Search form

Sam 119

Sam Kratrtqki-esz'-nzpnu-esz'-nrade-rpwxmz (119)

Yawe, Natqm Mrlzvxi

Kzdq Nabz Ngr A, B, C

Alvztr-zvz-ngrn Ninge mz Natqm

1Awi Yawe! Namrlzbz mz leplz kx trnzvz-rbrung,

A' nzvz-nqblqlr Loukxtr scm,

2X namrlz-kzpz mz krkcng tzlxngitilr natqm,

X nzrtangrtilr nim mz nabzdr atwrnrngr,

3X krkcng tzalelr da kxtubq,

X nzo-zlilr lrpzki rm.

4Alvztr-zvzq nigr

Murde nalolvz-amqngikr nqmq krm.

5Navz zvz

Nzrtangrti-krnge me pnz drtwrm.

6Murde ma tqmyangr drtqnge

Mz nzaoti-zvzkr drtwrnge Nzryrngrkxtr.

7Alqngitipeq ninge,

Glqlz-ngrne nim nztubqkr nabznge.

8Alex da kx pitimeng bange.

A' bzkq amnctxn ninge esz'-krnge.

Bilvz-zlwzx Nzti Rm

9-10Bzkq rlr-ngrme nzrlasz-krnge nim,

Murde sa tqabzx nzwztr-krbo bam mz drtwr kxpq.

Nzlolvz-amqngikr obla natqm okatrle nide

Mz nztu-amqngi-krde mz nzmncngr kxtubq.

11Abrtz-ngrne Nzryrngrkxtr

Murde natubq-zvzbo mz nzobq-krm.

12Yawe, glqlzx nim.

X suti drtwrnge nzkrlz-zpwx-krnge nqmq krm.

13Natqnge etu zvz

Mz nzpipx-krnge Loukxtr scm.

14Nzabrtzngr kx vzpxm mz nzvz-nqblq-krnge nim

Myaszpxle nzrngisc-krnge trau kxkqlu.

15Nadcpx mz drtwrnge me pnz drtwrm.

Mz nzaoti-zvzkr drtwrnge nzalvztr-krmqng.

16Bilvz-zlwzx nzti rm,

X trmrbrtru mz drtwrnge natqm.

Clve Ninge Mz Loukxtr Scm

17Clve ninge murde ninge kxnzawz nem,

X nayrlq-zvzx natqm mz nzmnc-krnge.

18Okatrp ninge mz nzrmcti-krnge

Da kxmrlzting kx nzprpxmqng mz Loukxtr scm.

19Ninge kxvztimle nrlc.

Bzkq yrlq-kapqme bange me pnz drtwrm.

20Pq zvz mz drtwrnge

Nzkrlz-krnge nqmq krm.

21Ayrplapxq kxnzglqpx-lzbqng

Kcng tzrnzlvzolr natqm.

22Bzkq rlrpx-ngrn nzobqszo-krdr x nzyrpalelvz-krdr ninge,

Murde vz-nqblqx natqm.

23X kxmule-esz' kxnzetung nzpikitilr ninge,

A' sa tqotr-zvzngr drtwrnge nzalvztr-krmqng.

24Clve ninge mz Nzryrngrkxtr

Murde abrtz-ngrne nzmailz-krdr ninge.

Da Kx Mailzle Ninge Nangi Lrpzki Rm

25Drtqnge mewetx-zlwzpe x ycpe pipz nzbz-krnge.

Ka-mop nzlungr bange, mz nzvz-nqblq-krde natqm.

26Mzli kc tqplzpx-ngrbo bam alwx rngeng, ayzlu-ngrme natqnge,

X alvztrpe' bange nqmq krm.

27Okatrp ninge mz nzrkrlz-krnge Loukxtr scm,

Murde na-aoti zvz drtwrnge nzwz-krmqng kcng tqmyalz.

28Nzrtxlvzlzkr nzvzkr drtwrnge etutx-zlwzpe.

Amqtrp drtwrnge da kc tqwai nzesalz-krmle.

29Okatrp ninge mz nzo-zli-zvz-krnge nzti kxtubq,

X alvztrp bange Nzryrngrkxtr mz zmrlz ngrm.

30Pnzpe drtwrnge kx navz-nqblq-zvzpex nim,

Mz nzale-zvz-krnge me pnz drtwrm.

