Search form

Sam 102

Sam Kratrtqki-esz'-nrade-li (102)

Apux Zsikapu Kc Tqmrbr Ani

Nzmnc-krnge Esz'-krnge

1Yawe, lalztqm mz nzkrka'-krbo bam.

X xlrm nzyrni-krnge mz nzokatr-krm.

2Mzli ka tqprtz-ngrm nzkxpungr bange,

Bzkq mnc-rlrume bange.

A' ayzlu-anim natqnge

Mz nzkqle-krnge nim.

3Nrkrdrtqnge nzpq-krde apule nyr.

X mzli trnaboiu ninge kc tqbzpex, tqapupex zsikapu kc tqmrbr ani.

4Nabznge talvzo apupele nabr kxglr,

X trmupewxu.

5Bztipenge nzyrningr mz nzetqkr drtqnge.

X nginitxpenge nrvr-nrbalq.

6Apux nc kx nzrtclzngr mepz, x sc tqtaligxpe,

Mz nzmnc-krnge esz'-krnge.

7Mnzx, a' trkrlzpewxu nzmwingr.

Apux ncblo kx trpnzngr kxnginide kx naoklatile nide.

Apux Brmrda

8Enqmi rngeng nzatrkati-zvzlr ninge mz nzycmne-krdr.

Nzpitrpzlr drtqnge mz nzrpibqti-krdr leplz.

9Yawe, nzvzkr drtwrnge dekc tqkrlcngr nelznge tqngi dakxnzng nange,

X drle mzke' dekc tqngi lue pqnge.

10Murde ngyati zlwz drtwrm ninge.

X apux brmrda kc tqrtctxpe-ngrn.

11Nzmnc-krnge apule zmyo ngr milzpq

Kc tqmrbr mz nzyrkrpxkr ngrlx.

A' Nzngini-krm King Tqyc Tqyc

12Kxmule-esz', a' nzngini-krm King tqyc tqyc.

Nrpr ngr ncblo amrlx sa nadcpx zvz mz drtwrdr nim.

13Murde sa nayc mz drtwrm Jerusalem.

X mzli ka mzli r nzokatrpe-krmle.

14Kxmule-esz' enqmi rm nzodatipelr mztea lc, x trkape,

A' sc tqsutibe drtwrgr x tqvztibe drtwrgr.

15Yawe, lr mrkzbleng amrlx sa na-amrluelr drtqm.

X king amrlx mz nrlc sa na-amatqlr nim.

16Murde mzli kc na-aelwapx-ngrn nzlulikr zmatq ngrm,

Mz nzwz-mou-krm Jerusalem,

17Drtwr ngrde kx ayzlu-ngrme nzkrka'-krgr,

Nigr kcng trpnzngr scgr da.

Krkcng Mztr Trnzmcka

18Nayroku da kcng tqaleting Yawe,

Murde krkcng mztr trnzmcka naglqpx-kzlr nide.

19Kxnamu nzyr-krgule sele: Yawe mnc Heven,

Mz ma nyzde kc tqtr tqmyalz, x sc tqobqom mz nrlc.

20Xlrle nzyrni-krgu mz presin,

X aopxbzle drtqgu, nigu kcng tzpipx kx nanibqng.

21-22X xlrpe-kzle nzngrkr leplz ngr mrkcng amrlx

Mzli kc tzyrlwr-lxblr-ngrdr Jerusalem,

Mz nzangio-krdr nide,

X nzglqpx-krdr drtqde.

Trtxpnzngr Nzrtekqtrngr Nim

23Yawe, ngi-batrpe' nzyangrnga-krnge,

Mz nzamrbctr-krme nzlu-krnge, mzli ka tqngi-oblabe-ngrne.

24A' rpibo bam kx, “Gct rnge, nzlu-krm tqyc tqyc.

Suti drtwrnge nakrlz-zpwxbo nzngi-lrtzlvz-krnge, x ninge kc tqbz-atex.

25Mzli kc mz noude wz-ngrn nrlc,

Bongavz x dalrdeng amrlx.

26Nrlc x bongavz sa nayrkrpxng kalr.

A' nim txpwz kx namnctx alo.

Mzli trnaboiu x sc tztrkapeng, tzapupelr lrpz kxblzlongr,

Kx nzrtctxngr x nztekqtr zvz mz kxmrna. +

27A' trtxpnzngr nzrtekqtrngr nim.

X trtxpnzngr nzbz-krm mz kzdq mzli. +

28Delc doa negrng sa namnc-zpwxng mz nrlc,

Murde sa na-aclve-angidrq nidr.”

Nzryrngrkxtr Kc Ate Rut x Sam

© 2008 Wycliffe Bible Translators, Inc.

More Info | Version Index