Search form

Hechos 15

So' nemáxac huá'a di' Jerusalén

1Jesaua' noloqo'te, qana'chi huo'oi saua' nivididi't siỹaxa'u chiỹoqoda'ague di' Judea da' ỹic'ádeta di' Antioquía. Qana'chi saa'me ỹapaxaguéet'ec na' 'amaqténataxanaxaicpi da' ga' sétaaque da' qonec'alaxatéegue, qana'chi ga'me ỹiuen da' qoỹa'uo ga' n'anaxaset na' ló'oc, qá'a da'me na'chi lamaxasóxonaxac so' Moisés. 2Qana'chi so' Pablo qataxa so' Bernabé noqolguétetapee'to saa'me, ỹátaqta let'ádaic da' necotaxa'j. Huá'a, qana'chi qoỹaconé'uo so' Pablo qataxa so' Bernabé qataxa qoỹauo'oi saua' laqáỹa'. Qana'chi qoỹamaxategue da' Jerusalén da' ỹic'ádeta qoỹi'n saua' Jesús lamaxa's qataxa saua' laqáỹa' lasoxola'te na' 'amaqténataxanaxaicpi 'me nétra'ña di'me noic, da' qaidi qodosápiỹi ga' ladic dójo'.

3Qana'chi so' 'amaqténataxanaxaicpi 'me néta'ña di' Antioquía ỹama' jesaa'me. Qana'chi da'me 'éque' saa'me, qana'chi tadelégue di' 'aléua Fenicia qataxa di' 'aléua Samaria. Qana'chi ỹ'axátetrac da' 'éeta jen'me sa judiopi da' ỹiguem da' toisec l'amaqténataxanaxac, qana'chi 'equegue ñi' Dios. Qana'chi ỹima na' 'amaqténataxanaxaicpi ỹátaqta 'uo da' lamaic, ỹasouaxat da'me lipí'ic.

4Ca'li ỹivídeda'uo so' Pablo qataxa so' Bernabé di' Jerusalén, qana'chi na' 'amaqténataxanaxaicpi qataxa saua' Jesús lamaxa's, qataxa saua' nasoxola'te ỹátaqta ỹoqochi'igueta saa'me. Qataxa saa'me ỹ'axátetrac ỹima jen'me ỹ'eteque ñi' Dios saa'me. 5Qaláxasa huo'oi saua' ỹalquétrauo na' fariseopi 'me 'amaqténataxanaxaiqa, saa'me nichaachidíñi, qana'chi 'enapega'to':

—Jen' 'amaqténataxanaxaicpi 'me sa judiopi, jen'me ỹiuen da' qoỹa'uo ga' n'anaxaset na' ló'oc, qataxa da' qoỹamaxalégue da' ỹí'et na' naqátaxacpi 'me chiỹoqo'ot so' Moisés.

6Chan'eesa saua' Jesús lamaxa's qataxa saua' laqáỹa' nasoxola'te ỹauóte so' letaxaỹaxa'j, da' qaidi qoỹiláaque ga' lasoxoc dójo'. 7Ca'li ma'le qaỹa'ague da' nosáxac, qana'chi so' Pedro nichaachiñi, qana'chi 'enaaco':

—'Ami ỹaqáỹa', 'ami 'auaỹáchiñii da' ñi' Dios jaỹim ỹilotelégue joca'li, da' 'ami ỹachiỹoxotetoovlo, da' qaidi jaỹim s'axátem da' 'ónaxaic qadipí'ic na' sa judiopi, da' qaidi d'amaqtenataxan. 8Qataxa ñi'me Dios 'me ỹaateton jan' niquidiaqte, qana'chi ỹaloxon jen'me ỹiỹamaxadéeta da' ỹanem so' Espíritu Santo, 'ená'am da' 'oñíita josii'chi. 9Ñi' Dios sa 'te qo'mi ỹiloỹilo, da'me ỹiỹoté'ta jen'me. Qá'a jiñi'me ỹiỹo jan' liquidiaqte jen'me, chiỹoqóchiỹi qa'en da' lip'iỹáxac. 10Chan'eesa naỹi 'ami, ¿tóoqo'chi 'auqolguíchiitac da'me ỹí'et ñi' Dios, qataxa 'aupolquiitapeelégue na' sa judiopi da' sa p'áteta 'me nataq'en qo'mi sa sañoxotaq da' ñipenaxaséguem, qataxa so'me huá'au qadapidiipi? 11Jaldáta da' s'amaqténaq da' qo'mi ñic'alaxáiỹi, sachíỹoxosoqchiỹi da' lecouagaqtaxanaxac so' qadasoxola' Jesús, qana'chi senqá'am jen'me.

