Search form

Sam 17

Sam Kranzpnu-esz'-nrade-rlimz (17)

Sa Namcx Mzpq

Nabz ne Devet.

Trvz-rbrwxu

1Yawe, lalztqm mz nzrlxti-krbo nztubqngr.

Xlrm natqnge murde nzkrka'-krbo bam trvzpxpuu mz naonge, a' vzdz-zpwxm mz nabznge.

2Mzli kc napipx-ngrn neke vz-rbr, mnc mz nrlarde nyznge,

Murde nim kx rkrlz nike tubq.

3X krlz-zvzq nzao-krnge drtwrnge

X obqplxq nabznge mz nrlckxbq.

A' trpnzngr da kx vz-rbr kx rmctiq.

X pnzpe drtwrnge kx naonge trna-akawi-ngrwxu alwx.

4Tralewxu da kx nzrtulrtrngr, da kc tzwai kzdung leplz.

Murde vz-nqblq-zvzx natqm.

5Trtaowxu mz nzatalzngr,

Murde o-zli-zvzx lrpzki rm.

Nzkrka'ngr

6Gct, krka'bo bam murde lalztq-zvzme bange.

Kxetu, xlrm natqnge.

7Delc na-aelwa-ngrme bange nzaodu-krm kc tqyc tqyc.

Murde mzli kc tzrlatr-ngrbz leplz bam, arlapxbzme nidr mz mq enqmi rdrng.

8Aclve angidr ninge na-apule dztum kx matq zlwz mz drtwrm.

X amnc-kapqbz ninge da kc tqwai kio mz nzwxbulvzo-krde neideng.

9Murde ma kxdrka'-ngrng tzlolvzlr x tznibqlr ninge,

Mz nztu-ngalelvz-krdr ninge.

10Trpnzngr nzrycngr mz drtwr kx ycbz badr.

A' nzglqpx-lzbq-zvzng.

11Trpengr nrlarde kx navzkix, murde nzmnc-ngalelvzpelr ninge.

X tzryrlqng drtwr kx nametxbo badr.

12Nzapulr laion kcng tzaenzli-kapqlr

Mzli kx nadwa-ngrmlr mz nzpesaliti-krdr ninge.

Nzayrplapxngr

13-14Yawe, otaamu badr enqmi rngeng x aovxiong.

Kapxm ninge mz mq kxdrka'ngr lcng mz zmatq ngrm.

Arlapx ninge x ayrkrtxtr nidr.

Murde nzabrtz-krdr yc txpwz mz nrlc ka.

Ayrplapx leplz ngr nrlc mz zvetq kc tqoliqtipeq nakabzme badr,

Navz navz nakrlzbzle doa nedrng x doa ne doa nedrng.

15A' krlzx kx sa namcx mzpq mz nzvz-nqblq-krde nztubq-krnge.

X mzli kc natulz-ngr-mopwc', sa na-abrtz-ngrne nzmnc-krbo bam.

Nzryrngrkxtr Kc Ate Rut x Sam

© 2008 Wycliffe Bible Translators, Inc.

More Info | Version Index