Search form

Sam 95

Sam Kranzpnu-rpwxmz-nrade-nzlvqn (95)

Namnclzbzku Mz Yawe, King Kc Tqngi Kxrpalz

Nangrbzku Mz Yawe

1Nangrbzku mz Yawe mz nzabrtzngr.

Murde nide butqbr kc tqrlakitrku.

2Na-awibzku bade

Mz nzngr-kato-krbzku bade mz nabz kxyrlvi!

3Murde Yawe nide Gct kc tqmyalz-esz'ngr,

X King kc tqmyaszlzle kxnzmncng mzlilxlr amrlx.

4Me boongr yc mz mqde.

X nyz-kzde newz kxmyalzng.

5Prla x drtc' nyzdeng

Murde wz-ngrde mz nzngini-krde Kxrpalz.

6Na-angioku Yawe kc tqwz-ngrde nigu

Mz nzyrngzlvzo-krgu nide.

7Murde nide Gct rgu, x nigu leplz nedeng,

Apuku sip kx aclveleng.

Naxlrku Natqde

X naxlramu natqde mzbq ka,

Mz nzrpi-krbzle bamu kx,

8-9“Bzkq nabzmu mqngipe, da kc tzwailr melrmqmung.

Murde kxmule-esz' nzmc-zvzlr nzrkati-krbo da kxmrlzting badr,

Mz nzmnc-krdr mrkc lzke, a' otablrkr badr mrkc Meriba,

X nzatalzlr ninge mrkc Masa, mz nzxpqbrlr-krdr ninge.

10Mz yiz lcng nzpnu-pwx ngyati zvz ngr drtwrnge nidr.

Murde nidr leplz kx nzvz-rbrng mz nabzdr x trnzvz-nqblqlru nqmq krngeng.

11X mz nzangya-krmlr drtwrnge, sc tqesalzpex kx,

Trtxpnzngr nzprtr-krdr mz nzmnc-zpwxngr kc nakabo badr.” +

Nzryrngrkxtr Kc Ate Rut x Sam

© 2008 Wycliffe Bible Translators, Inc.

More Info | Version Index