Search form

Apocalipse 7

Tupana'ga rembikwatijaripyra nongava

1Aerẽ ji hepiagi Tupana'gapyrive'g̃a amame yvya koty yvagipeve'g̃a. Quatro ko g̃a. Quatrove'g̃a ko nahã: Ojipe'ga ami tyapyra koty. Ojipe'ga ami nhimbya koty. Ojipe'ga ami kwara pora koty. Ojipe'ga ami kwara kia koty. Nahã quatrove'g̃a hepiakatupavi yvytua yvya koty. Quatro ko yvytua. G̃a nag̃anani ipyhygi yvytua topejupejuyme ti yvytua yvya koty javo.

—Topejuyme ti yvytua yvya rehe ypiahua ruvihava rehe no yva rehe nehẽ no, ei g̃a.

2Kiro ji hepiagi ojipe'ga Tupana'gapyrive'ga ga jiupirame kwara pora hugwi ogwovo yvagi pe. Gwereko ga Tupana'ga rembikwatijaripyra nongava avuiramave'ga rembikwatijaripyra nongava. A'ea pyvõ ga ono Tupana'ga rembikwatijaripyra yvyakotyve'g̃a ndehe g̃ahã ko Tupana'gareheve'g̃a javo. Hahyahi Tupana'gapyrive'ga nhi'ig̃a ga erame quatrove'g̃a pe – kiroki g̃a opyhy yvytua. Kiro g̃ambopopoakahava. Nurã ikwahava omondoa g̃a ei ojohupe:

—Timbote'varuhu ti yvya ypiahua ruvihava no, ei g̃a.

G̃a pe Tupana'gapyrive'ga onhi'ig̃ahyahi.

3—Tapembote'varuhui ve ti yvya ypiahua ruvihava no yva no, ei ga. Na ore inog̃i na'ẽ nhanderuvihavuhuhete'ga rembikwatijaripyra gareheve'g̃a ndetovapya rehe. A'ea ti ore torono g̃a ndehe garembikwatijaripyra nongava pyvõ g̃ahã ko Tupana'gareheve'g̃a javo, ei ga g̃a pe.

—Kwa, ei g̃a.

4G̃a inombavirẽ g̃a ndehe ji henduvi ga imombe'urame. Imombe'gwovo ga ei:

—He'yjuhuranuhũve'g̃a ndehe g̃a inog̃i Tupana'ga rembikwatijaripyra cento e quarenta e quatro milve'g̃a ndehe. G̃a ko Israelva'ea ra'yrava'ea rakykwepohara'g̃a, ei ga. 5-8Doze ko Israelva'ea ra'yrava'ea oko huvihavamo. Ahera'yrava'ea rakykwepohara'g̃a gwereko Israelva'ea ra'yrava'ea rera jitehe. G̃a ko nahã a'ero:

Judá'g̃a

Rúben'g̃a

Gade'g̃a

Aser'g̃a

Naftali'g̃a

Manassés'g̃a

Simeão'g̃a

Levi'g̃a

Issacar'g̃a

Zebulom'g̃a

José'g̃a

Benjamim'g̃a.

Nahã Israelva'ea ra'yrava'ea rakykwepohara'g̃a, ei ga. G̃anag̃anani ko doze milve'g̃a. G̃a ndehe inainani Tupana'gapyrive'g̃a inog̃i Tupana'ga rembikwatijaripyra g̃ahã ko Tupana'gareheve'g̃a javo, ei ga.

He'yjuhuranuhũve'g̃a omongi tapy'ynhapitig̃ahivuhuva'ea

9Aerẽ ji hepiagi he'yjuhuranuhũve'g̃a yvyakotyve'g̃a. Ndahepiapavi ji g̃a. A'ereki g̃a he'yjuhu ranuhũ. G̃a nduripei ogwyogwyripeve'g̃a hugwi nhaporemo. G̃a nduripei gwe'ygwe'yja'g̃a hugwi nhaporemo no. Ojipe'g̃a hugwi nhaporemo g̃a nduripei no. Kiroki g̃a ojoatyatyvi g̃anhi'ig̃a – g̃a hugwiugwi nhaporemo g̃a nduripei no. Kiro g̃a ami ga'apykavareheve'ga apykava rovai pyteri pe aheruvihavuhuhete'ga rovai pyteri pe. Cordeiro'jave'ga rovai pyteri pe g̃a ami no. Omongi g̃a opipukuhuva'ea tapy'ynhapitig̃ahivuhuva'ea. Gwereko g̃a pindova rova opo pe.