31Yawe, bzkq rlrpx-ngrn nzamyati-ngrm drtqnge,

Murde lolvz-amqngix nzalvztr-krmqng.

32Da kx mailzle ninge nangi lrpzki rm

Mz nzokatr-krm ninge.

Esalz-ngrn X Angidatiq Natqm

33Eu Yawe, alvztrp bange me pnz drtwrm,

Murde nayrlq-zvzx.

34X okatrp ninge mz nzvz-nqblq-krnge Loukxtr scm,

Murde naesz'-ngrde nabznge.

35Abrtz-ngrne lrpzki rm

Mrkc tqmailz-zvz-ngrn ninge.

36Okatrp ninge mz nzpqtikr drtwrnge natqm,

Murde myaszpxle nzrngisc-krnge da kxkqlu.

37X bzkq rlr-ngrme nzsutikr drtwrnge da kxmane,

A' axplr-mop ninge mz nzo-zli-krnge nzti rm.

38Angidatim bange nzesalz-krmqng,

Da kc tqwaibzme mz leplz kcng tzamrluelr nim.

39Okatrp ninge murde mwxlrtix enqmi rngeng nzxtrnga-krdr ninge.

A' mrlz-esz'ngrm bange nzpnana-krmqng.

40Esalz-ngrm bange kx na-alvztrq ninge,

Murde nztubq-krm naka-mople bange nzxplrngr.

Gct, Brti Drtwrnge Drtwr Kcng Tqyrlqqng

41Gct, arlapx ninge mz nivz lrm,

Mz nzangidati-krm nzesalz-krmqng.

42Murde na-ayzlu-ngrbo natq krkcng tzyrpalelvzlr ninge,

Mz nzbrtikr drtwrnge natqm.

43Okatrp ninge mz nzrpi-zvz-krnge da angidr,

Murde brti kz drtwrnge drtwr kcng tqyrlqqng.

44X nzmqngitr-zlwzkr drtwrnge mz Loukxtr scm

Tqvzpe, tqvzpe.

45X drtqnge sa naopx mz nzvzne-krngeng

Murde o-zlix lrpzki rm.

46X trtxpnzngr nzmyamikr naonge

Nzpipx-krbo natqm mz kxnzetung.

47-48Gct, abrtz-ngrne nzyrlq-angidr-krnge

Nqmq krm x me pnz drtwrm.

Murde nzmrlzmqng bange x nzmatqng mz drtwrnge.

X na-aoti zvz drtwrnge nzalvztr-krmqng.

Ipqpeq Ninge Mz Nzdcpxkr Mz Drtwrm Nzesalz-krm

49Ipqpeq ninge mz nzdcpxkr mz drtwrm nzesalz-krm.

Murde obqtipxx zmrlz ngrm.

50X amqtrple drtwrnge mz mzlir nzkxpungr.

Murde rmcti-ngrne nzlungr mz nzrlwx-krnge Loukxtr scm.

51Kxmule-esz' kxnzglqpx-lzbqng nzxtrnga-ngrdr ninge,

A' tresablqtiwxu Nzryrngrkxtr.

52Yawe, mz nzaotr-zvzkr drtwrnge Lou scm kc bqnc,

Okatrple ninge.

53Drtwrnge apulzmle nyr,

Mz nzpxtxpxkr kxdrka'-ngrng nqmq krm.

54Mzli ka tqlube-ngrne mz nrlc,

Natqm nangi zvz nabz nenge.

55Yawe, mwible-zvzx nim mz nrlckxbq,

X suti drtwrnge nzyrlq-angidr-krnge me pnz drtwrm.

56Iklr ninge murde nabznge napq,

X na-ale-zvzx nzalvztr-krmqng.

Jzs Ninge, Murde Suti Txpwz Drtwrnge Nim

57Jzs ninge, murde suti txpwz drtwrnge nim,

X mrlzm bange nzlolvz-amqngi-krnge natqm.

58Mz nabznge atwrnrngr, rlxtibo bam

Nzmrlzti-krm ninge da kc tqwai nzesalz-krmle.

59Mzli kc tqdwa-rbrti-ngrne lrpzki rnge mz nzvz-nqblq-krnge nim,

Yzlu-mopwc' nzo-zli-krnge nzti rm.

60X trasatiwxu nzyrlq-krnge Loukxtr scm.

