Search form

Hechos 10

So' Pedro qataxa so' Cornelio

1Di'me noic Cesarea na'chi néta'ña so' siỹaxaua, lenaxat Cornelio. So'me let'a na' huataxanaq, qana'chi ỹilotalégue so'me cien huataxanaq 'me qoỹimatá'ac chiỹaqa'ague da' 'aléua Italia. 2So'me siỹaxaua qataxa ỹima so' lec'óqo'tepi ỹátaqta ỹa'uo ñi' Dios qataxa d'oỹa jiñi'me. Nataq'en ỹátaqta jalcote jañi' laicaua da' ỹáatapegooue da' lecochiỹa na' judiopi qataxa na'chi 'eeta't da' netaméetapecot ñi' Dios. 3'Uo so' nolo' cana'le dasíchiiñi jaso' c'atena, qana'chi so'me 'uo so' leuoqtaxanaxac: Ỹila'aguet so' namaxasec piỹem lé'ec da' chimaxatá'uo ga' huét'a so'me, qana'chi 'enaaco':

—¡'Am Cornelio!

4Ca'li so'me ỹilo'ot so'me namaxasec piỹem lé'ec, qaláxasa ỹátaqta dó'i. Qana'chi ỹinatetaco', 'enaac:

—'Am ỹasoxola', ¿jái'chi ga'me?

Chan'eesa so'me namaxasec piỹem lé'ec 'enapego' jeso'me 'enaac:

—Ñi'me Dios ỹátaqta ỹiỹamaxadéeta da' 'antamnaxac qataxa da'me 'adoq'oỹaqtaxanaxac da' 'alcochiỹa na'me 'uo da' leuénaxanaxa. 5'Auauo'oi qomle gaua' 'adamaxa's da' ỹic'ádeta di' noic Jope, da' qaidi ỹ'iidá'a ñi' lenaxat Simón, da' lenaxat laqáỹa Pedro. 6Jiñi'me néta'ña di' l'acháqa' ñi' lenaqteua Simón, síiỹac ló'oc ló'o, di' l'acháqa' net'ot so' loxogue jaso' huaxai. Jiñi'me 'am ỹ'axátem qomle ga' 'éeta ga'me 'aué'et.

7Joca'li jec so' namaxasec piỹem lé'ec 'me dosétac, qana'chi so' Cornelio ỹiỹáxanee'galo saua' dos saua' lamaxa's qataxa so' 'oonolec nesoxonec 'me nataq'en quétapegue' ñi' Dios qataxa ỹátaqta lepé'et. 8Qana'chi ỹátaqta d'aqtaxáat'em so'me ỹima da'me lauanáxanaxac. Ỹim, qana'chi ỹamaxaguelo di' Jope.

9Qana'chi so' nolo' laqáỹa, ca'li sóxote quéte' saa'me, ma'le ỹauoqodá'uo so' noic Jope, qana'chi so' Pedro tasee'mo' ga' p'áseguem so' 'emec da' netamen. Qaa'le sóxote ỹamtaa'le laiñi so'me nolo'. 10Qana'chi jeso'me ỹátaqta 'uo da' loqouáxa, qana'chi diaqta't lauel da' dequé'e. Qaláxasa maliaxa qoỹ'étetac so' jaloq, chan'eesa so'me 'uo so' lauanáxanaxac. 11Ỹilo'ot di' piỹem da' 'ená'am da' qoỹ'ouáteuo, qana'chi ỹauaat'eguet so' 'ená'am na' huáloq let'ádaic qoỹaxada'salo naua' cuatro laséenaqa da' naỹá'ña jen' 'aléua. 12Jeso'me huétaỹi na' ỹodapecachi síiỹacpi: 'uo na' cuatro naua' lapia'te, qataxa na' naqalec, qataxa na' máỹo'. 13Qana'chi so'me demachíỹa so' n'aqtac 'enaac:

—'Am Pedro, 'anchaachiñi, 'aua'uo ga' 'aualaat jen'me, qana'chi 'aualic.

