Search form

Hechos 19

So' Pablo ỹivíta di' Efeso

1Ca'li maliaxa huét'a so' Apolos di' Corinto, qana'chi so' Pablo quetaỹilo naua' 'ale'u 'me na'alo naua' comadeelóo'te, cha ỹivíde'ta di' Efeso. Huá'a, qana'chi 'uo so' ỹilalégue 'amaqténataxanaxaicpi. 2Qana'chi ỹinatetaco' jeso'me siỹaxadipi, 'enaaco':

—¿Qo'li sóxote 'auacoñiiỹet so' Espíritu Santo ca'li 'au'amaqténataxañii?

Qana'chi 'enapega'to' so'me:

—Qo'mi ma'chaxa taa'chi ñaquiáxanaqpeelégue da' 'uo' ga' Espíritu Santo.

3Qaama'le so' Pablo ỹinato' jeso'me, 'enaac:

—Qa'chi ¿jái'chi ga' lachiláxanataxanaxac ga'me 'auacoñiiỹet joca'li?

Qana'chi jeso'me siỹaxadipi 'enapega'to':

—Da'me lachiláxanataxanaxac so' Juan.

4Qana'chi so' Pablo 'enaaco':

—Já'a, so' Juan joca'li nachiláxatac jen'me siỹaxadipi 'me ỹaxadíñi naua' loico, qaláxasa nataq'en 'enapéga jen'me da' qaidi ỹ'amaqten ga'me nata't 'me nec'atetalégue, jeso'me naqaiso so' Jesús jeso'me net'a 'me qadec'alaxaqui.

5Qana'chi joca'li naquiáxanee'gue dójo' jeso'me, qana'chi qonachiláxan, qodachiláxanataxana da' lenaxat so' qadasoxola' Jesús. 6Qana'chi so' Pablo ca'li huaseltalégue jeso'me siỹaxadipi, qana'chi so' Espíritu Santo janac da' ta'nỹet jeso'me siỹaxadipi. Huá'a, qana'chi dosiilo naua' n'aqtaqa 'me ỹoda'alo, qataxa ỹ'axátet'ape naua' l'aqtaqa ñi' Dios. 7Qaa'le da' ỹima'a't jeso'me, qana'chi ỹóvi' doce so' l'idimpi.

8Qana'chi so' Pablo ỹátaqta ỹivídaxatetreegue saua' tres 'auóxoiqa da' v'iỹílaqta'uo jeso' lemáxaqui na' judiopi da' d'aqtaxáatac, qaỹa 'te ga' d'óitaaque, qataxa ỹ'axátetapeguem jeso'me siỹaxadipi da' l'onataxanaxac ñi' Dios da' ỹimata'a'téna, da' qaidi d'amaqtenataxan. 9Qaláxasa 'uo jen' ỹ'añaxatétaỹilo naua' liquidiaqtel da' sa d'amaqtenataxan; na'chidáta da' ỹátaqta sa ỹodiáquenaac da' n'aqtac da' dosí'ỹa, ỹimachaqtet na' siỹaxadipi. Chan'eesa so' Pablo cá'ai so' siỹaxadipi, qana'chi ỹauéga so'me d'amaqtenataxan jega' lapaxaguenataxanaxaqui so'me lenaxat Tiranno. Huá'a, qana'chi ỹica'n naua' noloqo'te da' d'aqtaxáatac. 10Qana'chi 'éeta, cha ỹivídaxatetreegue saua' dos 'uóidi. Qana'chi ỹátaqta ỹima na' néta'ña di' 'aléua lenaxat Asia, judiopi qataxa jen' sa judiopi, naquiáxatapega da' n'aqtaguec so' qadasoxola' Jesús. 11Chan'eesa ñi' Dios ỹ'e't naa'me let'ádaiqa 'me sa qoỹauanapiilo da' chiỹoqodápiỹi qa'e'n so' Pablo, 12ỹivídichiilo naua' 'chi qailapo' c'óqo'te, qataxa jega' noxot da' 'chi toxoiỹet so' ló'oquiaxac jeso'me, qana'chi qoỹidói'ỹa ga' leuaxaic da' qaidi qolapaxalégue, qana'chi ỹiméegue, qataxa ỹ'odáiỹi na' né'ec 'me nataqtáqaic.

13Qaláxasa huo'oi saua' judío lase' 'me quétraỹi na' siỹaxadipi da' ỹ'odétrapegueegue na' né'ecpi 'me nataqtáqaic. Qana'chi saa'me sétaaque da' d'otáxata da' lenaxat so' qadasoxola' Jesús, da' qaidi ỹ'odédaiỹi na' né'ecpi. Qana'chi saa'me 'eedapego' na' né'ecpi, 'enapega'to':

—'Ami sedoxolóo'te da' lenaxat so' Jesús 'me ỹ'axátetac so' Pablo da' 'oquíỹii.

