Search form

Sam 74

Sam Kranzpnu-rlimz-nrade-pwx (74)

Bzkq Mrbrtr Mz Drtwrm Nigr Kxnzakxpu Nemqng

Nabz ne Asaf.

Nzangctitx Enqmi Makxtr Nyzmqng Amrlx

1?Gct, memule tqrtctx-alope-ngrn nigr,

Mz nzngyatikr drtwrm nigr sip nemqng?

2Nadcpx mz drtwrm nigr kcng tqmcpxqng mzli kc bqnc, mz nzarlapx-krbzm nigr mz mq kxnzakxputilr nigr,

X mz nzmnc-krme bagr mz Newz Saeon.

3Vztr ena mrlcde mz Mangr-nzangiongr nim Jerusalem,

Murde namcq nzodati-atwrnrkr enqmi rgrng da amrlx mrka.

4Enqmi lcng nzmalqlvzlr Mangr-nzangiongr nim,

Nzpetr-krdr nc nqngq ngr nibr kxrmailz ngrdr mz nounc kx nzatulr mrlcde mz nzaelwapx-krdr nzaovxio-krdr nigr.

5-6Nztaglctilr mz xks x hama scdrng da kcng tzlzting amrlx mrlcde,

Mz nzapu-krdr ncblo kx narlaking nounc.

7Nzkatrpzlr nyr ngr Mangr-nzangiongr nim,

Mz nzmatinetrkr drtwrdr nztr-esz'ngr-krm.

8X nzangctitxdr mrkcng amrlx tqangio-ngrgr nim mz drtc' nyzm,

Murde narnzlvzo-atwrnr-ngrdr nigr.

9Dalr nzangio-krgr nim lcng amrlx nzmrbrtipeng,

X trpengr profet kx narpim bagr mzli kx naesakingr nzkxpungr lc.

10?Gct, myx mzli kx nakrlzbz enqmi rgrng nzxtrnga-krdr nim?

?Myx kxmule, narlrtx-alope-ngrbzme nzycmne-atrkati-krdr drtqm?

11Bzkq mnc-lrpitxn,

A' odati nidr mz nzokatr-krm nigr.

Nim Kxrpalz Kx Xplr

12Gct, kxmule-esz' nzmusrnepegr lc, a' nim King rgr yzutr pnz mzli kc bqnc.

X nzwrde kqlu kx arlapx-ngrn nigr.

13Sc tqakipxq Prla Bla mz zmatq ngrm.

X tqtamyrnr-ngrn nardr mepwz kc tqngi Ijipt.

14Murde aovxioq kxnzetu rdrng,

X kabzme nrkrdrtqdr nangq animol ngr lzke.

15Sc tqaglqwiq mrkc tqrpnakilzm aulz x narlue.

X apz-kzq me nakawicngr LueJodzn.

16Nim kxrpalz kc tqwz-ngrde ngrlx x nrlckxbq,

X nim kc tqryrlq nepi x temz mrnyzdr.

17X nim kc tqryrlqbz me nangi bz ngr prla x drtc',

X yrlq-kzpzme mzli r zbao x zpq.

Arlapx Nigr!

18A' Yawe, nadcpx mz drtwrm kx enqmi rgrng nzxtrnga-ngrdr nim,

X nzatrkatilr drtqm mz nzycmne-krdr mz nzobqszo-krdr nim.

19Bzkq mrbrtr mz drtwrm kxnzakxpu nemqng,

Mz nzapusr-krm nigr bona kx nalolvzti kuli kzpeto.

20Nadcpx mz drtwrm Nzesz'tikr Drtwrgu mz nzarlapx-krm nigr,

Murde mzli ka ncblo kxayo nzkqlupeng kxnzmnc-kapqneng mz nzlo.

21Bzkq rlr-ngrbzme badr nzaovxio-krdr nigr kxnzakxpung,

Murde nigr leplz txneng kx trpnzngr scdr zmatq naglqlzkr nim.

22Gct, vzm mz nzatubqti-krm drtwr kxnzobqszolr nim,

Mz nzdcpxkr mz drtwrm kx nzxtrnga-zvz-ngrdr nim.

23Bzkq mrbrtr mz drtwrm enqmi rmqng kx nznemi-zvzlr zngya mz nzatrkati-krdr nim.

A' vzm mz nzawx-nabu-krm nidr mz natqdr.

Nzryrngrkxtr Kc Ate Rut x Sam

© 2008 Wycliffe Bible Translators, Inc.

More Info | Version Index