Search form

Sam 49

Sam Kranzpnu-pwx-nrade-rpwxmz (49)

Leplz Amrlx Sa Nabzng

Nabz ne nqvi lr Kora.

Narncbr Ngr Nzlu-alongr

1-2Lalztqmamu x xlrmamu natqnge, nimu neidung mz nrlc tulvzo,

Kxmule-esz' nimu kxnzetung, leplz txneng, bcnyrng, x kxtrnzrngiscung.

3Murde natqnge otxpx,

X alvztr-ngrne nzyrplapxngr,

4Mz nzpipx-krnge natq lrtzlvz ngrgung.

Murde nayokaetipxx drtwr ngrdr mz nabz nenge.

5Kxmule-esz' kxpux mz nztu-ngalelvzkr enqmi rngeng ninge,

A' trmwxlrwxu.

6Murde kxdrka'ngr lcng nzabrtrpzlr drtwrdr mz trau,

X nzglqpx-lzbqng mz nzngini-krdr bcnyrng.

7-9A' trpnzngr kxrkrlz nzxpepx-krde nzlu-krde esz'-krde.

Murde ncblo trtakitrdeu nzkapx-krde narncbr ngr nzlu-alongr kx yrlq Gct,

Kxmule-esz' ka-atwrnr-ngrde trau x dztudeng amrlx.

Murde rblx nzxpe-krde da kx na-arlapxle nide mz gq.

Leplz Amrlx Sa Nabzng

10Leplz amrlx sa nabzng, kxmule-esz' kxnzyrplapxng o kxnzngqngung.

X dztudrng amrlx sa nabzszbzlr mz kzdung kz leplz.

11X kxmule-esz' mzli ka nzrnginyzng drtc',

A' gq lrdr dela nangipe ma nyzdr mz nzmnc-alope-krdr elr.

12Da amrlx kcng tqmatq mz drtwrdr sa nayrkrpx-kzng.

Leplz sa nabzng da kc tzwai animol amrlx.

13Lrpzki r kxnzngqngung kcng tzabrtrlr drtwrdr mz nidr esz'-krdr x mz dztudrng,

Yrkrtxpxpwz mz nzbzngr.

Kxmule-esz' Bcnyrng

14Apule kx nzbzngr nide kxetu rdr kc tqmailzle nidr mz gq lrdr,

Mz nzapu-krdr sip.

X kxnztubqng sa navzneng wq mrkc tzyrtzmqngr namz ngrdr.

X mz nzmibi-krdr, nzyc-rlrubzng mz ma nyzdr.

15A' Gct sa naxpetrle ninge mz zmatq ngr nzbzngr,

Mz nzarlapx-krde ninge mz gq.

16Bzkq nabzmu talvzo mz nzmc-krmu bcnyrng,

X nzkqlunepxkr dztudrng.

17Murde rblx nzrtwzmingr dztung mz nzbzngr.

Dztung la tqyc, a' nrkrdrtq la namibi.

18Kxmule-esz' bcnyrng nzabrtz-zvzng mzli kc tzlube-ngrdr,

X nzamatq leplz nidr murde sc tzakqlunepx-zvzlr dztudrng,

19A' sa navzo-kzng mz gq, da kc tzwai melrmqdrng,

Mz nzmnc-alo-krdr mz nzlo.

20Da amrlx kcng tqmatq mz drtwrdr mane x nardr tryrplatrpwzu.

Leplz sa nabzng da kc tzwai animol amrlx.

Nzryrngrkxtr Kc Ate Rut x Sam

© 2008 Wycliffe Bible Translators, Inc.

More Info | Version Index