14Qaláxasa so' Pedro 'enaaco':

—'Ena't, 'am ỹasoxola', jaỹim ỹátaqta sa sauana da' salic ga' qoỹinapéga paanaxadaic, 'uootaxa ga'me sa qoỹisetaxat da' qoỹalic.

15Qaláxasa so'me n'aqtac ỹitaxa v'iỹílaxalégue da' 'enaac:

—Ga'me sóxote liỹóisec ñi' Dios, ga'me 'ená'te 'auenapéga da' paanaxadaic.

16Jeso'me n'aqtac tres da' qov'iỹílaxalégue, qana'chi ỹitaxa v'iỹílaxague da' piỹem. 17Joca'li maliaxa hueenaté'ta so' Pedro da' ga'me náaue so' lauanáxanaxac, qana'chi ma'le nivídeda'uo so' som saua' siỹaxa'u 'me lamaxa's so' Cornelio 'me dachimaqtaxáatraaque ga' l'acháqa' ga' Simón 'me síiỹac ló'oc ló'o. 18Joca'li ỹivídedauo, qana'chi ỹátaqta necosaxade'n da' nataxáatraaque da' 'uootaxa huét'a di' n'acháqa' ga' lenaxat Simón, da' lenaxat laqáỹa Pedro. 19Qaa'le so' Pedro maliaxa hueenaté'ta so'me lauanáxanaxac, chan'eesa so' Espíritu Santo 'enapego' so'me, 'enaac:

—Huo'oi daua' tres siỹaxa'u 'am nimitétraaque. 20'Oñíseguem qomle, 'anenóchiñi, qana'chi 'oqueelo daa'me. 'Ená'te 'uo ga' 'auega, qá'a daa'me mai'chi ỹamaxa's.

21Chan'eesa so' Pedro ỹic'áchi'ña ga' huétr'a saua' lamaxa's so' Cornelio, qana'chi 'enapegalo, 'enaac:

—Naqaỹim 'me jaỹim 'anmichíitaaque. ¿Jái'chogamaxa da' 'uo da' 'adeuoxoquii?

22Qana'chi saa'me ỹ'a'to':

—Qo'mi lamaxa's ñi' huataxanaq let'a, lenaxat Cornelio. Ñi'me n'óota da' lasoxoc qataxa ỹátaqta d'oỹa ñi' Dios. Chan'eesa ỹima na' judiopi ỹátaqta 'uo da' 'enec qa'en qataxa loqopitaxat. 'Uo so' Dios lamaxasec piỹem lé'ec 'enapéga da' 'am namaxasóxona, da' qaidi 'auc'áta di' l'acháqa', qana'chi ñi'me 'am naquiáxana ga'me 'ad'aqtaxanaxac.

23Qana'chi so' Pedro ỹip'áxadeuo, qana'chi saa'me l'ochaqa't ga' huét'a so'me so' pí'ỹaq. So' nolo' laqáỹa, qana'chi so' Pedro 'equeelo saa'me qataxa huo'oi saua' liquiáxa'u so' 'amaqténataxanaxaicpi 'me ná'ña di' Jope.

24So' nolo' laqáỹa, qana'chi qoỹivíta di' Cesarea di'me néta'ña so' Cornelio deuataxáatac, qataxa ỹima so'me mai'chi laỹi 'me ỹalquet'aguet, qataxa ỹima na'me nauotaxau'pi 'me ỹip'iquínaxanaxan joca'li. 25Joca'li so' Pedro ỹivída'uo ga' 'emec, qana'chi so' Cornelio ca'aguet so'me, qana'chi ỹisocoto naua' liliictel da' sétaaque da' netamenot. 26Qaláxasa so' Pedro ỹañíseguem so'me, qana'chi 'enapéga, 'enaac:

—'Anchaachiñi qomle, qá'a jaỹim na'chi'am sená'am, qo'mi siỹaxa'u.

