Search form

Sam 80

Sam Kranzpnu-rtqmz (80)

Ka-mop Bagr Nzxplr-krgr Kc Pnz

Nabz ne Asaf.

Nigr Sip Nemqng

1Gct, myaszlzq enjrl kxnzetung.

X aclve-zvzq nigr doa neng Josip,

Mz nzapu-krgr sip nemqng.

Lalztqm bagr, nigr doa neng Israel.

2X aelwa-ngrm zmatq ngrm bagr,

Nigr nqvi lr Efrem, Benjamin, x Manase.

Vzm mz nzxplr-krm mzli ka

X arlapxbz nigr mz mq enqmi rgrng.

3Gct, mz nzaodu-zvz-krm nigr, arlapx nigr,

X ka-mop bagr nzxplr-krgr kc pnz.

Nabzgr Talvzo

4Yawe Gct kc tqrninr, bzkq drtwrm ngya-zvzm bagr,

A' ayzlum nzkrka'-krgr.

5Tekqtrpebzme dakxnzng nagr mz nzavz-krbzme drtwrgr.

X mz lue amnqtr-zvzpeq nigr mz drlemzkr.

6Rlrtx-ngrpwzme mz lr mrkzbleng kcng tzmnc-ngalelr nigr nzyrpalelvz-krdr nigr

X nzotalvz-krdr drtc' nyzgr kx neke nartwz.

7Gct kc tqrninr, mz nzaodu-zvz-krm nigr, arlapx nigr,

X ka-mop bagr nzxplr-krgr kc pnz.

Nigr Nqvi Lr Grep Nyzm

8-9Apusr-ngrn nigr nqvi lr grep ngr nrlanc nyzm.

Murde mz nzvzmipx-krme nigr Ijipt,

Apule kx bolvztipeq leplz kxnzmnc-mrbrng mrkc Kenan,

Murde nqvi lr grep nyzm natu-amqngi mz drtc' lc.

10-11X bz ngr nrlanc kc tqoliqtime bagr yzutr mz drtc' ngr Lebanon,

Vz krlzbzle Lue Yufretis.

X vzki-kzple mz newz kxnzetung,

Vz x krlzbzle Prla Meditrenia.

12A' mzli ka opxm kx awxlikiq nabxbz ngr nrlanc nyzgr,

Mz nzrlr-krbzme mz enqmi rgrng nzrtwz-abeane-krdr dalr nrlanc.

13Lr mrkzbleng nzapulr poi kzpeto kcng tzayabetilr nrlanc,

Mz nzapusr-krdr nigr dakxnzng nadr.

14Gct kc tqrninr, obqom bagr Heven.

X okatr-mop nigr mz nzapu-krgr nqvi lr grep nyzm,

15Kc tqpetiq

Murde naxplrkr mz nzmnc-krgr mz drtc'.

16-17Ngaprbz ncpa'bu ngrgr kx nao-zlilzkr,

Mz nztu-zvz-krme mz nibrgr, nigr leplz nemqng.

Murde enqmi rgrng nzapusr-ngrdr nigr nounc kc tzlakitxo x nzangc mz nyr.

Delc naodati-ngrbzme nidr mz zngya ngr drtwrm.

18Zbz trnaesablqtikru nim,

A' naglqlz-zvzpekr nim mz nzalu-krm nigr.

19Yawe Gct kc tqrninr, mz nzaodu-zvz-krm nigr, arlapx nigr,

X ka-mop bagr nzxplr-krgr kc pnz.

Nzryrngrkxtr Kc Ate Rut x Sam

© 2008 Wycliffe Bible Translators, Inc.

More Info | Version Index