A' rnekititxpwo nzale-krnge me pnz drtwrm.

61X kxmule-esz' prtzx mz trtxki sc kxdrka'-ngrng,

A' trmrbrtru mz drtwrnge Nzryrngrkxtr.

62Tulzmc mz nzawi-krbo bam mzli kc mz aurnrlc,

Murde drtwr kcng tqyrlqq tubq-esz'ngr.

63Ninge kzte krkcng tzamrluelr nim,

Tzalelr nzalvztr-krmqng.

64Yawe, mz nzaodu-krm kc tqyc-ngalelvzle nrlc tulvzo,

Alvztrp bange nqmq krm.

Kxakrlz, Alvztrp Bange Lrpzki Rm

65Kxetu, aleme bange da kxmrlz,

Mz nzvz-nqblq-krde nzesalz-krm.

66Kxakrlz, alvztrp bange nzrkrlzngr x drtwr kxmrlz,

Mz nzlxngiti-krnge Nzryrngrkxtr.

67Mzli kc ena vz-rbrpex, x ayrplapxq ninge,

A' mzli ka ale-zvzpex da kxtubq mz nzobq-krm.

68Mz nzmrlz-esz'ngr-krm x nqmq krm kx mrlzvxi

Alvztrp bange nqmq krm.

69-70Drtwrnge elalzm mz Loukxtr scm.

A' kxnzglqpx-lzbqng trpnzngr nzrkrlz-krdr.

Kxmule-esz' nzpokiatitrlr ninge,

A' lolvz-amqngi-zvzx nzalvztr-krm mz drtwr kxbr.

71Mrlzm bange nzayrplapx-krm ninge,

Murde nakrlz-ngrne nzvz-rbr-krnge.

72Kxakrlz, natqm nzmrlz-krmle bange

Myaszpxle blzmr trau mz nrlc.

Loukxtr Scm Mrlzm Bange

73Lalztqm mz nzkrka'-krnge murde nakrlzx me pnz drtwrm,

Murde wz-ngrn ninge x aclve-angidrq ninge.

74Krkcng tzamrluelr nim na-abrtzlvzlr ninge

Mz nzlxngiti-krnge natqm.

75Yawe, krlzx kx takitrde nzayrplapx-krm ninge

Murde vz zvz nzokatr-krm leplz nemqng. +

76Amqtrp drtwrnge mz nzaodu-zvz-krm ninge,

Da kc tqwai nzesalz-krme bange.

77Mz nzabrtzlvz-krnge Loukxtr,

Nayc mz drtwrm ninge, murde ma tqbzx.

78Amyatxbz drtq kxnzglqpx-lzbqng mz nzpokiatitr-krdr ninge,

Murde aoti zvz drtwrnge nzalvztr-krm.

79Batrpz mz kxnzamrluelr nim nzaxvctr-lzbq-krmlr bange,

Krkcng tzkrlz-angidrlr Loukxtr scm.

80Lod, batrpz mz nabznge nztubq-krde mz nzobq-krm,

Murde drtqnge ma tqmya.

Mevalu, Mailz Ninge Murde Navz-nqblqx Me Pnz Drtwrm

81-82Mevalu, mewepengr drtqnge x mzke' ngqbqtxtrpebz

Mz nzaenzli-krnge nim.

?Myx mzli kx na-arlapx-ngrn ninge,

Mz nzangidati-krm nzesalz-krm kc tqbrti drtwrnge?

83Kxmule-esz' nzobqszonge apux da kx nzrtctxpengr,

A' dcpx zvz mz drtwrnge me pnz drtwrm.

84?Myx mzli kx nayrkrpxngr nzkxpu-krngeng?

?X myx mzli kx na-ayrplapx-ngrn krkcng tzatrkatilr ninge?

85Kxnzglqpx-lzbqng nzekqng gq kx nangi trtxki rnge,

Mz nzpxtxpx-krdr Loukxtr scm.

86Mailz ninge mz nzbrtikr drtwrnge Nzryrngrkxtrng amrlx.

Murde trpnzngr badr nou nzatrkati-krdr ninge.

87Kxmule-esz' ycpwz pipz nzayrkrpx-krdr ninge,

A' sc tqlolvz-amqngix nzalvztr-krmqng.

88Mevalu, arlapx ninge mz nzaodu-krm ninge.

Murde nayrlq-angidrx natqm.