27Qana'chi dosétapegue' so'me, na'chi p'áuo so' Pedro, qana'chi ỹiláaue so'me jalcote siỹaxadipi 'me dasot'a't. 28Chan'eesa so' Pedro 'enapego' so'me dasot'a't, 'enaac:

—'Ami 'auaỹáchiñii na' judío lé'ecpi ỹasouaxat da' l'amaqténataxanaxac, qana'chi ỹátaqta sa qoỹaseneguet da' ỹaleeguet ga' sa laỹi, 'uootaxa da' 'chi táaue ga' l'emec ga'me. Qaláxasa ñi' Dios jaỹim ỹapaxaguenec da' qaỹa 'te ga' sematá'ac da' paanaxadaic, 'uootaxa sa qoỹiseteguet. 29Chan'eesa ỹátaqta qaỹa 'te ga' sega da' ñanac da'me jaỹim 'aviỹáxañiỹa. Chan'eesa naỹi jaỹim sétaaque da' saỹáten ga'me 'uo da' jaỹim 'aviỹáxañiỹa.

30Qana'chi so' Cornelio 'enaaco':

—Naỹi ma'le ỹivi't naua' cuatro noloqo'te da' 'ená'am di' ná'a jañi' c'atena so'me jaỹim souét'a na' ỹ'acháqa', ñoqouaqtela't qataxa ñitaméetac. Qana'chi jaỹim naloxóna so' siỹaxaua saua' leuo ỹátaqta ỹaqséle'j. 31Qataxa jaỹim 'enapéga, 'enaac: “'Am Cornelio, ñi' Dios ma'le demachíỹa da' 'antamnaxac, qataxa hueenata da'me 'adoq'oỹaqtaxanaxac da' 'alcochítapega jen'me 'uo da' leuénaxanaxa. 32Naỹi 'aua'uo qomle ga' 'auamaxa di' noic Jope, qaidi ỹ'iiná'a ñi' Simón, da' lenaxat laqáỹa Pedro. Ñi'me huét'a di' l'acháqa' ñi' lenaqteua Simón, síiỹac ló'oc ló'o. Ñi'me net'ot na' loxogue jaso' huaxai di' l'acháqa'. Ñi'me qomle nivíta 'am, qana'chi 'am d'aqtaxanem.” 33Chan'eesa ỹátaqta sa ñiỹáloxoden da' 'am samaxasóxona. Qaláxasa n'óota naỹi da'me sóxote 'anividi't. Naỹi qo'mi souqat'éna, sasoqóta'uo ñi' qadasoxola' Dios, qá'a qo'mi sétaaque da' ñaquiáxanaxa ỹima ga'me 'am ỹamaxalégue jiñi'me da' qo'mi 'au'axatema.

Da' l'aqtaxanaxac so' Pedro ca'li huá'a di' l'acháqa' so' Cornelio

34Huá'a, qana'chi so' Pedro d'aqtaxan, 'enaac:

