Search form

Sam 75

Sam Kranzpnu-rlimz-nrade-nzlvqn (75)

Waen Kx Xplr Ngr Nzayrplapxngr

Nabz ne Asaf.

1Gct, awitx-ngrbzkr bam mz nzmnc-aepztr-krme bagr.

Aleq da kxmrlzting. Gct, awitx-zlwzbzkr bam.

2Gct rpile kx, “Yrlqpex mzli kx napipx-ngrne doa kx tubq x kx vz-rbr.

X nzayzlu-krbo da badr narsakrlrngr.

3Kxmule-esz' nrlc badr leplz ngrdeng nzrnrcng,

A' sa nalolvz-amqngix nou nrlc.

4-5Pibo mz kxnzglqpx-lzbqng kx bzkq nzglqpx-lzbqng

Mz nzbilvz-krdr zmatq ngrdr.

X pi-kzpo mz kxdrka'-ngrng kx bzkqpe nzarmyalz-lzbqng,

Mz nzailvzo-krdr kztedrng.”

6Murde trpnzngr me vzkipxm nzarmyalzngr

Mrka mz nrlc.

7A' Gct txpwz kx na-ayzlu-ngrbzle da mz leplz amrlx,

Mz nzayrplapx-krde kxdrka'-ngrng x mz nzarmyalz-krde kxnztubqng.

8Yawe ngyati zlwz drtwrde kxdrka'-ngrng.

X mz nzayrplapx-krde nidr

Na-apule kx rkabz badr kap ngr waen kx xplr.

X mz nzmnq-krdrle trpnzngr kxpipz kx nayctxo, a' nayrkrtxlzm.

9A' trtxpnzngr nzesakikr nzyapwxtine-krnge Gct r Jekop,

X sa na-angrlvz-zvzx nide.

10Murde rpile kx, “Sa naodatix zmatq ngr kxdrka'-ngrng,

A' zmatq ngr kxnztubqng sa na-aetunepxbo.”

Nzryrngrkxtr Kc Ate Rut x Sam

© 2008 Wycliffe Bible Translators, Inc.

More Info | Version Index