14Da'me 'éete' joca'li saua' siete lec'óqo'te so' judío lé'ec lenaxat Esceva. So'me lasoxola' na' netaxaỹáxanaxanecpi da' qodosápegue' ñi' Dios. 15Qaláxasa ca'li ỹ'e't da'me, qana'chi so'me né'ec nataqtáqaic ỹ'ato', 'enaac:

—Jaỹim saateton so' Jesús, nataq'en saatetóota so' Pablo; qaláxasa 'ami, ¿jái'te da' 'oñíita?

16Qana'chi so'me siỹaxaua 'me 'uo so' lé'ec nataqtáqaic huenotapiilo saa'me, qana'chi ỹátaqta qaỹa 'te nequepaxateguet, ỹátaqta ỹauáxanapegoovlo, qataxa ỹicolaxatet'ape, qana'chi salee'tailo qa'e'n qataxa ỹi'quemaqte't. Qana'chi saa'me dasodéegue. 17Qana'chi ỹima na' néta'ña di' Efeso judío lé'ecpi qataxa na' sa judiopi ỹaỹáten da'me dójo', qana'chi ỹátaqta jalcote da' loqolánaxa. Qana'chi jen'me 'enaac ỹátaqta let'ádaic da' li'ỹoxodic da' lenaxat so' qadasoxola' Jesús.

18Nataq'en ỹátaqta jalcote na'me d'amaqtenataxanpi na' n'axáteuo jen'me sa nó'in 'me ỹacoñíỹi ca'li maliaxa sa d'amaqtenataxan. 19Qana'chi ỹátaqta jalcote jen'me napaxaguéetapego' josii'chi da' pinaxac 'me sa di'ỹoxolégue, qana'chi nedóuo jan' lede 'me huetalégue da'me. Qana'chi qoỹigóoue ỹima jan'me, ỹic'atéetac qoỹin na' siỹaxadipi. Joca'li ỹim, qana'chi qoỹisoga't jaso' laso'vi, qaa'le jaso'me ỹátaqta sa lec'oqtole. 20Qana'chi 'éeta da' n'aqtaguec so' qadasoxola' da' ỹátaqta nichíctaseguem, qataxa ỹaloxon da' lañoqtaxanaxac.

21Joca'li ỹim dójo', qana'chi so' Pablo 'uo da' leenataxac da' taiỹi da' Macedonia qataxa da' Acaya, qataxa sétaaque ỹivíd'a di' Jerusalén. Qataxa da' 'uootaxa sétaaque da' ỹimat di' Jerusalén, qana'chi taiỹi di' Roma. 22Chan'eesa ỹamaxategue da' Macedonia saua' dos lecochaxa'u Timoteo qataxa so' Erasto, qana'chi so'me maliaxa huo'oi saua' noloqo'te da' huét'a di' Asia.

Da' cotaxac di' Efeso

23Jesaa'me noloqo'te, qana'chi 'uo so' let'ádaic cotaxac ỹasouaxat da' l'aqtac ñi' Dios. 24Qaa'le da'me cotaxac chiỹoxouó'o so' siỹaxaua lenaxat Demetrio 'me ỹ'étac na' laicaua lenaxat plata. So'me ỹ'étetac na' ladénaqtac 'emecpi, ỹadénaxatetac so' l'emec jaso' nat'e 'me qonetaméetapecot, lenaxat Diana, 'en na' laicaua liquí'i. Na'chida da'me ỹachiỹoxotétapiỹi da' let'ádaic lauégaxanaxac na' l'onataxanaxanecpi. 25Qana'chi jeso'me lapona'to' so' l'onataxanaxanecpi, qataxa ỹima jen'me 'ená'am da' l'onataxanaxac so'me. Qana'chi 'enapego', 'enaac:

—'Ami siỹaxadipi, 'ami 'auaỹáchiñii da'me qad'onataxanaxac, da'me na'chidáta 'me siỹamaxasóqtapiỹi. 26Qaláxasa 'ami sóxote 'auc'achiñíitac, qataxa 'amachíitapega so' Pablo so'me 'éetapega da' na' noqolacpi 'me mai'chi ladénaqtac jen' siỹaxadipi, jen'me sa 'eesa da' dec'alaqtaxan. Qana'chi so'me ỹátaqta jalcote na' lañoqtac da' ỹ'amaqten da'me 'éetapega, qataxa sa na'chína na' Efeso, nataq'en ỹiméda naua' 'ale'u lail na' Asia. 27Da'me ỹátaqta 'uo da' lichic, qá'a da'me qad'onataxanaxac ỹañoxot da' pal qomle. Nataq'en ñi' l'emec jañi' ñitamnaqátapecot qadat'e Diana, ñi'me pal qomle da' li'ỹoxodic. Huá'a qomle, qana'chi qaỹa 'te li'ỹoxodic qoỹin qomle jañi'me qadat'e 'me netaméetapecot na' néta'ña na' Asia qataxa ỹima jen'me na'alo naua' 'ale'u laqáỹa'.

