Search form

Sam 79

Sam Kranzpnu-rlimz-nrade-rpwxmz (79)

Kxetu, Ayzlu-ebir-ngr-mopwz Badr

Nabz ne Asaf.

Enqmi Rgrng

1Gct, leplz kxnzmnc-mrbrng nzvztrpqng x nztztilr nigr,

Murde natwzlr drtc' lc tqkame bagr.

Nzatrkatipelr Mangr-nzangiongr nim,

X nzodati-atwrnrpe-ngrdr Jerusalem.

2Namz ngr leplz nemqng nzayrlwrtxnedr

Ngi dakxnzng nanq utc x animol kzpetong.

3Enqmi lcng tzlakitilr leplz amrlx Jerusalem,

X mepyr ngrdr yrlenepe apule lue.

Mz nzmu-krde lcde, trpnzngr nigr kx rlapx,

Kx nayrtzmqlr namz ngr kztedrng.

4Lr mrkzbleng kcng tzmnc-aepztrpqng bagr nznelvzlr nigr mz nzamyati-ngrm drtqgr,

X nzxtrnga-ngrdr nigr.

5?Yawe, ngyati-alope drtwrm nigr?

?Myx kxmule, zngya ngr drtwrm lc tqapule nyr, kx na-angc-alopele nigr?

6Bzkq, a' kx nangyati drtwrm kxtrnzrlxngitiung ngr mrkzbleng,

Kcng trnzamatqlru x trnzangiolru nim.

7Murde sc tznibqtipelr nigr leplz ngr nqvi lr Jekop,

X tzatrkatipelr drtc' kc tqkame bagr.

Arlapx Nigr!

8Gct, bzkq ayrkrpx-ngrn nigr alwx ngr melrmqgrng,

A' nayc mz drtwrm nigr murde nqmq nr nabzgr bao-zlwzpe.

9Mevalu rgr, okatrp x arlapx nigr, x ipqpxbz alwx ngrgrng,

Murde leplz ma tzobqszolr nim,

10Mz nzrpi-krmlr bagr kx,

“?Myxpe Gct rmu?” +

A' rlr-ngrm nzmc-krgr nzayrplapx-krm leplz lcng,

Mz nzayzlu-krbzme badr nznibqti-krbzlr leplz nemqng.

11-12Kxetu, ayzlu-ebir-ngr-mopwz badr

Nikeng nzalelr mz nzobqszo-krdr nim.

X arlapx kz nigr leplz nemqng kcng tzlolvztilr, murde ma tqbzkr,

Mz nzayzlu-krme nzyrni-krbzkr bam.

13Murde apukr sip nemqng,

X sa na-awi-zvzpebzkr bam mz nzglqlz-alo-krgr nim.

Nzryrngrkxtr Kc Ate Rut x Sam

© 2008 Wycliffe Bible Translators, Inc.

More Info | Version Index