Natqm Tqyc Tqyc

89Natqm tqyc, tqyc,

X yc amqngi zvz Heven.

90Wz-ngrn nrlc x yc amqngi zvz.

Delc tqbrti-zvzngr drtwr nim.

91Da amrlx mz nrlc nzvz-nqblqlr me pnz drtwrm,

Murde nzwztrpzng bam.

92Trbz-ngrneu nzkxpu-krngeng,

Murde Loukxtr scm okatrle ninge mz nzaelalz-krmle drtwrnge.

93X trtxpnzngr nzmrbrtrkr mz drtwrnge Nzryrngrkxtrng,

Murde nzrpwa'-ngrmlr bange mz nzvz-rbrngr.

94Arlapx ninge, murde ninge doa nem,

X abz-zvzx nzale-krnge nzalvztr-krmqng.

95Kxmule-esz' kxdrka'-ngrng nzyrlqlr br ngr nznibq-krdr ninge,

A' na-aoti zvz drtwrnge nqmq krm.

96Natqm tqyc tqyc,

Kxmule-esz' da kxmyapxbz amrlx nzyrkrpxng,

Okatrp Ninge Mz Nzo-zli-krnge Nzti Rm

97Oliq-zvzx nzaotikr drtwrnge Loukxtr scm,

Murde mrlz-zlwzm bange.

98Nzrkrlz-krnge myaszpxle enqmi rngeng,

Murde Nzryrngrkxtr yc zvz mz drtwrnge.

99X nzwzkr narnge myaszpxle kxnzalvztrlr ninge,

Murde ale-zvzx me pnz drtwrm.

100X nzyrplapx-krnge myaszpxle lrtzlvzng,

Murde yrlq-angidrx natq kx kame bange.

101Yrlqpx-lzbqnge mz nzmncngr kxdrka'ngr,

Mz nzvz-nqblq-krnge da kx tubq mz nzobq-krm.

102Trpxtxpx-ngrneu drtwr kcng tqyrlqq,

Murde nzalvztrlr ninge.

103Natqm nzlqngi-esz'ngr-krde mz nzxlrngr

Myaszpxle nzmrlzkr dakxnzng amrlx.

104Okatr-zvzq ninge mz nzalvztr-krm murde nakrlzx nzti kxtubq.

Delc tqmamwe-ngrne nqmq kx vz-rbr amrlx.

Pqtr Zvz Mz Drtwrnge Natqm

105Pqtr zvz mz drtwrnge natqm,

Kc tqngi zyzlr ngr nzti rnge mz nzmailz-krm ninge.

106Nzesalz-krngeng nayrlq-angidr-zvzxng,

Mz nzo-zli-krnge nztubqkr lrpzki rm.

107Okatrp ninge da kc tqwai nzesalz-krmle,

Murde nzkxpu-krngeng amrlx ma tznibqlr ninge.

108Yawe, alvztrp bange nzaolvz-krmqng

X abrtzlvz nabz nenge mz nzangrlvz-krnge nim.

109Kxmule-esz' da kxtrka prtzm bange,

A' trmrbrtru mz drtwrnge Loukxtr scm.

110X kxmule-esz' kxdrka'-ngrng nzamwitiolr ninge trtxki,

A' vz zvz nzatutr-krnge nzalvztr-krmqng.

111X lolvz-amqngi-zvzx Nzryrngrkxtrng,

Murde nzaelalzmlr drtwrnge.

112Pnzpe drtwrnge kx navz-nqblq-zvzx me pnz drtwrm,

Murde nzokatrngr kx vzpxm elr vztx alo.

Rblxm Bange Nzmrlzti-krnge Krkcng Drtwrdr Tqlitrpz Bam

113Rblxm bange nzmrlzti-krnge krkcng drtwrdr tqlitrpz bam,

A' mrlz-zlwzm bange Loukxtr scm.

114Nim me rlakitrx x temz ngr lomrnge kc tqyrputrngr nipna,

X abrtrpo drtwrnge mz natqm.

115Esablqtix kxdrka'-ngrng

Murde navz-nqblqx nqmq krm.

116Bzkq mya ngr drtqnge nzbrtikr drtwrnge nim,

A' arlapx ninge da kc tqwai nzesalz-krmle, murde ma tqbzx.

