgwerano. 14A tlišetše Morena sebego sa gagwe sa kwanyana e tona ya ngwaga o tee ye e se nago bosodi gore e be sehlabelo, le kwanyana ya tshadi ya ngwaga o tee ye e se nago bosodi gore e be seloba; le kgapana e se nago bosodi gore e be seleboga; 15le seroto sa magobe a sa omelwago, e lego dinkgwa tša bupi bjo bo dubilwego ka makhura, le dimatla tše di se nago komelo tše di tšhetšwego makhura, le sebego sa dijo le sa dino.

16Moperisita a di batametše go Morena, mme a mo direle seloba seo le sehlabelo seo. 17Ka kgapana yela a direle Morena seleboga, le ka sebego sela sa magobe a se nago komelo; moperisita a tsebo fihliša le sebego sela sa dijo le sa dino. 18Bjale moitlami a kotwe hlogo mojakong wa Ngwako wa Kgwerano, a tšee moriri wa boitlami bja gagwe a o lahlele mollong o bešago seleboga.

19Moperisita a kgone go tšea letsogo le le apeilwego la kgapana, a ntšhe le senkgwa se se sa omelwago mo serotong, le sematla se se sa omelwago, a di bee diatleng tša moitlami ge go šetše go kotilwe moriri wa boitlami bja gagwe; 20Gomme moperisita a di ekare pele ga Morena, ka ge e le tše di kgethetšwego moperisita le leumo la seakaro, le serope sa motšhelo. Ge a dirile bjalo gona moitlami a ka nwa morara.

21Ke wona molao wa moitlami e a baletšego Morena sebego sa gagwe ka baka la boitlama bja gagwe, ka ntle ga tše dingwe tše a kgonago go di ntšha tšona tše ke tše a swanetšego go di dira ka molao wa boitlami bja gagwe.

22Morena o boletše le Moshe a re: 23Botša Arone le barwa ba gagwe o re: Ge le šegofatša Baisiraele, le re: 24Morena a go šegofatše, a go boloke; 25Morena a go phadimišetše sefahlogo sa gagwe, a go gaugele; 26Morena a go emišetše sefahlogo sa gagwe, mme a go fe khutšo.

27Ba realo ba bee leina la ka godimo ga Baisiraele; mme e a tlogo ba šegofatša ke nna.

BIBELE

© 1951, 1986 Bible Society of South Africa. Used by permission. All rights reserved.

More Info | Version Index