12Huá'a, qana'chi ỹima jeso'me dasot'a't n'emáxañi. Qana'chi qonaquiáxanalo so' Bernabé qataxa so' Pablo da' ỹ'axátetrac na' n'anecpi qataxa na'me sa qoỹauanápiỹi da' ỹí'et ñi' Dios, ỹachiỹoxochichiilo saa'me da' huáaue qa'en jen'me sa judiopi. 13Joca'li ỹima't da' losáxa'j, qana'chi so' Jacobo dose, 'enaaco':

—'Ami ỹaqáỹa', ỹa 'anaquiáxañiỹa da' ỹ'aqtac: 14Ñi' Simón Pedro 'ami ỹ'axátetapeema da' 'éeta ñi' Dios ca'li ỹímta da' noq'oỹá'ac jen'me sa judiopi, qana'chi ỹilotelégue jen'me da' 'en lalémaxasetpi. 15Da'me dójo' ỹátaqta táchiỹi da'me l'aqtaxanaxac so' l'aqtáxanaxanecpi ñi' Dios 'me nedétañi, 'enaac:

16Qomle ỹim dójo', qana'chi jaỹim ñ'iỹílaq,

da' qaidi ỹitaxa ñiuaxaỹaxaséguem ñi' l'emec so' David 'me sóxote noláiñi;

qana'chi ỹitaxa ñ'oxoséguem ga'me maliaxa huót'ai,

17qaidi ỹima jen'me siỹaxadipi lai jaỹim nimitáaque 'me jaỹim nasoxola',

qataxa ỹima na'me ỹodapecachi siỹaxadipi 'me siỹáxana da' sétaaque ỹalémaxasetpi.

18'Éeta da' l'aqtac ñi' qadasoxola' 'me ỹ'axátet'a dójo' jocalia'cho'.

19Chan'eesa naỹi senapegalo 'ami da' 'ená'te 'anqueuóquiỹapega jen'me sa judiopi, 'me sóxote cá'ai da'me toisec l'amaqténataxanaxac, qana'chi 'equegue ñi' Dios. 20Jaldáta da' qo'mi samaxasáxa jaga' qadedíise jen'me, da' qaidi ỹaxañi da' ỹalic ga' nalic 'me sóxote qoỹanot ga' 'chi niquí'i n'onatac, qataxa sa 'te 'uo ga' nichíuatetapegue' jaga' sa loua, qataxa sa 'te ỹalic na' lapat ga' ỹichigoo'ue na' loqosot, qataxa ga' 'ouaxaic 'me sa huocodédeegue naua' letauo't, qataxa sa 'te ỹalic jan' netauo'. 21Qá'a da'me chiỹoqóchii'ña saua' 'uáudeegue 'uóidi 'uo joca'li na' siỹaxadipi 'me ỹ'axátet'ape naua' laqátaxaco so' Moisés 'me qoỹitaxaỹaxanaxáat'ape di' nolo' mataxaqui da' huáaue jen' lemáxaqui na' judiopi, qataxa nauójo' naqátaxaco sa ỹisiquiaxana'alo.

22Qana'chi saua' lamaxa's so' Jesús qataxa saua' nasoxola'te laqáỹa', qataxa ỹima na' 'amaqténataxanaxaicpi, 'uo da' leenataxac da' qoỹauo'oi gaua' qoỹacone'ualo jeso'me, qana'chi qoỹamaxategue da' Antioquía da' náicapee'to qoỹi'n so' Pablo qataxa so' Bernabé. Qana'chi qoỹaconé'uo so' Judas, da' lenaxat laqáỹa Barsabás, qataxa so' Silas. Saa'me ỹ'odíchiilo lasoxola'te na' laỹi. 23Qana'chi jesaa'me qoỹamaxaguelo jaso' nidíise 'me huetalégue da' n'aqtac, 'enaac:

