Search form

Sam 34

Sam Kranzpnu-tq-nrade-pwx (34)

Kxrka X Kxokatr

Nabz ne Devet,

mzli kc narpi-ngrbz nalukurnr-ngrde mz mz Abimilek, kc tqmapulr-ngrde nide x sc tqvzpe.

Kzdq Nabz Ngr A, B, C

1Awi-zvzbo mz Yawe,

X tramawxu nzglqpx-krnge nide.

2Bilvz-zvzx Yawe mz nabznge,

Murde nimu kx nzaetqbz drtqmu na-abrtzlvzamu da kcng tqaleleng.

3Clve Yawe doa x da amrlx. Naglqlzku drtqde.

X napipx-lxblr-ngrgu nzetu-krde.

4Da kcng tqmwxlrtix, arlapxpebz Yawe ninge mz da lcng amrlx.

Murde mzli kc tqkrka'-ngrbo bade, ayzlumle natqnge.

5Elr! Na-abrtrpzmu drtwrmu mz Yawe, murde ma drtqmu tqmya,

X na-abrtzlvzamu nzokatr-krde nimu.

6Gct, mzli kc nzmnc-krnge tqtrka-ngrde, arlapxq ninge,

Mz nzatutr-krm nzkrka'-krnge.

7Ili! Enjrl ne Yawe arlapxle leplz mzli kc drtqdr tqetq-ngrde,

Murde aclvele krkcng tzmyatitrlr Yawe.

8Jzsamu ena nzmrlzkr Yawe x na-abrtr-krbzmu drtwrmu bade.

Murde krkcng tqaclveleng nzabrtz-zvzng.

9Kxnzvz-nqblqlr natq Yawe nzrngiscng da amrlx.

Delc nimu leplz nedeng na-amrlue-ngrnamu nide.

10Laion kx nzxplrng nzkrlzlr nzbrtalengr,

Leplz kx nzvz-nqblqlr Yawe, trpnzngr da kx mrbrpxm badr.

11Mrlxngeng x inyxngeng, lalztqmamu bange,

Murde na-alvztrpo bamu kxnamu nzamrluengr Yawe.

12?Nike suti drtwrm?

?Nzlungr kxmrlz kxboi?

13Obq zpwx, x bzkq pokiaq.

Bzkq ycmne-atrkatiq leplz,

14Prszpx nqmq kxtrka. X ale zvz da kxmrlz.

X nasuti drtwrm nzmnc-zpwx-krmu badr leplz mz nrwx.

15Rlxtibz ncblo kxtubq mz Yawe nzokatr-krde nide.

X Yawe sa naxlrbzle nzkrka'-krde mz nzaclve-krde nide.

16Sa napnanatile krkcng tzale-zvzng da kxtrka.

Trobqpwzu badr x mzli kc nabz-ngrdr, ani txpwz nzmrbrtrkr mz drtwr nidr. +

17Takitrde nzxlr-krbz Yawe natq leplz kxnztubqng mzli kc tzyrni-ngrbzlr bade,

Murde ngi nqmq krde nzokatr-krde leplz nedeng.

18Vz zvz nzesolvzti-krde krkcng drtwrdr tqvz,

X nzamnc-lrpi-krde krkcng nabzdr tqyrnibu.

19Wzpxtx zlwz nzkxpukr ncblo kxtubq.

A' Yawe sa na-arlapxle nide mz da lcng amrlx.

20X mz nzaclve-zpwx-krde nide,

Trpnzngr nrvr ngrdeng kx nztavxi. +

21Yawe sa na-ayrplapxle kxdrka'-ngrng kcng tztrkalr-ngrdr kxnztubqng.

X nqmq krdr lc tqtrka sa nanibq-moule nidr.

22Zvz Yawe nztu-krbzle mz nibr kxnzawz nedeng.

X trpnzngr nzayrplapx-krde krkcng tzabrtrpzlr drtwrdr bade.

Nzryrngrkxtr Kc Ate Rut x Sam

© 2008 Wycliffe Bible Translators, Inc.

More Info | Version Index