Search form

NUMERI 8

Sehlomapone. Go bewa ga Balefi

1Morena o boletše le Moshe a re: 2Botša Arone o re: ge a hlomela dipone, ka moka tše di šupago di bonegele mono pele ga sehlomapone. 3Arone a dira ka mokgwa woo, a hlomela dipone tša leba mono pele ga sehlomapone bjalo ka ge Morena a laetše Moshe. 4Sehlomapone se be se direlwe ka gauta e rutšwego; thito ya sona, le matšoba a sona e be e le gauta e rutšwego. Gomme Moshe o be a dirile sehlomapone seo ka go swantšha se Morena a mmontšhitšego sona.

5Morena o boletše le Moshe a re: 6Hlaola Balefi mo go Baisiraele mme o ba thakgafatše. 7Ge o ba thakgafatša o dire ka mokgwa wo: Ba fokele ka meetse a thakgafatšo; bona ba ipoole mmele ka moka ka legare, ba hlatswe diaparo tša bona; e be gona go ithakgafatša. 8Ba tsebo tliša powana e nago le sebego sa yona sa dijo, sa bupi bjo bo tšhetšwego makhura; mme o tšee powana e nngwe ya seloba. 9O kgone go iša Balefi pele ga Ngwako wa Kgwerano, mme o kgobele phuthego ka moka ya Baisiraele. 10Balefi o ba batametše pele ga Morena, gomme Baisiraele ba bee diatla tša bona godimo ga Balefi. 11Arone a ba ekare pele ga Morena ba etše seekaro sa Baisiraele, gore e be ba go direla Morena. 12Bjale Balefi ba bee diatla tša bona godimo ga dihlogo tša dipowana tšeo, e nngwe ya tšona e dirwe seloba sa Morena, e nngwe e be sehlabelo sa go direla Balefi poelanyo.

13Gomme o emiše Balefi pele ga Arone le barwa ba gagwe, o ba ekare gore ba be seekaro sa Morena. 14Ka mokgwa o bjalo o hlaole Balefi mo go Baisiraele gore e be ba ka. 15E be gona Balefi ba tlogo kgona go tsena modirong wa Ngwakong wa Kgwerano; o ba thakgafatše gore ba be seekaro. 16Ka gobane ba neetšwa nna sa ruri ba etšwa go Baisiraele; ke ba tšere bakeng sa bohle bao bommabo ba itšibulago ka bona, bakeng sa maitšibulo a Baisiraele ka moka; ke ba ka. 17Ka gobane maitšibulo ka moka a Baisiraele ke a ka a batho le a dikgomo; ke ikgethetše ona mohla wola ke bolaya maitšibulo ka moka nageng ya Egipita. 18Gomme Balefi ka ba tšea bakeng sa maitšibulo ka moka a Baisiraele. 19Bjale Balefi ke ba neela Arone le barwa ba gagwe; ke ba hlaola go Baisiraele gore ba sware modiro bakeng sa Baisiraele mo Ngwakong wa Kgwerano, gore e be ba go direla Baisiraele poelanyo, gore Baisiraele ba se ke ba welwa ke kotlo ge ba batamela sekgethwa.

20Moshe le Arone le phuthego ka moka ya Baisiraele ba dirile Balefi ka mokgwa woo; ba ba direle ka mokgwa wo Morena a o laetšego Moshe ka baka la Balefi. 21Balefi ba ithakgafaditše, ba hlatswa diaparo tša bona, mme Arone a ba dira seekaro pele ga Morena, a ba direla poelanyo gore ba thakgafale. 22Ya ba gona Balefi ba tlilego ba swara mediro ya bona mo Ngwakong wa Kgwerano ba lebeletšwe ke Arone le barwa ba gagwe, ka mokgwa wo Morena a o laetšego Moshe ka baka la bona.

23Morena o boletše le Moshe a re: 24Taba še e lebanego Balefi. Mo sehlopheng sa bona sa go dira Ngwakong wa Kgwerano go tsena e a feditšego nywaga e masome a mabedi le metšo e mehlano le e fetago eo. 25Ge ba feditše nywaga e masome a mahlano ba tšwe modirong woo, ba se ke ba hlwa ba o dira. 26A e be ba go thuša bana babo go hlokomela madišo a bona; fela ga se ba modiro. Balefi o ba dire bjalo madišong a bona.

BIBELE

© 1951, 1986 Bible Society of South Africa. Used by permission. All rights reserved.

More Info | Version Index