117Natu-ngrme mz nibrnge mz nzarlapx-krm ninge,

Murde namatq zvz mz drtwrnge drtwr kcng tqyrlqq.

118Pxtxpx-ngrn krkcng tzpxtxpx-ngrdr Nzryrngrkxtr.

Murde nzesabrng x nzpokiang.

119Obqszoq kxdrka'-ngrng mz nzapu-krdr dcvi.

Delc tqmrlz-ngrm bange nzalvztr-krmqng.

120Rnrcti-lzbqnge mz nzmwxlrti-krnge nim,

Murde ma trtubqwxu mz nzobq-krm.

Suti Drtwrnge Nzryrngrkxtr

121Suti drtwrnge nzarlapx-krme ninge mz mq enqmi rngeng,

Murde nqmq krnge rsakrlrngr x tubq.

122Bzkq rlr-ngrbzme mz kxnzglqpx-lzbqng nzatrkati-krdr ninge.

A' amnc zpwx ninge.

123Mzke' ngqbqtxtrpebz mz nzaenzli-krnge

Nzvz-nqblq-krm nztubqkr nzesalz-krm.

124Alvztrp bange nqmq krm

Mz nzaodu-zvz-krm ninge.

125Okatrp nzyrplapx-krnge,

Murde nakrlz-angidrx nzaolvz-krmqng.

126Yawe, mzli r nzayrplapx-krm leplz dekape.

Murde nzrnzlvzo-zvzlr Loukxtr scm.

127Mz nzmu-krde lcde, natqm nzmrlz-krmle bange

Myaszpxle da kx lqlwx amrlx.

128Sa natubq-zvzm bange nzalvztr-krmqng amrlx.

X mamwe-ngrne nqmq amrlx kx vz-rbr.

Takitrde Nzlolvz-amqngi-krnge Nzalvztr-krmqng

129Takitrde nzlolvz-amqngi-krnge nzalvztr-krmqng

Murde nzmrlz-zlwzng.

130Natqm apule zyzlr,

Murde aelwa-ngrbzle lrpzki kxtubq mz leplz amrlx.

131Nzsutikr drtwrnge nqmq krm apule nzbrlxkztikr drtwrnge lue,

Murde narmcti-ngrne nzlungr angidr.

132Nayc mz drtwrm ninge,

Da kc tqwaibzme mz krkcng tzamrluelr nim.

133Okatrp ninge mz nzvz-nqblq-krnge me pnz drtwrm,

Murde alwx ma tqmailz-rbrle ninge.

134Arlapxbz ninge mz mq leplz kcng tzakxputilr ninge,

Murde nayrlq-zvzx da kx tubq mz nzobq-krm.

135Okatrp ninge mz nzxngi-krnge nim,

X alvztrp bange Nzryrngrkxtr.

136Trtakitrdeu nzrnzlvzongr Loukxtr scm.

X yrnitx-zlwz-ngrne alwx ngrdr lc.

Vz-nqblq-zvzq Nzmncngr Kxtubq

137Vz-nqblq-zvzq nzmncngr kxtubq-esz'ngr,

X drtwr kcng tqyrlqq rsakrlrngr.

138Natq kcng tqkapxq nzabrkitr drtwr,

Murde nztubq-zvzng.

139Zngya ngr drtwrnge apule nyr kc tqngc,

Murde enqmi rngeng mrbrtr mz drtwrdr Nzryrngrkxtr.

140Nzesalz-krm pq zlwz mz drtwrnge

Murde angidati-zvzme bange.

141Kxmule-esz' leplz nzobqszolr ninge,

A' trmrbrtru mz drtwrnge nzalvztr-krmqng.

142Yawe, nztubq-krm tqyc, tqyc,

X Loukxtr scm ngi da angidr zvz.

143Delc kxmule-esz' nzkxpungr x nzvzkr drtwr nzprtzmqng bange,

A' abrtz-ngrne nzo-zli-zvz-krnge nzti rm.

144Vz zvz nzokatr-krm ninge nzmc-krnge

Nztubq-zvzkr natqm, murde ma tqbzx.

Wztx-ngrpwo Nzkrka'-krbo Bam

145Wztx-ngrpwo nzkrka'-krbo bam.

X ayzlum natqnge, murde nao-zlix lrpzki rm.

146Yrnimi-zvzbo bam nzarlapx-krm ninge,

Murde nayrlq-angidrx Loukxtr scm.

