Search form

Sam 105

Sam Kratrtqki-esz'-nrade-nzlvqn (105)

Gct Angidati-zvzle Nzesz'tikr Drtwrdr Badr Leplz Nedeng, Kxmule-esz' Nzvz-rbrng

Nqmq Kr Gct

1Naglqpxku Yawe,

Na-awibzku mz Yawe mz nzmyalz-esz'ngr-krde.

X napipxbzku mz lr mrkzbleng da kcng tqaletileng.

2Na-angrlvzku mz nzangio-krgu nide.

X napipxku da kxnzkctipxng kcng tqwz-ngrdeng.

3Nabilvzku drtqde kxtr.

X nigu kcng tzamrluelr nide drtwrgu naelalzm.

4Namnc-xgleku Yawe x nzxplr-krde.

X nasuti drtwrgu nzxngi-krbzku nzulrde.

5-6Vzpxmgu mz nqvi lr Ebraam, kxnzawz ne Yawe,

X nqvi lr Jekop kc tqmcpxle.

Delc nadcpx zvz mz drtwrgu rkx kcng tqmatq tqaleleng,

X nztubqkr nqmq krde.

Nzesz'tikr Drtwrgu Badr Gct

7Yawe nide Gct rgu.

X kapxbzle natqdeng mz leplz amrlx mz nrlc.

8Nzesz'tikr Drtwrgu badr tqyc tqyc.

X trmrbrtru mz drtwrde nzesalz-krde.

9Nzesz'tikr Drtwr lc tzyrlq-kailr mz Ebraam.

X pipx-kzpzle nzesalz-krde lc mz Aesak.

10Amqngi-mopwzle mz Jekop x doa nedeng,

Murde navz alo.

11Rpibzle badr kx, “Sa nakabo bamu drtc' kc Kenan

Murde nangi drtc' nyzmu.”

Leplz Neng Gct

12A' nqvi lr ncblo lc tqngi nyz Gct nzpipzbeng mzli lcde,

Mz nzngini-krdr lr mrkzbleng kx trpnzngr me nzmqngio-ngrdr.

13X nzayo-txpwzng

Mz nzrlasz-krdr kc mrkzble x nzvzki-mou-krdr mrkzble.

14A' Yawe tr-rlrpx-ngrdeu nzaovxiongr nidr,

Murde aclvele nidr mz nzlc-amq-krbzle mz king kxnzkqlung,

15Mz nzrpi-krbzle badr kx, “Bzkq atrkatibzmu leplz nengeng kx mcpxx.

X bzkq aetqbzmu drtq menrpa nenge lcng.”

Drtwr Kx Yrlq Gct

16Mz nibr kzdung mzli, Yawe atwzlr-ngrmle dzbi mz drtc' nyz leplz nedeng,

X katxpx-kzle dakxnzng nadr amrlx.

17A' atwzlr-kai-ngrde kzdq ncblo Ijipt kx nangibz lrpzki badr.

Krlcde Josip, mrlx Jekop, kc tzamwalr murde nanginide kxnzawz-nrbalq.

18X mz nibrde sc tqmncpxpem mz presin,

X nzatolva-ngrdr nide mz nqvi.

19Vz vz x natqde sc tqyokaetipxpele nzrmwiblekr king r Ijipt,

Mz nzpipx-krde natq angidr kc tqkabz Yawe bade.

20Zbz king r Ijipt kc tqaclvele mrkcng kqlu,

Aopxbzle drtq Josip mz nzkapx-krmlele mz presin.

21X sc tqyrlqpele Josip nzngini-krde kxetu elr,

Murde na-aclvele dalr Ijipt amrlx.

22Zbz Josip rngisc zmatq mz nzrkapx-krbzle natq mz kxnzetung amrlx,

X mz nzalvztr-krde ncblo kcng tzyrplapxng.

23Mz nibrde Jekop badr doa nedeng sc tzvzpeng Ijipt,

Mz nzmnc-krdr elr, murde dzbi lc tqtaope mz drtc' nyzdr.

