Search form

Sam 63

Sam Kranzpnu-esz'mz-nrade-tq (63)

Sutitx Zlwz Drtwrnge Nzxplr-krm

Nabz ne Devet mzli kc tqmnc-ngrde lzke ngr Judz.

1Gct rnge, rtangrtix nim.

Murde nim kc tqbatrple nzesatxpx-zpwxkr drtwrnge.

Apux ncblo kx drtwrde brlxkz x mzte tclvr mrkc lzke,

Mz nzsutitx-zlwzkr drtwrnge nzmnctr-krbo bam.

2Suti drtwrnge nzxngi-krbo nzulrm Mangr-nzangiongr

Mz nzmc-krnge zmatq x zluli rm.

3Nzkrlz-krnge nivz lrm myaszpx-zlwzle nzlu-krnge mz nrlc.

X glqlz-zvzx nim mz nzaodu-zvz-krm ninge.

4X sa na-awi-zvzbo bam

Mz nzglalz-krbo mqnge mz nzkrka'-krbo bam.

5Drtwrnge sa naesatxpx zpwx nzmnctr-krbo bam.

X sa na-angrlvzx nim mz nabz kxyrlvi.

6Mz nrlckxbq kang kqlu aoti zvz drtwrnge nim,

Vz vz nrlc ngrlxtxpx.

7X angrlvzx nim mz nzabrtzngr

Murde okatr-zvzq ninge x tu-zvzme mz nibrnge.

8Mnc-amqngitrpo bam,

X lolvz-amqngiq ninge mz mqm kx xplr.

9A' ayrkrtxong mz drtc'

Krkcng tzrpilr nanibqlr ninge.

10Nibqting nidr mz vea,

Murde kuli kzpeto nangqtilr namz ngrdr.

11X ninge, king nem, sa na-abrtzlvzx nim,

Murde ngi-batrpe' nzaovxio-krnge.

X krkcng tzabrtrpzlr drtwrdr bam, sa nabilvzlr nim.

Murde sa nangi-batrpzme mz kxnzpokiang nzmnc-lrpi-krdr.

Nzryrngrkxtr Kc Ate Rut x Sam

© 2008 Wycliffe Bible Translators, Inc.

More Info | Version Index