“Qo'mi Jesús lamaxa's, qataxa naua' qadiquiáxa'u nasoxola'te, qataxa ỹima na' qadaỹi, qo'mi samaxasaxalo da' qadip'iỹénataxanaxac na' qadaỹi 'me sa judiopi, 'me néta'ña di' Antioquía, qataxa di' 'aléua Siria, qataxa di' Cilicia. 24Qá'a qo'mi sip'iquíaqtapeeguet da' 'uo na' siỹaxadipi da' chiỹaqa'ñína, da' sa qadamaxasec, da' ỹic'atalo 'ami da' sa 'ami ỹalémaxa't. Naua' l'aqtaxanaxaco jen'me ỹ'éte'uo da' sa 'auaỹáchiñii ga' 'oñíita, qataxa 'ami ỹamaxalóo'te da' 'auauóỹaaque ga' 'an'anaxasíchii, qataxa da' 'oquiỹiỹi na' laqátaxacpi so' Moisés. 25Chan'eesa ỹima da' senqáta siỹamaxadénaqta da' sauoqo'oi naa'me qadaqáỹa', qaidi 'ami ỹic'atalo, qataxa náictapee'to naua' qanauotaxa'u qadaqáỹa' Bernabé qataxa Pablo, 26naa'me qadaqáỹa' ỹátaqta nañaateguet ỹima da' lichic ỹasouaxat so' qadasoxola' Jesucristo. 27Chan'eesa naỹi 'ami samaxasaxalo na' Judas qataxa na' Silas. Naa'me 'me ỹátaqta 'ami d'aqtaxaat'ema qomle, 'ami ỹ'axátet'ema ỹima da'me qad'aqtac. 28Qá'a so' Espíritu Santo ỹátaqta ỹiỹamaxadéeta, qataxa qo'mi, qaỹa 'te laqáỹa da' 'ami sachaqalóo'te ga' sa nep'áteta, jaldáta da' sétaaque 'auaỹáchiñii da' 'eet'oi: 29'Ená'te 'aualíquii qomle na' lapat ga'me sóxote qoỹanot na' niquí'i 'chi n'onatac; qataxa 'ená'te 'aualíquii jan' netauo', qana'chi 'ená'am na' lapat na' síiỹac 'me ỹichigoo'ue na' loqosot, qataxa 'ená'te 'uo ga' nichíuatetapegue' jaga' sa loua. Qomle 'aupaquiitelóo'te da' 'av'íchii' naa'me, qana'chi ỹátaqta ỹiỹamqáchiiñi. 'Ónaxaic qomle da' 'adadíquiaxaquii.”

30Qaa'le ca'li ỹim da' qoỹacone'ualo da' qoỹama', qana'chi 'éque', tategue da' Antioquía. Ca'li sóxote ỹivididi't, qana'chi ỹima'a't na' 'amaqténataxanaxaicpi, qana'chi ỹaadéuo jaso' nidíise. 31Qana'chi joca'li qoỹitaxaỹaxanaxáatac jaso' nidíise, qana'chi so' 'amaqténataxanaxaicpi ỹátaqta mátac ỹasouaxat da' n'añaqtaguec. 32Qá'a so'me Judas qataxa so' Silas, saa'me nataq'en l'aqtáxanaxanqa ñi' Dios. Qana'chi saa'me ỹ'añaqte't qataxa huaqátetrapega so' 'amaqténataxanaxaicpi, ỹátaqta let'ádaic da' laqátaxa'j. 33Ca'li sóxote qaỹóxode' saua' noloqo'te, qana'chi so' 'amaqténataxanaxaicpi nip'iỹíitapee'to saa'me da' v'iỹílachi. Qana'chi qoỹanema da' ỹátaqta ỹachítreegue da' lamai'j, da' qaidi v'iỹílaxata saa'me so' namaxasóqo't. 34Qaláxasa so' Silas 'uo da' leenataxac da' qapiỹáñi. 35Qataxa so' Pablo qataxa so' Bernabé, saa'me qapidá'ña di' Antioquía. Qana'chi saa'me, nataq'en 'uo so' jalcote laỹi', queted'ot da' lapaxaguenataxanaxa'j da' ỹ'axátetrac da' l'aqtac so' qadasoxola'.

So' Pablo ỹitaxa 'ecot da' ỹ'axat da' n'aqtac

36'Uo so' nolo', qana'chi so' Pablo 'enapego' so' Bernabé, 'enaac:

—Ỹitaxa qolaq qomle da' sesapchaxa na' qad'amaqtenataxanaxau'pi 'me na'alo naua' noiqa 'me souqat'alo ca'li s'axátaqtac da' l'aqtac so' qadasoxola' Jesús, qaidi saỹátenaq da' qaỹa 'te 'uo.

37Qana'chi so' Bernabé sétaaque da' náicapegue' so' Juan Marcos. 38Qaláxasa so' Pablo sa ỹiỹamaxaden da' ỹitaxa qoỹauec so'me, qá'a sóxote ca'ai saa'me ca'li huéd'a di' Panfilia, qana'chi sa coovlo saa'me da' l'onataxanaxa'u. 39Qana'chi necotrápiỹi so'me, cha ỹivíd'a da' colaxaỹilo saa'me da' ladíquiaxa'j. Qana'chi so' Bernabé ỹauec so' Marcos, qana'chi huenóteuo da' taiỹi da' Chipre. 40Chan'eesa so' Pablo 'en liquiáxaua so' Silas. Ca'li ỹim da' ỹanot ñi' Dios so'me so' laỹi da' qaidi netela, qana'chi jec. 41Qana'chi talégue di' Siria qataxa di' Cilicia, qana'chi ỹátaqta ỹ'añaqtétac na' l'amaqténataxanaxau'pi jen' tamnaxaquipi.

Nuevo Testamento Pilagá

© 1993 Sociedad Bíblica Argentina

More Info | Version Index