Search form

Sam 138

Sam Kratrtqki-esz'-nzpnu-tq-nrade-rtqmz (138)

Drtq Yawe X Natqde

Nabz ne Devet.

1Yawe, awibo bam mz nabznge atwrnrngr.

X angrlvzx nim mz mz kxnzmatqng.

2Lxlvrkibo Mangr-nzangiongr nim mz nzglqlz-krnge drtqm.

X awi-ngrbo bam nqmq krm,

Nzaodu-krm, x nzangidati-krm.

Murde drtqm x natqm nzmyatxpx-esz'ngr.

3Mzli kc tqkrka'-ngrbo bam, ayzlume natqnge,

Mz nzaetunepx-krm nzxplr-krnge.

4Yawe, king amrlx mz nrlc sa naglqlzlr nim,

Mz nzxlr-krdr nzmrlzkr natqm.

5X sa na-angrlvzlr kxmu nzale-krmqng da,

Mz nzmc-krdr kx myatxlz-esz'ngrn.

6Kxmule-esz' myalz-esz'ngrn, a' sc tqaclve-zvzq kxnzavzo-lzbqng.

X avzome kxnzglqpx-lzbqng.

7X kxmule-esz' nzkxpungr nzprtzmqng bange, a' amnc-zpwxq ninge.

X tu-zvzme mz nibrnge mz nzngyatikr drtwr enqmi rngeng ninge.

X arlapxq ninge mz zmatq ngrm.

8Yawe, krlzx kx sa na-angidatiq drtwr amrlx kcng tqyrlq-pz'liti-ngrn ninge.

Murde nzaodu-krm tqyc tqyc.

Bzkq esaki nzaclve-krm krkcng amrlx tqwz-ngrn.

Nzryrngrkxtr Kc Ate Rut x Sam

© 2008 Wycliffe Bible Translators, Inc.

More Info | Version Index