Search form

Hechos 12

Da' nalaataguec so' Jacobo qataxa da' necointáguec so' Pedro

1Jesaa'me noloqo'te, qana'chi so' net'a Herodes damaxasoxolégue da' 'uo ga' qoỹaconé'uo na' 'amaqténataxanaxaicpi. 2Chan'eesa damaxasoxolégue da' qoỹalaat so' Jacobo so'me laqáỹa so' Juan, qoỹidó'oc so' legaxanaxat. 3Qaa'le so'me joca'li ỹilá'a da' na' judiopi ỹátaqta ỹiỹamaxadéeta da'me, qana'chi nataq'en da' damaxasoxolégue da' qoỹicoñi' so' Pedro. Qaa'le da'me huetoovlo saua' noloqo'te da' qoỹalic jan' pan 'me qaỹa 'te lale'gue. 4Joca'li sóxote qoỹaconé'uo so' Pedro, qana'chi so' Herodes ỹanáaue so'me jaso' cointáxanaxaqui. Qana'chi 'en nouatoqo't so' dieciseis huataxanaq, cuatro 'e'n naua' huaxaỹapega't, qá'a so'me sétaaque da' qomle ỹim so' nemáxac, qana'chi so' Pedro da' ỹaloxoneguet ỹima na' siỹaxadipi da' ỹalaat. 5Chan'eesa so' Pedro nétaaue jaso' necointáxanaxaqui ỹátaqta sa huosalégue. Qaláxasa na' 'amaqténataxanaxaicpi ỹátaqta 'uo da' l'añaxac da' quet'ot da' netameetapecot ñi' Dios, da' netameetapeelégue so'me.

Ñi' Dios huosoi'isop qa'en so' Pedro jaso' necointáxanaxaqui

6Jeso'me pí'ỹaq 'me huáaue jeso' nolo' da' so' Herodes sétaaque da' ỹaloxoneguet na' siỹaxadipi so' Pedro. Qana'chi so' Pedro d'ochitaco', huetañiilo saua' dos huataxanaxalase', qoỹicoñidét'aque saua' dos cadéna, qataxa saua' huataxanaxalase' laqáỹa' nauáatraa'uet so' som jaso' necointáxanaxaqui. 7Qana'chi nepelaqala't da' 'uo so' piỹem lé'ec lamaxasec ñi' qadasoxola', qana'chi ỹátaqta ỹ'oqóchiiñi na' lauel jaso' necointáxanaxaqui. Qana'chi so'me namaxasec ỹisói'uo na' lai so' Pedro da' noqotoxon. Qana'chi 'enaaco':

—'Oñíseguem, 'am 'engue.

Qana'chi saua' leque'te saua' loua' so' Pedro n'áqadañi. 8Chan'eesa so' namaxasec 'enapego' so'me, 'enaac:

—'Ansaat qomle, qana'chi 'auaadíñi gaua' 'adapela'te.

Qana'chi so' Pedro niỹamaxat, qana'chi so' namaxasec 'enapego' so'me, 'enaac:

—'Alcoxósoxonỹi na' 'adapoto, qana'chi jaỹim 'oquegue.

9Qana'chi so' Pedro ỹinoxonéegue, quétapegue' so' namaxasec. Qaláxasa sa ỹaỹáten da' 'eesása da'me, 'uootaxa sa 'eesa. Qá'a so'me 'ená'am qa'en da' 'uootaxa 'chi lauanáxanaxac da'me dójo'. 10Qaláxasa joca'li napacdalégue ga' huétr'a saua' 'uáichidiñi nivitáxanaxanqa qataxa huosá'ai saua' laqáỹa', cha ỹivídetrai'ỹa so' som 'me ỹima'a't laicaua 'me p'aiỹet so' nadic. Qana'chi mai'chi n'ouáteegue so' som, qana'chi ỹinoxodéegue, qana'chi quéte'. Joca'li napacdalégue ga' 'oonolec nadic, qana'chi so' namaxasec piỹem lé'ec cá'ai, nedoqtéeteegue so'me. 11Huá'a, qana'chi so' Pedro ỹímta ma'le ỹaỹáten da'me dójo', qana'chi 'enaaco':

—Naỹi ma'le saỹáteeta da' 'eesa da'me dójo'. Ñi' qadasoxola' namaq so' lamaxasec da' jaỹim ỹisoi'isop ñi' Herodes qataxa ỹima jen'me sétaaque da' jaỹim 'éet'ec na'me judiopi.

