Search form

Sam 5

Sam Kranzlvqn (5)

Nivz Lrm O-ngalelvzle Nigr

Nabz ne Devet kx yrbzle mz kxrmailz ngr dzbe kxnzngrng.

Nzkrka'ngr

1-2Yawe, nim King x Gct rnge. Rlxtibo bam kx naxlrme natqnge,

X na-aoti kz drtwrm, mz nzatutr-krm nzkrka'-krnge.

3Kxetu, mz nourla kang kqlu natqnge sa navzbz bam.

X nakrka'-zvzbo bam, mz nzaenzli-krbo natqm kxmrlz.

Kxdrka'-ngrng

4Yawe, trnginipqu Gct kx abrtzlvzle da kxtrka.

X trmnc-lxblrwamuu mz kxdrka'-ngrng.

5Leplz kx nzglqpx-lzbqng trtxpnzngr nzmnctr-krbzlr bam,

Murde rblxbz mz leplz kx mrlz-zvzbz badr nzale-krdr alwx nztutr-krbzlr mz mzpq.

6Odatiq kxnzpokiang,

X obqszo-zvzq kxnzrnibqng x kxnzesabrting.

Kxnztubqng

7A' mz nzaodu-zvz-krm, delc navztr-ngrne Mangr-nzangiongr nim,

X nayrngzobo mz nzamatqngr nim.

8Yawe, mailz ninge mz nqmq krm kxtubq, murde enqmi rnge nzkqlu-zlwzng.

X aelwa-zpwx-ngrm bange me pnz drtwrm.

Kxdrka'-ngrng

9Da angidr trvzpxpuu mz nao enqmi rngeng.

Murde mz nabzdr la nzodatingr txpwz.

X mz nzycmne-krdr nzmailzlr leplz

Mz nzbatr-krbzlr nzbz-krdr esz'-krdr. +

10Gct, plzpx alwx ngrdr x ayrplapx nidr,

Mz nzprtz-mou-krdr mz trtxki scdr.

Mapulrpxngr nidr mz nzkqlukr alwx ngrdrng,

Murde nzpxtxpx-zvz-ngrdr nim.

Kxnztubqng

11A' leplz amrlx kcng tzabrtrpzlr drtwrdr bam na-abrtzng.

X nangr-along mz nzelalz-krm drtwrdr.

Aclve-angidr kxnzmrlztilr nim

Murde nabilvzlr nim.

12Yawe, amrlz-zvzq kxnztubqng. X nivz lrm o-ngalelvzle nidr

Mz nzapu-krde temz ngr lomrdr kc tqyrputrngr nipna.

Nzryrngrkxtr Kc Ate Rut x Sam

© 2008 Wycliffe Bible Translators, Inc.

More Info | Version Index