Search form

Hechos 1

Qoỹ'axát'aguet da' qoỹan so' Espíritu Santo

1'Am ñauotaxaua ỹaqáỹa Teófilo, jaso' 'uáichiiñi ỹide sedelégue ỹima jen' ỹí'etpi ca'li so' Jesús qataxa na'me lapaxaguenataxanaxacpi jeso' táchiiñi da'me d'onataxan, 2cha ỹivíd'a so' nolo' ca'li taiỹi da' piỹem. Chan'eesa ca'li maliaxa sa taiỹi jeso'me da'me piỹem, qana'chi ỹiỹotai'ỹalo saua' lamaxa's, qana'chi ỹapaxaguenque ga'me l'onataxanaxa'j, chiỹaqaỹi qa'en so' Espíritu Santo. 3Ca'li ỹim da' leleuaxa, qana'chi so' Jesús ỹitaxa naloxonalo saua' lamaxa's. Qana'chi coovlo saua' cuarenta noloqo'te da' naloxóotac. Da'me naloxónaxac ỹichoxot jeso'me da' 'eesása da'me nec'alétaiỹi. Qana'chi so'me ỹ'axátetapeema saa'me da' l'onataxanaxac ñi' Dios 'me ỹimata'a'téna.

4Joca'li maliaxa huetaavlo saua' lamaxa's, qana'chi so' Jesús huaqatalo saa'me da' sa quéd'ai qomle di' noic let'ádaic Jerusalén. 'Enaaco':

—'Anpogoxóinỹi'ỹi' qomle ga'me ỹ'axátetac ñi' ỹit'a Dios da' 'ami ỹanema, ga'me sóxote 'ami sichoxotétapeema. 5Qá'a 'eesa so' Juan dachiláxanataxanỹi na' noxop, qaláxasa naua' noloqo'te laqáỹa' nataq'en 'ami qonachiláxanỹilo ga' Espíritu Santo.

So' Jesús taiỹi da' piỹem

6Joca'li maliaxa huetaavlo so' Jesús saa'me, qana'chi ỹinatétr'ac, 'enapega'to':

—'Am qadesaliaxanec, ¿qo'li na'chína naỹi na' naloqtenec da' ỹitaxa 'aviỹotái'ỹa na' lec'óqo'tepi so' Israel, qaidi sa huet'ot da' lamaxasóxonaxac jen' Roma lé'ecpi?

7Qana'chi so' Jesús 'enaaco':

—'Ami sa 'te 'ami qoỹanómaxanaxanque ga' nolo' 'uootaxa ga'me naloqtenec da' 'uo ga' ỹí'et ñi' qadet'a, qá'a na'chiñíta ñi'me 'me 'uo da' 'enec da' 'uo ga' ỹí'et. 8Qaláxasa qomle 'ami nivitalo ga' Espíritu Santo, qaama'le 'auacoñiiỹet qomle ga' nañoqtaxanaxac, qataxa qaidi 'oquiỹot da' jaỹim 'au'axáchii, 'au'aqtaxañiim na'me néta'ña na' Jerusalén, qataxa na'me néta'ña di' 'aléua Judea qataxa di' Samaria, qataxa cha ỹivid'alo naua' lail jen' 'aléua.

9Joca'li ỹim da' ỹ'axátetac dójo' so' Jesús, qana'chi ỹilóchidisee'megue saa'me joca'li naỹoséguem da' qoỹaueegue da' piỹem. Qataxa janac so' ló'oc, qana'chi táaue. Huá'a, qana'chi pal. 10Qaa'le saa'me ỹilóchidisee'megue joca'li so' Jesús 'me taiỹi da' piỹem, huá'a, qana'chi ỹ'aalátr'eque saua' dos siỹaxa'u pagaxaiqa naua' louo 'me naloxonalo saa'me. 11Qaa'le 'enapega't saa'me:

—'Ami Galilea lase', ¿tá'nooqo'chi 'auloit'ot na' piỹem? Sójo' Jesús 'me 'ami chiỹoqotoovlo da' taiỹi da' piỹem, so'me n'iỹílaq qomle. Ga'me l'iỹílaxasoxoc ỹitaxa 'ená'am qomle dójo' ladíquiaxac 'me 'auañíichiỹi.