12Qana'chi hueenaté'ta dójo' so' Pedro, qana'chi ỹic'áta ga' l'acháqa' jaso' María 'me lat'e so' Juan, da' lenaxat laqáỹa Marcos. So'me na'chi huét'a so' jalcote siỹaxadipi dasot'a't, netaméetac. 13Joca'li ma'le ỹi'uaxáatapee'uo so' som so' soxoc, qana'chi jaso' q'añole, lenaxat Rode, ỹic'átee'ga da' 'chi ỹic'aten so'me. 14Qaláxasa ca'li ỹaateton da' laviliỹáxac so' Pedro, qana'chi sa ỹ'ouáteegue so' som, qá'a ỹágueegue da' netónaxac. Qana'chi naqalégaqa'uo ga' p'áuo da' talaxanec so' Pedro da' huetaa'uet so' som. 15Qana'chi qoỹíitapega jaso'me, qoỹinaac:

—¡Qa'chi 'uo' da'me 'am huét'ac!

Qaláxasa jaso'me ỹátaqta sa ỹ'aiden da' naqaiso. Qaláxasa so'me 'enapega'to':

—¡'Axai', sa naqaida; 'chi lepaqal jooda da' naloxon!

16Qaláxasa so' Pedro 'eesama'le da' ỹi'uaxáatapee'uo so' som. Joca'li qoỹ'ouáteegue so' som, qana'chi ỹátaqta dó'i so'me dasot'a't. 17Qaláxasa jeso'me ỹauen na' louaq jeso'me siỹaxadipi qaidi ỹ'imáqta. Ỹim, qana'chi ỹ'axat da'me 'éeta ñi' qadasoxola' da' naqatee'guesop so'me jañi' cointáxanaxaqui. Ỹim, qana'chi 'enapego' so'me siỹaxadipi, 'enaaco':

—'Au'axáchiim qomle ỹima dójo' ga' Jacobo qataxa ỹima na' qadaỹi.

Chan'eesa ca'li ỹim so'me, qana'chi ỹic'áta ga' 'aléua laqáỹa.

18Ca'li ma'le ỹ'oxoñi, qana'chi ỹátaqta sa ỹaỹáten ga' 'éeta so'me huataxanaq, qá'a sa qonóma ga' 'éeta so' Pedro. 19Qana'chi so' Herodes damaxasoxolégue da' qonimitáaque so'me. Joca'li sa qoỹauana, qana'chi ỹachimaxatétapega so'me huataxanaq 'me nivitáxanaxanec. Ỹim, qana'chi damaxasoxolégue so'me da' ỹima qoỹalaat. Ca'li ỹim dójo', qana'chi so' Herodes cá'ai di' Judea da' ỹic'áta di' Cesarea.

Da' leleuaxa so' Herodes

20Qaa'le so' Herodes ỹátaqta dalemataỹa na'me siỹaxadipi 'me néta'ña di' Tiro qataxa di' Sidón. Qaláxasa so'me siỹaxadipi joca'li ỹima'a't da' sétaaque qoỹic'áte'uo so'me da' qodosápegue'. Qaláxasa qoỹi'uáuaxañi da' qodosápegue' so' Blasto so'me net'a 'me lecochaxaua so' Herodes, da' qaidi so'me dosápegue' so' net'a Herodes, qaidi ỹanem da' lelagaxadic so'me siỹaxadipi. Qá'a da'me liqui'ỹáxac so' siỹaxadipi na'chi ỹachiỹoxotapíi'ña di'me n'aléua so' net'a. 21Qana'chi so' Herodes ỹa'uo so' nolo' 'me lalóqo' qa'en da' janac so' siỹaxadipi. Joca'li ỹivíta so'me nolo', qana'chi so'me ỹaadíñi saua' leuo 'me lasoxoqui', qana'chi nánỹi jaso' nes'ónaxaqui da' net'a, qana'chi ỹa'uo so' losáxac. 22Chan'eesa na' siỹaxadipi ỹ'alqátaỹi, 'enaac:

—¡Nójo' siỹaxaua 'me dosétac sa 'te 'chi siỹaxaua, ñi'me 'ená'am na' nosáxaua paiỹac!

23Copát'a, qana'chi janac so' lamaxasec piỹem lé'ec ñi' qadasoxola', qana'chi ỹilhuaac qa'en so' Herodes, qá'a so'me sa ỹi'ỹoxoden ñi'me Dios. Qana'chi na' lailsec qochi'lpi ỹalic, cha ỹiléeta'ñi'.

24Qaláxasa da' l'aqtac ñi' Dios lamá'asa da' nichíctaiỹi qataxa qoỹ'axatema ỹiméda naua' lail jen' 'aléua.

25Joca'li ỹima't so' Bernabé qataxa so' Saulo da' l'onataxanaxa'j, qana'chi v'iỹíla', chiỹoqóchidi'ña di' Jerusalén, náictrapegue' so' Juan, da' lenaxat laqáỹa Marcos.

Nuevo Testamento Pilagá

© 1993 Sociedad Bíblica Argentina

More Info | Version Index