147Kqle-zvzx nim mz nourla kxtopwz mz nzokatr-krm ninge,

Murde abrtrpo drtwrnge mz nzesalz-krm.

148Obqtx-zvzx mz nrlckxbq,

Mz nzaotikr drtwrnge me pnz drtwrm.

149Mz nzaodu-zvz-krm ninge, xlrm natqnge,

X mailz ninge mz nzalvztr-krmqng.

150Kxmule-esz' kxnzxpqbrlr-ngrdr nqmq krm

Nzesolvztilr ninge, a' trmwxlrwxu.

151Murde eso-aepztrpe' bange,

X drtwr amrlx kcng tqyrlqq da angidr zvz.

152Wz-ngrn natqm murde nayc-alo,

Da kc tqwai nzkrlz-krngele, abzo mzli kc pnz.

Xlrm Natqnge Da Kc Tqwai Nzesalz-krmle

153Xlrm natqnge x arlapx ninge mz nzkxpu-krnge,

Murde dcpx zvz mz drtwrnge Loukxtr scm.

154X pipxbz mz leplz kx nqmq krnge tubq,

Da kc tqwai nzesalz-krmle, murde ma tqbzx.

155Kxdrka'-ngrng trtxpnzngr nzrlapx-krdr,

Murde trnzrtangrtilru nzti rm.

156Yawe, axplr mou ninge mz nzetukr nzaodu-krm,

Murde vz-nqblqx me pnz drtwrm.

157Kxmule-esz' enqmi rngeng nzkqlu-zlwzng,

A' trtxpnzngr nzesablqti-krnge Nzryrngrkxtr.

158Pxtxpx-ngrne kx drtwrdr litrpz bam,

Murde trnzlxngitilru da kxtubq mz nzobq-krm.

159Yawe, arlapx ninge mz nivz lrm,

Murde mrlzm bange nzalvztr-krmqng.

160X natqm mqngio mz da kxtubq.

Delc drtwr amrlx kcng tqyrlqq nztubq-kzng.

Yrlq-angidrx Nzalvztr-krmqng

161Yawe, kxnzetung nzatrkati-krdr ninge trpnzngr noude,

A' amatq-zlwzx natqm.

162Apux bcnyr kc tqrmctile da kxpqtr mz nabzde,

Murde abrtz-ngrne Nzryrngrkxtr

163Trkam bange natq ngr nzpokiangr,

A' mrlzm bange natqm.

164Glqpx-zvzx nim mz zbq kang kqlu,

Murde drtwr kcng tqyrlqq tubq-esz'ngr.

165Krkcng tzmrlz badr Loukxtr scm, nzmnc-zpwxng.

X trpnzngr doa x da kx na-ataole nidr.

166Yawe, brti drtwrnge nzarlapx-krm ninge,

Mz nzale-zvz-krnge da kx pitimeng.

167Lolvz-amqngix nqmq krm,

Mz nzmrlz-zlwz-krmle bange.

168Yrlq-angidrx nzalvztr-krm,

Da kc tqwai nzmc-krmle.

Zyzlr Ngrm Napnamilxtile Nabznge

169Zyzlr ngrm napnamilxtile nabznge,

Mz nzayzlu-krme natqnge mz nzvz-nqblq-krde nzesalz-krm.

170Lalztq-ngrm nzkrka'-krnge,

X arlapx ninge mz nzvz-nqblq-krde natqm.

171Naglqlz-zvz-ngrne nim

Mz nzalvztr-krme bange nqmq krm.

172Na-angrlvzx nzesalz-krm,

Murde drtwr amrlx kcng tqyrlqq tubq-esz'ngr.

173Oliqm mz nzokatr-krm ninge,

Murde lolvz-amqngi-zvzx me pnz drtwrm.

174Yawe, obqtipxx nzarlapx-krm ninge,

Murde mrlzm bange Loukxtr scm.

175Okatrp ninge mz Nzryrngrkxtr

Murde naglqpxx nim mzli ka tqlu-ngrne.

176Zmrlz ngrm nakqlelvzti-zvzle ninge.

Murde kxmule-esz' vecpx-lzbqbo bam,

A' trmrbrtitru mz drtwrnge lrpzki rm.

Nzryrngrkxtr Kc Ate Rut x Sam

© 2008 Wycliffe Bible Translators, Inc.

More Info | Version Index