Qoỹilotelégue so' Matías da' qoỹaalégue da' l'onataxanaxac so' Judas

12Qaama'le saa'me quéd'ai jeso' qasoxonaxa 'me nanaqa' jan' 'olívo lichidic, qana'chi v'iỹílaxade'uo di' Jerusalén. 'Me lesequét'a, qá'a na'chidíta 'me loiquiaqa' da' neuoxoc di' nolo' 'me mataxaqui. 13Ca'li ỹivídeda'uo di' noic let'ádaic, qana'chi huenódisee'mec ga' p'áseguem ga' 'emec 'me huétrapega. Qana'chi huo'oi saa'me Pedro, Jacobo, Juan, Andrés, Felipe, Tomás, Bartolomé, Mateo qataxa so' Jacobo 'me Alfeo lec'óxot, qataxa so' Simón 'me huétaaue na' judiopi 'me sétaaque da' ỹ'odáiỹi jen' Roma lé'ecpi, qataxa so' Judas 'me lanogaxaua so' Jacobo. 14Ỹiméda saa'me qana'chi 'eeta't da' ỹimetapega'salo da' netame'n, huétrapeeuo nataq'en saua' lanogaxa'u so' Jesús, qataxa jaso' lat'e María, qataxa jaso' laỹipi ỹauodipi.

15Saa'me noloqo'te, qana'chi so' Pedro nichaatáaue so' laỹi 'amaqténataxanaxaicpi 'me sega' ỹóvi' ga' ciento veinte siỹaxadipi. Qana'chi 'enapéga, 'enaaco':

16—'Ami ỹaqáỹa', ỹátaqta ỹipaisaỹi joca'li da' l'aqtac so' Espíritu Santo 'me nedétañi ca'li dosóoue so' net'a David, da' ỹ'axát'a so' Judas so'me lasoxola' joca'li so'me ỹaconé'uo da' qoỹicoñi' so' Jesús. 17Qá'a so' Judas mai'chi qadaqáỹa qataxa qadecochaxaua da'me qad'onataxanaxac. 18Qaláxasa so'me ca'li jec, qaama'le neuodéna so' 'aléua, ỹiseeténec jaso' laso'vi so' Jesús joca'li ỹimen. Ca'li ỹim, qana'chi chiỹaqséguem, ỹidóchiiñi na' laqaic, qana'chi depoqóỹi, qana'chi laga't naua' laili's. 19Joca'li ỹaỹáten dójo' jen'me siỹaxadipi 'me néta'ña di' Jerusalén, qana'chi ỹanec so'me 'aléua da' lenaxat n'ónaxa 'me laso'vi jaso' netauo', naua' mai'chi l'aqtaqa Acéldama. 20Qá'a naua' n'aqtaqa 'me nedetalóo'te jan' nede lenaxat Nalacpi, nedétañi da' 'enaac:

Ga' l'emec ga'me ỹátaqta tóchiỹi,

qataxa qaỹa 'te nétaaue.

Qataxa di' laqáỹa 'enaac:

'Uo qomle ga' talégue qoỹin da' l'onataxanaxac.

21Naỹi seuéna' naua' maliaxa huo'oi qo'mi quetaavlo, naa'me chi'ena da' qo'mi sa ỹiỹotréegue ca'li maliaxa qo'mi huetaavlo so' qadesaliaxanec Jesús, 22chiỹoqóchii'ña so'me ca'li ỹímta nachiláxan so'me so' Juan, qataxa cha ỹivíde'ta ca'li taiỹi da' piỹem so'me. Chan'eesa n'óota naa'me da' 'uo ga' qo'mi huaxaavlo, qaidi nataq'en ỹ'axat da' sóxote nec'aliséguem so'me.

23Qaama'le qoỹiquetelóo'te saua' dos jeso'me siỹaxadipi: Matías qataxa so' José 'me lenaqa'te laqáỹa' daua' Barsabás qataxa Justo. 24Qana'chi qonetameelóo'te saa'me, qoỹinaac:

—'Am qadesaliaxanec, 'am 'me 'auaỹáten ỹima jan' liquidiaqte na' siỹaxadipi, ỹa 'aualoxon ga' 'oonolec naua' dos ga'me 'aulotelégue, 25qaidi nalégue da' l'onataxanaxac so' Judas 'me ỹiguem ỹasouaxat da' loic. Qana'chi so'me taiỹi qoỹin da' lepagaxat lasoxoc.

26Qana'chi saa'me qonalitelóo'te; so' Matías na'chiso talégue. Huá'a, qana'chi jeso'me huaxaavlo saa'me once namaxa's.

Nuevo Testamento Pilagá

© 1993 Sociedad Bíblica Argentina

More Info | Version Index