Search form

Sam 55

Sam Kranzpnu-nzlvqn-nrade-nzlvqn (55)

Kxdrka'-ngrng X Kxamwale Kztede

Nabz ne Devet kx yrbzle mz kxrmailz ngr dzbe kxnzngrng, mz nzayrningr gita.

Nzkrka'ngr

1Gct, xlrm nzkrka'-krbo bam.

X bzkq drtqm satrp nzycmne-krbo bam.

2Lalztqm bange x ayzlum natqnge,

Murde nabznge tropxpeu mz nztalvzo-krde.

Nzetqkr Drtq

3Enqmi rngeng nzrkatrpqng bange nzkxpungr,

Mz nzxngitr-krnge nzycmne-kato-krdr,

Mz nzrnzlvzo-krdr ninge,

X nzobq-krmlr bange mz zngya.

4Nelznge vzdz-zlwzm,

Murde ycpe pipz nzbz-krnge.

5Rnrcti-lzbqpenge mz zmwxlr,

X nrkrdrtqnge esz'pe-ngrde.

6X rpix mz drtwrnge kx, “Nzmu nabxnge naycbzle, da kc tqwai bona,

Nalvcx x nartangrx me namnc-zpwx-ngrne.

7Nalvctr-rlrux lzke,

X namnc-lrpix esz'-krnge mrlcde.

8Na-anitxpwo nzrtangrti-krnge me narlakitrx

Mz tewa x nounenq.”

Nzkrka'ngr

9Kxetu, akipx kxdrka'-ngrng mz nzarlxlvrti-krbzme natqdr.

Murde nzota-zvzng x nznani-lzbq-zvzng mz mztea.

10Mz nrlckxngrlx x nrlckxbq

Mztea esz'tx-ngrpwz nzxpqbrlrngr lou x nzkxpungr.

11Nzodangr prtz-zvzm mrlcng kqlu mz mztea.

X me nzamwangr da tresakipxpuu nzpokiangr x nzangqngutingr leplz.

Kxamwa Kztede

12-14Kztenge, mzli kc ryapwx-angidrki mz nzodu-krgi,

X vztr-lxblrki mz Mangr-nzangiongr Gct.

A' mzli ka trngiu enqmi rnge kc tqxtrnga-ngrde ninge,

A' krlc nim, kc tqmuki me esz' x line-zvzki.

X trngiu kxpxtxpx-ngrde ninge kc tqyrpalelvzle ninge,

A' krlc nim, mrlxkztenge.

Mz nzatrkatikr enqmi rnge ninge

Nabznge trtalvzou x krlzx nzmnc-kapqngr,

A' nzamwa-krm lc ninge, kx mzlenge,

Delc tqvztx-zlwzngr drtwrnge.

Nzkrka'ngr

15Gct, ayrkrpx-anibz enqmi lcng nabzdr x nzao-krdr drtwrdr tqdrka'ngr,

Murde napwrkilvc-ngrdr nzbz-krdr.

16Yawe, mzli kc nayrni-ngrbo bam,

Krlzx kx sa na-arlapxq ninge.

17Murde sa naxlrme natqnge mz nourla, bea, x mz nrlckxbq,

Mz nzkalz-zvz-krbo bam nzlckr drtwrnge x nztalvzokr nabznge.

18Kxmule-esz' enqmi rngeng nzkqlung, a' mzli kcpe naota-ngrgr badr,

Sa na-amnc-zpwxq ninge mz mzlirdr.

19Murde nim Gct kc nzaclve-krde tqyc tqyc.

X sa na-ayzlume natqnge lcng mz nzaovxio-krm nidr mz nzotangr.

Murde nzpxtxpx-ngrdr nztekqtr-krdr nqmq krdr,

X trnzamrlue-kzlru nim.

Kxamwa Kztede

20Mrlxkztenge lc, mzli kc nigr badr dzbede kxesz', a' mzli ka yrlqpx-lzbq mz nzesz'tikr drtwrgr badr.

A' se tqrtwztipele nigr zngya tqotapekr badr.

21Nzprlxpx-krde nivz narpi-ngrbz nide ncblo ngrde,

A' mz nabzde la poi kx mu ncblo.

Mz nzycmne-krde nide pakrle,

A' natqdeng malc apule toki r vea.

Nzkrka'ngr

22Yawe, napipxbzkr nzkxpu-krgrng bam, murde nalolvz-amqngiq nigr.

X tr-rlrpx-ngrwq leplz kxnztubqng nzaxtx-krbzlr nzlxngiti-krdr nim.

23Murde sa nartco-ngrn mz gq lrdr

Krkcng tzrnibqng x tzpokiang,

Mzli lc tznginibe-ngrdr obla.

A' sa na-abrtr-zvzbo drtwrnge bam.

Nzryrngrkxtr Kc Ate Rut x Sam

© 2008 Wycliffe Bible Translators, Inc.

More Info | Version Index