Search form

Sam 96

Sam Kranzpnu-rpwxmz-nrade-esz'mz (96)

Naglqlzku Yawe, King Kc Tqtubq

Takitrde Nzrglqlzngr

1Nigu lr nrlc amrlx

Nangr-ngrbzku mz Yawe nabz kxmrna!

2Na-angrlvzku nide

Mz nzyapwxtipx-krgu kx arlapxle nigu.

3Napipxbzku mz leplz amrlx

Da kxmatq x da kxmyapxbz kcng tqaletileng.

4Takitrde nzrglqlzngr Yawe kc tqmyalz-esz'ngr,

Murde nzmrlue-krde namyaszlzle kxnzmncng mzlilxlr amrlx.

5Lr mrkzbleng nzangio-txpwzlr mqngr da kxnzlz,

A' Yawe txpwz kx rwzngr bongavz x nrlc atwrnrngr.

6Mz nzmncpx-krm Yawe Mangr-nzangiongr,

Xngibzku zmrlue, zyzlr, zmatq x zluli rdeng.

Lr Nrlc Naglqlzlr Yawe

7-8Napibzku mz lr mrkzbleng kx naglqlz-kzlr nide

Mz zmatq, zluli, x zmrlue lcng.

Murde takitrde nzale-krgu da lcng,

Mz nzrtwz-krmgu da bade mz makoa nyzde.

9Na-angioku Yawe murde tr-esz'ngr.

Na-amrlueku nide x narnrctrpzku bade.

10Eu, napipxbzku mz neidung amrlx kx Yawe nide King r nrlc, x atu-amqngile nrlc mz trnzycngrlr-krdeu.

X sa na-aclvele lr nrlc amrlx mz nzrsakrlrngr.

Nzaclve-krde Tubq

11Nimu bongavz x drtc' naelalvzamu nide!

X nim prla x dalrmqng amrlx drtwrmu naelalzm!

12Nimu nardzng x dalrmqng amrlx na-abrtz-kzamu!

Nimu nounc ngr peto amrlx na-angrlvz-kzamu Yawe.

13Murde sa tqvzm mz nzaclve-krde lr nrlc.

X nzayzlu-krbzle da mz leplz amrlx sa namrlz x tubq.

Nzryrngrkxtr Kc Ate Rut x Sam

© 2008 Wycliffe Bible Translators, Inc.

More Info | Version Index