Search form

NUMERI 9

Paseka le Paseka ya bobedi. Leru la go ba hlahla maetong

1Morena o boletše le Moshe lešokeng la Sinai ka ngwaga wa bobedi wa ge ba tšwile nageng ya Egipita, ka kgwedi ya pele a re: 2Baisiraele a ba dire Paseka ka lebaka la yona le le beilwego. 3Le e dire ka mantšiboa a tšatši la lesome la metšo e mene la kgwedi ye, ka lebaka le e beilwego ka lona. Le dire ka mokgwa wa yona le ka melao ya yona ka moka. 4Moshe a botša Baisiraele gore ba dire Paseka. 5Ba dira Paseka ka letšatši la lesome le metšo e mene la kgwedi ya pele ka mantšiboa, ba le lešokeng la Sinai. Ba direle tšohle ka mo Morena a laetšego Moshe ka gona.

6Bjale go be go na le banna ba ba tšhilafetšego ka setoto sa motho. Ka baka leo ba šitwa go dira Paseka. 7Banna bao ba botšiša Moshe ba re: Re tšhilafetše ka setoto sa mohu; re thibelwa ka baka lang go tliša sebego sa Morena ka lebaka la sona re na le Baisiraele.

8Moshe a fetola a re: Emang ke thome go kwa se Morena a tlogo ntaela sona ka baka la lena.

9Gomme Morena a botša Moshe a re: 10Botša Baisiraele o re: Ge e mongwe wa lena le wa bana ba lena a tšhilafetše ka setoto, goba a etile kgole, a ka direla Morena Paseka. 11Ba e dire ka letšatši la lesome la metšo e mene la kgwedi ya bobedi ka mantšiboa; ba e je le dinkgwa tše di sa omelwago le merogo e babago. 12Ba se ke ba šadiša molatša; ba se ke ba e roba lešapo; ba e dire ka go hlokomela melao ya Paseka. 13Fela, ge motho a se na ditšhila, goba a se leetong, gomme a lesa go dira Paseka, motho e mobjalo a ripiwe setšhabeng sa gabo, ka gobane a sa ka a tliša sebego sa Morena ka lebaka la sona; motho e mobjalo o obile molato.

14Ge motho a diiletše go lena mme a re ke direla Morena Paseka, gona a e dire ka mokgwa wa yona le ka molao wa yona. Le be le molao o tee, e ka ba modiiledi, e ka ba wa gae.

15Ka tšatši la go hlongwa ga Ntlokgethwa go tlile leru la a apeša wona Ngwako wa Molao; ka mantšiboa la na la etša mollo go fihla ka moswana. 16Gwa ba bjalo ka mehla; Ntlokgethwa ya khurumetšwa ke leru, mme bošego la etša mollo. 17Mohla leru leo le hlatloga mo Ntlongkgethwa, ke gona Baisiraele ba khudugilego; gomme mo leru le emago ntshe, ke mo Baisiraele ba hlomilego mešaša gona. 18Ya ba go khuduga ka go laiwa ke Morena; ya ba go hloma mešaša ka go laiwa ke Morena; gomme ba dula mešašeng mehla ka moka ge leru le aparetše Ntlokgethwa. 19Ge leru le fetša matšatši a mantši le le godimo ga Ntlokgethwa Baisiraele ba be ba sa khuduge, ba be ba lebelela taelo ya Morena. 20Mo gongwe leru le dutše godimo ga Ntlokgethwa matšatšinyana a se makae fela. Ba be ba fela ba dula ba laetšwe ke Morena, mme ba khuduga ba laetšwe ke Morena. 21Mo gongwe leru la dula ka mantšiboa, ka moswana la hlatloga, mme ba khuduga. Ba be ba khuduga ge leru le hlatloga, le ge e le mosegare, le ge e le bošego. 22Mo gongwe la dula matšatši a mabedi, goba kgwedi ya fela le dutše; ba se ke ba khuduga ka ge leru le sa dutše godimo ga Ntlokgethwa; ba khuduga ge le hlatloga. 23Ba be ba dula ka taelo ya Morena. Ba be ba khuduga ka taelo ya Morena. Ba realo ba hlokometše madišo a Morena, ka mo Morena a bego a ba laya ka Moshe.

BIBELE

© 1951, 1986 Bible Society of South Africa. Used by permission. All rights reserved.

More Info | Version Index