Search form

Sam 135

Sam Kratrtqki-esz'-nzpnu-tq-nrade-nzlvqn (135)

Nigu Nqvi Lr Israel Naglqlzku Yawe

Nabz kx nzngrnelzngr Jerusalem mz nzangiongr.

Mcpx Gct Nqvi Lr Israel

1-2Naglqlz-zvzku Yawe,

Murde nide Gct rgu.

X nigu kxnzawz nedeng na-amrlueku nide

Mz nzkrka'-krmu mz Mangr-nzangiongr x makoa ngrde.

3Na-amatqku nide murde mrlz-esz'ngr.

X na-angrlvz-ngrgu nide nivz lrde.

4Murde mcpxle nqvi lr Jekop, nigu lr Israel,

Mz nzngini-krgu leplz nedeng.

Kxrpalz

5Krlzku kx Kxetu rgu, Yawe, nide Gct kc tqmyatxlz-esz'ngr,

Myaszlzle kxnzmncng mzlilxlr amrlx.

6Vz-nqblq-txpwzle me pnz drtwrde mz da kx alele

Kxmule-esz' mz bongavz, nrlc, prla, x me boo-ngrng.

7Wz-ngrde zbo nzvzdz-krdr mz lclxlr mz bongavz,

X bzlrpc nzvzmi-krm trlipu le.

X batrpzle nzwqkr nenq.

Kxaovxio

8Sc tqnibqtile ncblo kx ayrnrngr Ijipt,

Kr neng leplz x kr neng animol.

9Rwzngr da kxnzkctipxng kxkqlu mrlcde,

Mz nzayrplapx-krde king rdr x kxnzetu nedeng.

10Aovxiole lr mrkzbleng kxkqlu

Mz nznibqti-krde king kxnzxplr-zlwzng.

11Krlcng King Sihon, King Og, x kzdu-kzng king

Kcng tzaclveng mz drtc' Kenan.

12X drtc' nyzdrng katimleng bagu,

Nigu lr Israel, da kc tqwai nzpi-krmlele bagu.

Gct Angidr

13Nqmq kr Yawe tqyc tqyc.

X nzrkrlzngr drtqde tqvzpe tqvzpe.

14Yawe sa napipxbzle mz leplz nedeng kxnzvz-rbrng o trtingr,

X sa na-aodu-zvzle nidr.

15Kxnzmnc-mrbrng nzangiolr mqngr da kx nzlz,

Kcng tzwzngr ncblo mz silvz x gol.

16Mqngr da kxnzlz lcng naodr x mztr ycbz,

A' trnzycmneung x trnzrmcung da.

17Nradrtqdr x nctqdr ycbz,

A' trnzxlrung da x trnzycmini-kzung.

18Leplz kcng tzrwz-ngrng nzapu-kzlr mqngr lcng.

Murde nznabung, trnzobqung, nradrtqdr ngq, x trpnzngr nzlungr badr.

Lr Israel Naglqlzlr Yawe

19A' Nigu nqvi lr Israel, naglqlzku Yawe.

X nimu pris, nqvi lr Eron, na-amrlue-kzamu nide.

20X nimu kxnzawz nedeng, nqvi lr Livae, na-amatqamu nide.

Nigu amrlx kcng tzamrluelr nide, na-angrlvzku nide.

21Na-angioku Yawe Jerusalem, mz Newz Saeon.

Naglqlz-zvzku Yawe.

Nzryrngrkxtr Kc Ate Rut x Sam

© 2008 Wycliffe Bible Translators, Inc.

More Info | Version Index