28Qaa'le joca'li 'chi qodemachíi'ỹi da'me, qana'chi ỹima jeso'me siỹaxadipi ỹátaqta dalemata. Qana'chi ỹ'alqátaỹi, 'enaaco':

—¡Ỹátaqta let'ádaic da' li'ỹoxodic jañi' Diana 'me lat'e na'me néta'ña na' Efeso!

29Qana'chi ỹátaqta 'uo da' l'áxa ỹima so' noic. Qana'chi qoỹaconé'uo so' Gayo qataxa so' Aristarco, saa'me chiỹoqoda'ague di' Macedonia, qana'chi náictrapegue' so' Pablo. Qana'chi saa'me qoỹauécdaaue ga'me 'emec 'me huápega da' qoỹí'et na' nosáxac. 30Qana'chi so' Pablo sétaaque da' ỹic'áte'uo jeso'me dasot'a't, da' qaidi d'aqtaxanem, qaláxasa so'me 'amaqténataxanaxaicpi sa qoỹaseneuó'o so'me. 31Nataq'en 'uo na' net'alpi 'me l'acháqa' di' Asia jen'me naatetonaxau'pi so' Pablo jen' namaxa da' l'aqtac so'me, da' qaidi sa ỹic'áteuo. 32Qana'chi so'me nemáxac ỹátaqta 'uo da' n'alaxac, ỹodapecachi na' qoỹ'alqatalégue, qá'a na' siỹaxadipi ỹátaqta sa nela'a't. Qana'chi ỹátaqta jalcote na' ỹalquétauo, qaláxasa sa ỹaỹáten ga' 'uo 'me qoỹí'et jeso'me nemáxac. 33Qaláxasa 'uo na' lalgaxau'pi 'me d'aqtaxanem da' 'éeta da'me nemáxac so' Alejandro, qana'chi na' judiopi ỹamaqáuo so'me da' qaidi dasoỹa'aguet ỹima jeso'me siỹaxadipi. Qana'chi so'me ỹaaséguem na' louaq, da' qaidi n'emáxañi qa'en na' siỹaxadipi, qana'chi sétaaque da' d'aqtaxanem jen'me da' na' judiopi da' sa lasouaxaset da'me dójo'. 34Qaláxasa joca'li qoỹaateton so'me da' judío lé'ec, qana'chi so'me siỹaxadipi ỹitaxa ỹ'alqaỹi, ỹivid'alo saua' dos horas da' ỹ'alqátac, 'enaac:

—¡Ỹátaqta let'ádaic da' li'ỹoxodic jañi' Diana 'me lat'e na' néta'ña na' Efeso!

35Chan'eesa so'me nedáxanaxanec da' qoỹí'et na' netaxaỹaxac 'me l'acháqa' so'me noic, ca'li ỹañoxot da' n'emáxañi qa'en so' siỹaxadipi, qana'chi 'enaaco':

—'Ami siỹaxadipi 'me 'ad'acháqadii na' Efeso, 'ami 'auaỹáchiñii da' ỹima na' siỹaxadipi ỹaỹáten da' na' noic Efeso, na'chína na' ỹilótapegue' ñi' l'emec jañi' qadat'e Diana qataxa ñi'me liquí'i 'me n'áqañi josii'cho' chiỹoqo'ot di' piỹem. 36Qá'a qaỹa 'te ga' ỹoqolguet da'me dójo', qana'chi n'óota da' 'amachíi'ỹa, 'ená'te 'uo qomle ga' 'av'íchii da' 'uootaxa sa 'aueenachíiỹa. 37Qá'a náajo' siỹaxa'u 'me 'anavíquiideuo, naa'me sa 'te ỹisouéetrac jañi'me ỹima da' 'ada'chii. 38Qomle da'me Demetrio qataxa jen'me l'onataxanaxanecpi da' 'uo ga' necotátrapegue', qaláxasa 'uo jen'me net'alpi 'me ló'o da' nimit na' nasouaxasetpi da' qoỹic'áte'uo, qaidi ñi' 'oonolec ỹ'axat ga' sa ỹiỹamaxaden. 39Qataxa qomle 'uo ga' laqáỹa 'aviỹáxañiitaaque, qana'chi n'óota da' 'auauóỹaaque ga' 'ademáxaquii da' ỹalquétauo 'aviñii na' net'alpi, da' qaidi 'auosíiỹapegue'. 40Qá'a qo'mi ma'le souqáaue naỹi da' lichic da' 'uootaxa qoỹinapegalo qo'mi p'aguénaxaiqa, ỹasouaxat da'me s'étaqtac naỹi. Qá'a qo'mi qaỹa 'te ga'me qad'aqtaxanaxac da' 'uootaxa qo'mi qoỹinateque da'me dójo' qancotaxac.

41Ca'li ỹim da'me l'aqtac, qana'chi tachi'ndi qa'en so'me nemáxac.

Nuevo Testamento Pilagá

© 1993 Sociedad Bíblica Argentina

More Info | Version Index