Search form

Sam 104

Sam Kratrtqki-esz'-nrade-pwx (104)

Nabz Ngr Nzrglqlzngr Kxrpalz

Kxrpalz

1-3Yawe Kxrpalz, naglqpxx nim mz nabznge.

Murde nim Gct kc tqluli, tqmyalz-esz'ngr.

Bongavz

Nzmyalz-krm x zmatq ngrm nzngrlelvzlr nim nzapulr lrpz kx kq-ngrn.

X zyzlr ngrm apule lrpzu scm.

Bongavz apule nqni kxetu kc tqprlxpxq.

X atuome elr nctrpou ngr ma nyzm.

Dcbz apule lika kx lvc-ngrn,

Mz nztwz-krde nim nenq kxwq.

4Zmatq ngrm batrpzle mz enjrl nemqng nzlvc-ani-krdr mz nzapu-krdr nenq.

X menrpa lcng tzwztrpzng bam nzapu-kzlr bzlrpc kc tqpctipx. +

Drtc'

5Wztioq nrlc mz nou rplz kxmqngi,

Murde trpnzngr nzycngrlr-krde.

6Mzli kc ayrnrngr, drtc' mrbrobz prla,

X newz amrlx akq-atwrnr-ngrde.

7Zbz mzli kc tqpnanati-ngrn prla sc tqpzneope,

Mz nzxlr-krde natqm kc tqapule bzlrmei.

8Prla pzneom mz nar-newzng, vzo krlzobzle nabzlwang,

Vzo mrkc tqyrlqbzme kx nalrlz-ngrmle.

9X yrlqbzme bz ngr me naesakingr prla,

Murde ma tqakq-atwrnr-mou-ngrde drtc'.

Lue, Dakxnzng, X Ma

10Wz-ngrn aulz, nzaulzmqng mz nabzlwa amrlx,

Lue lcng nzvzong x lue kxetung nzyrleng mz mzlir newz amrlx.

11Animol amrlx nzrmnqng lue lcng,

Mz nzbrlxkzkr drtwrdr.

12Utc nzrwzpe-ngrng ma nyzdr x nzngr-zvzng

Mz nounc mz nqlvi r lue lcng.

13Adcme tewa mz ma nyzm bongavz. Dcom mz newz amrlx.

X amrlzle drtc' murde kxnzlung kcng tqwz-ngrn namnc-zpwxng.

14Wz-ngrn nabr x dakxnzng nztuting mz drtc'

Nangi nan animol x leplz.

15Rkame waen kx na-aelalz-ngrm drtwrgr,

X tolo kx na-alqngr nrkrdrtqgr,

X dakxnzng kx naxplrngr nigr.

16Yawe, nounc nyzm kc tqpetiq

Nzdo-zlwz-krdr vzpxm mz nzadco-krme tewa badr.

17X utc kang kqlu nzmncpxng mz nounc lcng.

X nzwzpx-ngrdr ma nyzdr elr.

18Gout nzmncomqng mz newz,

X animol kxnztopwzng nzmnc-kapqneng me rplzngr.

Mzli Kcng Tqyrlqq

19Yawe, wz-ngrn temz nangi noabx ngr mzli,

X nepi noabx ngr zbq.

20Nim kx rwzngr nzlo ngr nrlckxbq,

Mzli r nzprpx-krm animol kzpeto me nzmnc-ngrdrng.

21Laion nzyrni-katong mz nzrtangr-krdr dakxnzng

Kx nakabzme badr.

22A' mzli kc tqprtz-ngrm nepi,

Sc tzyzlupeng ma nyzdr, tzmwipeng.

23X mz nrlc kxngrlx, leplz nzvzng mz nzale-krdr nzwz-krdr,

Nzwzng vz vz krlzbzle milzpq.

Animol

24Yawe, animol kcng tqwz-ngrn kqlu-esz'ngr.

Nrlc ka yrbulzm mz da lcng amrlx tqwz-ngrn mz nzyrplapx-krm.

25Dcpwe yrlwrlz-ngrm nc kxkqlu x rblx nzrlwx-krgrleng.

Kzdu nc lcng nzetuting x kzdu nztopwzneng.

26Lcsu kxnzkqlung nzvoneng prla.

X nc kxbe kc tqwz-ngrn drtqde besilr ayone kz elr.

Mevalu

27Animol lcng nzmnc-xglelr nim,

X rka-zvzbzme nadr dakxnzng.

28X mz nzrka-krbzme da kxmrlz badr

Amrlz-zvzq nidr.

29-30Mzli kc tqrka-ngrbzme zycmini sc tzlupeng,

Murde nim Kxrpalz.

X ngi-batr-zvzbzme nzlukr animol amrlx mz nrlc.

A' mzli kc tqpxtxpx-ngrn nidr, nelzdr vzdzm.

Murde mz nzrkatxpx-krbzme zycmini lc, nzbzng.

X nzyzlu-moung mz drtc' kc tqwz-ngrn nidr.

Zluli X Zmatq

31Nzmyalzkr Yawe navz zvz,

X nzabrtzlvz-krde nikeng wz-ngrdeng amrlx.

32Mz nzobqo-krmle, drtc' ycngrlrlzm apule nengq kx vzm,

X ngi-batrpzle nzsikapukr trmami mz nzmaletr-krde newzng.

33Na-angrlvz-zvzx Yawe Gct rnge,

Navz nakrlzbzle nzesakikr nzycmini-krnge.

34Mrlzvxitx Yawe nzabrtzlvz-krde natqngeng mz nzngr-krbo bade,

Murde nide kc tqrngi-batr-zvzm nzabrtz-krnge.

35Mrlzvxitx nznibqti-krde kxdrka'-ngrng

Murde nzatrkatilr nrlc kc tqwz-ngrde mz nzpxtxpx-krdr nzglqlz-krdr nide.

Yawe naglqpxx nim mz nabznge.

Eu. Naglqlz-zvzkr nim.

Nzryrngrkxtr Kc Ate Rut x Sam

© 2008 Wycliffe Bible Translators, Inc.

More Info | Version Index