10Hahyahi g̃anhi'ig̃a g̃a erame:

—Tupana'ga nhanderuvihavuhuhete'ga oapy oapykava rehe aheruvihavuhuhetero.

Gaha cordeiro'jave'ga pavẽi,

g̃ahã jate omombo hete nhanderekote'varuhua nhande hugwi

nhande mombyryva avuirama nhande rerua avo yvagi pe.

Nurã nhande g̃a mbohetei, ei g̃a.

11Kiro Tupana'gapyrive'g̃a nhaporemo g̃a ami ga'apykava atimambava huvihavuhu'g̃a atimambava no quatrove'g̃a atimambava no. Tupana'gapyrive'g̃a nhinog̃i upa ojovapyvo yvya rehe ga'apykava rovai pyteri pe ga mboheteavo Tupana'ga ko nhanderuvihavuhuhete'ga javo. 12A'ero g̃a ei:

—Na tuhẽ! Amém!

Tohoryory ti Tupana'ga nhanderuvihavuhuhete'ga.

Gaha ti timboukwaha hete tikatu hete ti ga javo.

Gaha ti tokwaha hete onhimombaragwahava.

Ga pe ti xa'e: Ndepyry hete nde ore pokoga.

Gaha ti timbohete.

Gaha ti toko nhanderuvihavuhuhete'ga.

Gaha ti tipopoaka hete.

Na tuhẽ ti nhanderuvihavuhuhete'ga toko avuirama nehẽ.

Na tuhẽ! Amém! ei Tupana'gapyrive'g̃a Tupana'ga mombe'gwovo.

13Kiro huvihavuhu'g̃a nde'yja'ga ei ji ve:

—Ma'g̃a po g̃a – kiroki g̃a omongi opipukuhuva'ea tapy'ynhapitig̃ahivuhuva'ea? Ma hugwi g̃a nduri? ei ga.

14—A'ero ji ei ga pe: Ji ndakwahavi. Ndehe erekwaha huvihavuhuro. Emombe'u ti ji ve a'ea, a'e ji.

Imombe'gwovo ga ei ji ve:

—G̃a pe hahy hete ranuhũ raikwehe. Hahyhetea hugwi g̃a nduri. Cordeiro'jave'ga rehe g̃a jikohetei. Ga ojijukauka heka'voguka gwekoa omanomo g̃a ndepyga tamombo ti ji g̃andekote'varuhua g̃a hugwi g̃a mombyryva javo. G̃a ndepyga ga gwekoa reka'vogukaro g̃waramo g̃apira tig̃ahivuhuro kiro. A'ereki g̃a ojiko hete ga rehe okokatuavo herovia ga manorame g̃a ndepyga g̃a mombyryva, ei huvihavuhu'ga imombe'gwovo.

15Nurã g̃a ndekoi Tupana'ga rovai pyteri pe

ga apygame oapykava rehe aheruvihavuhuhetero.

Ypytunimo g̃a ndekoi ganhi'ig̃a rupi garonga pype gambohetehava pype arimo no.

A'ero ti ga ruvi g̃apyteri pe g̃a a'nguavo nehẽ, ei huvihavuhu'ga.

16Ty'ara ti ndojukaa'javi g̃a nehẽ.

Ndoygweja'javi ti g̃a nehẽ.

Ndopo'rua'javi ti g̃a kwarahyahiva nehẽ.

Nombohakuvygukara'javi ti ga g̃a pe nehẽ no, ei huvihavuhu'ga.

17A'ereki cordeiro'jave'ga gwepia katu hete g̃a

okovo ga'apykavareheve'ga rovai pyteri pe aheruvihavuhuhete'ga rovai pyteri pe.

Ojikwahavuka ti ga g̃a pe nehẽ.

Nahã ti ga g̃a mongoi avuirama Tupana'ga pyri nehẽ, ei huvihavuhu'ga.

Gakwahava pe ji ei:

O'u g̃a yhypyryva ahemongohava.

A'ero g̃a ndekoi avuirama Tupana'ga pyri, ei huvihavuhu'ga.

Tupana'ga ti ihypavi g̃andeahya g̃andeakwara hugwi nehẽ.

Ndojehe'oa'javi ti g̃a nehẽ.

A'ero ti g̃a ndokoveveuhua'javi nehẽ, ei huvihavuhu'ga ji ve.

Tupanaʼga nhiʼig̃a

© 1996, Wycliffe Bible Translators, Inc. All rights reserved. More Info | Version Index