Search form

Sam 35

Sam Kranzpnu-tq-nrade-nzlvqn (35)

Yawe, Amyatibz Drtq Krkcng Nanibqlr Ninge

Nabz ne Devet.

Enqmi Rngeng

1Yawe, tu-ngalelvz ninge, murde enqmi rngeng nztu-ngalelvz-kzlr ninge,

X vecamu badr krkcng tqveckr badr.

2-3Yrlqbz temz ngr lomrm kc tqyrputrngr nipna,

X twzm popz' x nipna scmqng,

Mz nzarlapx-krm ninge mz ncblo kcng tzmaneutilr ninge.

X apqtrp drtwrnge kx tume mz nibrnge.

4Aovxiong x amyatibz drtq leplz kcng tzrpilr nanibqlr ninge.

X krkcng tzrpilr na-atrkatilr ninge, nabzdr nzmu natalvzo x nadwaszlr nim.

5Atwzlr-ngrm enjrl nem mz nzmaneuti-krde nidr.

Na-apusr-ngrde nidr leu kxglr kxyrklz kcng tqvxu-pulrtine nenq.

6Navoneng mz lrpzki kx miglq x tu r nzlo,

Murde nataong mz nzdwasz-krdr enjrl lc.

7Kxmule-esz' trpnzngr da kxtrka kx alebo badr,

A' se tzatu-kapqng br scdr x tzekqng gq mz nzlolvz-krdr ninge.

8Mz drtwrnge mrlz nzpwrkilvc-krdr nzodatingr nidr,

Mz nztao-mou-krdr mz br x trtxki kcng tzyrlqlr.

Nzayzlu-ngrmlr Nivz Lrnge Mz Da Kxtrka

9Gct, mzli lcde sa na-abrtzlvzx nim,

X drtwrnge elalzm mz nzarlapx-krm ninge.

10X mz nabznge atwrnrngr, sa narpix kx,

“Trpnzngr kx apule nim.

Murde arlapxq kxtrnzxplrung mz mq kxnzxplrng,

X kxtrpnzngr scdr zmatq mz kxnzrngiscng zmatq.”

11A' kxdrka'-ngrng nzabetitrlr ninge mz da kx tralewxu.

Nzrpilr kx ninge kc tqrwzngr dalr nzkxpungr.

12Alebo badr da kxmrlz, a' nzayzlu-ngrmlr mz da kxtrka,

Kx talvzongr nabznge.

13-14Mz nzyagox-krdr, vzti drtwrngeng.

X axtx-zvzx dakxnzng,

X biox narnge mz nzkrka'-krnge nidr,

Da kc tqwaisr-ngrne mzlengeng x kztengeng.

Murde yc-zlwzngr drtwrnge nidr,

Apule kx vzngr drtwrnge x yrnitix lxenge mzli kc tqbz-ngrde.

15A' mzli kx mnc-ngrne mz nzkxpungr,

Nzyrlwr-lxblrng mz nzyrpalelvz-krdr ninge.

Leplz kxtrkrlzwxung delcng tzatrkati-zvzlr ninge.

16Nzxtrnga-ngrdr ninge mz da kx prtilzleng ninge,

X nzmadqtimlr nqngidr bange.

Arlapx Ninge!

17?Yawe, nzatrkatingr ninge lc, nakrlzbzle mzli kznike?

Arlapx ninge mz leplz lcng tzapulr laion kx nangqdr ninge.

18X sa na-awibo bam mz mz leplz nemqng

Mzli kc nayrlwrngr mz nzangio-krgr nim.

19Leplz lcng nzpxtxpx-krdr ninge trpnzngr noude. +

Bzkq rlr-ngrbzme badr nzabrtzlvz-krdr nzkxpu-krngeng,

X nzyrpalelvz-krdr nzvzkr drtwrnge.

20Trnzkrlzlru nzycmnengr mz nrwx.

A' nzpikiti-zvzlr krkcng tzmnc-lrping mz ma nyzdr.

21X nzpibqti-kzlr ninge mz nzrpi-krdr kx,

“Eke! A' mcpekr da kxtrka kc tqaleq.”

Ayrplapx Nidr!

22Yawe, krlzq nikeng nzalemlr bange.

Bzkq mnc-lrpiq x obqlvztx-ngrn nidr.

23A' vzm, tum mz nibrnge,

X ota-ngrbz ninge.

24Bzkq rlr-ngrbzme badr nzbilvz-krdr ninge.

A' pim bange trnzvz-rbr-krpwc'u murde tubqq mz nzryrlq-krm drtwr.

25Bzkq rlr-ngrbzme nzrpi-krdr kx sc tzaovxiopelr ninge,

X me pnz drtwrdr ngidape.

26Amyatibz drtqdr krkcng tzabrtzlvzlr nzetqkr drtqnge.

Krkcng tzobqszolr ninge drtqdr nzmu namya-zlwzng mz mz leplz x namanepeng.

27A' kztengeng kcng tzsuti drtwrdr kx natubqbo mz nzobq-krm, batrpz badr nzmalqlvz-krdr nim,

Mz nzrpi-zvz-krdr kx, “Yawe, myalz-esz'-ngrn! X abrtzlvzq nzmnc-zpwxkr kxnzawz nem.”

28X mz zbq lc sa naglqlz-zvzx nim,

Mz nzangrlvz-krnge nztubq-zlwz-krm.

Nzryrngrkxtr Kc Ate Rut x Sam

© 2008 Wycliffe Bible Translators, Inc.

More Info | Version Index