Nzayrplapxkr Gct Lr Ijipt

24Nqvi lr Jekop nzmncting Ijipt trtqki r yiz, x Yawe batrpzle nzkqlunepx-krdr.

X nzxplr-krdr myaszpxle lr Ijipt, enqmi rdrng.

25Delc lr Ijipt tzngyatingr drtwrdr leplz nedeng kcng tzangiolr nide.

X sc tzatrkatipelr nidr mz nzawz-nrbalq-krdrleng x sc tznibqtipe-kzpzlr doa ncblo nedrng mzli kc mztr tzmc-ngrdr.

26Delc Yawe tqatwzlr-ngrbzle Mosis kxnzawz nede,

Nidr mz Eron kc tqmcpxle, murde naokatrlr leplz nedeng Ijipt.

27X sc tzale-ngrdr rkx ngr Gct kxmatq kxkqlu elr,

Mz nzngi-batr-krbzle nzrwzngr da kxnzkctipxng mz mqdr x mz natqdr.

28Awx-nzlo-ngrbz Yawe mrnyzdr,

A' natqde trnzvz-nqblqpwzlru lr Ijipt.

29Ngi-batrpzle nzlrtipxkr lue nyzdrng mepyr

X nzbztingr nc nedrng.

30Drtc' atwrnrngr yrbuti mz frck,

X nznulvzpx-kzplr ma nyz king.

31Yawe kapxle natqde

X mc badr mclrla nzyrkrpx-pnz-ngrng nrlarnrlc nyzdr.

32Atwzlr-ngrmle muli-aes apule tewa kxdc,

X bzlrpc tqpctipx zlwz mrnyzdr.

33Odatile nqvi lr dakxnzng mz nrlanc nyzdr

X plameitio-kzle nounc nyzdr amrlx.

34Yawe kapxle natqde

X blzmr kionabr kx rblx nzrlwxngr nzlvcmqng.

35Nzngqtilr dakxnzng kxnzpeting

Mz nrlanc nyzdr amrlx.

36Zbz Yawe sc tqnibqtipe-kzle doa ncblo kx ayrnrngr

Mz ma nyz lr Ijipt amrlx.

Nzokatrkr Gct Lr Israel

37Mz nibrde sc tqmailzpele lr Israel mz nzrlasz-krdr Ijipt, nzrtwzng silvz x gol.

X trpnzngr nidr kxnzyagoxng, a' nzxplrng.

38X lr Ijipt nzabrtzlvzlr nzrlasz-krdr nidr.

Murde nzmwxlrtilr da kx naprtzbz badr mz nzlolvz-mou-krdrleng.

39Yawe yrlqbzle dcbz ngrlx murde navz-nqblq leplz nedeng,

X mz nrlckxbq yrlq-kzpzle nyr nayzlrbz badr.

40Nzrlxbzng bade dakxnzng x atwzlro-ngrmle kio kxkqlu

X dakxnzng kxkqlu kx nakrlcngr nelzdr.

41Ayrlepxmle lue mz kzdq rplz kxetu,

X lue lc yrle lzke apule lue kxvo.

Me Pnz Drtwr Gct

42Delc Yawe sc tqyc-zvzngr mz drtwrde natqde kxtr

Kc tqpibzle mz kxnzawz nede, Ebraam.

43Zbz sc tqmailzpxpele leplz nedeng kcng tqmcpxle,

X nzngr-zvzng x nzmalq-zvz-kzng mz nzabrtz-krdr.

44Kabzle drtc' ngr lr mrkzbleng mz leplz nedeng,

X nztwz-kzlr nrlanc nyzdrng x da amrlx kx nzvzpxmqng mz nzwz-krdrng.

45Murde leplz nedeng navz-nqblqlr loukxtr scdeng

X nayrlq-angidrlr natqdeng.

Naglqpxku Yawe.

Nzryrngrkxtr Kc Ate Rut x Sam

© 2008 Wycliffe Bible Translators, Inc.

More Info | Version Index