—Naỹi jaỹim saỹáten da' ñi' Dios da' 'eesása da' qaỹa 'te lepagaxat ỹima na' siỹaxadipi. 35Na'chidáta da' ñi'me ỹátaqta ỹiỹamaxadéeta gamachaqaiga jen'me ỹodapecachi siỹaxadipi da' 'uootaxa ỹátaqta d'oỹa ñi'me qataxa ỹí'et ga' ỹiỹamqáchiiñi. 36Ñi' Dios namaxa josii'chi da' l'aqtac so' lec'óqo'tepi so' Israel, da'me l'aqtac 'me ỹí'et da' n'emáxadic, chiỹaqaỹi so' Jesucristo so'me lasoxola' ỹima na' siỹaxadipi. 37'Ami 'auaỹáchiñiita ỹima da'me huá'a jen' 'aléua 'me l'acháqa' na' judiopi, chiỹoqóchii'ña josii'chi di' Galilea, ca'li so' Juan ma'le ỹimat da' l'aqtaxanaxac qataxa da' nachiláxatac na' siỹaxadipi. 38Qataxa 'ami 'auaỹáchiñiita ỹima da' 'éeta ñi'me Dios da' ỹanem joca'li so' Jesús 'me Nazaret lé'ec da' lañoqtaxanaxac so' Espíritu Santo, qataxa da' 'éeta ca'li so'me da' ỹiuótac na' ỹanem da' ỹiỹamqáchiiñi ỹima na' siỹaxadipi 'me huétaaue da' le'queténataxanaxac so' paiỹac qadó'o. Da'me ỹí'et, qá'a ñi' Dios huet'aguet so'me. 39Qo'mi 'me na'chiqo'mi sauanáqchiỹi ỹima jen'me ỹí'etpi so' Jesús ca'li coleetapeelégue di' 'aléua Judea qataxa di'me noic let'ádaic Jerusalén. Joca'li ỹim, qana'chi so'me qoỹalaat, qana'chi qoỹip'iisée'mec jaso' sodooso. 40Qaláxasa ñi' Dios ỹitaxa nec'alaxadiséguem jeso'me ca'li ỹivi't saua' tres noloqo'te, qataxa qo'mi naloxoneeta. 41Jeso'me sa ỹima da' naloxoneguet na' siỹaxadipi, na'chiqométa da' ñauanáxai'. Qá'a ñi' Dios qo'mi ỹilotelóo'te josii'chi, da' qaidi qo'mi s'axátaq da'me qadauanáxanaxac. Qo'mi ỹátaqta qadiqui'ỹáxaua so'me qataxa qanỹómaxaua ca'li ma'le sóxote ỹitaxa nec'aliséguem qoỹin. 42Qana'chi so'me qo'mi ỹamaxalóo'te da' s'aqtaxanaxam ỹima na' siỹaxadipi, da' s'axátaq da' ñi' Dios na'chiso so'me da' 'en nimit qomle na' loicpi na'me nec'alétaiỹi qataxa na' sóxote ỹileu. 43Nataq'en sóxote joca'li ỹima so'me huá'au l'aqtáxanaxanecpi ñi' Dios ỹ'axátet'aguet so' Jesús, da' ga' ỹ'amaqten so'me, qana'chi qoỹapalaxa't naua' loico, chiỹaqaỹi da' lenaxat so'me.

Ỹaconeguet so' Espíritu Santo na'me sa judiopi

44Maliaxa dosétac joca'li so' Pedro, qana'chi janac so' Espíritu Santo, qana'chi ta'nỹet ỹima so' naquiáxatapega da' l'aqtaxanaxac. 45Qana'chi saa'me 'amaqténataxanaxaiqa judío lase' 'me náictapee'to so' Pedro, saa'me ỹátaqta 'uo da' l'aalaxa'j da' so' Espíritu Santo nataq'en qoỹanem na'me sa judío lé'ecpi. 46Qá'a ỹasouaxat da' demachítrapega jen'me da' dosiilo naua' n'aqtaqa 'me sa qoỹauanapegalo, qataxa ỹi'ỹoxodéetac ñi' Dios. 47Qana'chi so' Pedro 'enaaco':

—¿Qo'li ỹañoxot taa'le qoỹ'iláxatem da' 'uootaxa qonachiláxan jénjo' siỹaxadipi 'me ta'nỹet so' Espíritu Santo, 'ená'am da' qo'mi ca'li?

48Qana'chi damaxasoxolégue da' qonachiláxan so'me siỹaxadipi, qodachiláxanataxana da' lenaxat so' Jesucristo. Ỹim, qana'chi qonachoxodenot so' Pedro da' cada'acolec hua'adi saua' noloqo'te da' huétaaue jeso'me.

Nuevo Testamento Pilagá

© 1993 Sociedad Bíblica Argentina

More Info | Version Index