Search form

Marcos 4

Qodaloqtenaxana ga' janaxanaxaic

(Mateo 13.1-9; Lucas 8.4-8)

1Ỹitaxa huetaxasó'ma so' Jesús so' loxogue jaso' peróna dapaxaguenataxáatac, qana'chi ỹátaqta jalcote so' siỹaxadipi 'me ỹimaxasó'ma so'me joca'li huosái'isa da' jalcote so' siỹaxadipi, qaama'le so' Jesús huenóchiinỹi jaga' licota 'me net'ot na' loxogue jaso' peróna. Qana'chi ỹima na' siỹaxadipi huét'a so' l'añaxa. 2Qana'chi ỹátaqta jalcote na' dapaxaguenataxanec, ỹauót'ai na' laloqtenaxanaxatpi, 'enaac:

3—Ỹa 'anaquiáxañiỹa da' s'axat, 'enaac: 'Uo so' siỹaxaua janaxanaxaic jec da' danaxan. 4Joca'li ma'le danaxan, qana'chi 'uo jan' nepeta ta'nỹi so' naq'aic, chan'eesa janac na' maỹo'pi, qana'chi ỹalic. 5Jaso' nepeta laỹi talégue so' 'aléua 'me qadísat, na'chi jaso'me peta sa huaỹáloq da' naséguem, qá'a sa huosái'isa jen' 'aléua. 6Qaláxasa joca'li nenoxoséguem jaso' c'atena, qana'chi ỹavic jaso'me, qá'a ỹasouaxat da' nep'átaseguem na' lepata'. 7Qataxa jaso' nepeta laỹi talégue so' 'aléua 'me ta'sódesat, qana'chi jaso'me ta'asot ỹátaqta sa neláuasee'megue da' naséguem, qana'chi ỹátaqta ỹapadeelégue jaso'me nañiise, qana'chi qaga 'te jala. 8Qaláxasa jaso' nepeta laỹi talégue so' 'ónaxaic 'aléua, mané'e ca'li naséguem, qana'chi ỹátaqta 'ónaxaic da' lolelaxa. Qana'chi ỹóvi' treinta jan' jalapi jañi' 'oonole lamo, qataxa 'uo jan' ỹóvi' sesenta qataxa cien.

9Qaama'le 'enáacjo' so' Jesús:

—Ga'me ỹaỹáten da' naquiáxanaxac, n'óota da' naquiáxachiiñi.

Da'me 'éeta da' tooqo'chi qoỹa'uo na' naloqtenaxanaxatpi

(Mateo 13.10-17; Lucas 8.9-10)

10Joca'li ma'le nedó'te' na'me na'chi 'eeta't da' sa ỹiỹotéegue so' Jesús qataxa saua' doce lasoxoñii's, qana'chi qoỹinatétapeec so'me ga'me náaue da'me daloqtenaxáatapega. 11Qaama'le jeso'me ỹ'ato', 'enaac:

—Ñi' Dios 'ami ỹaỹátenaxanaxanque jen'me lasoxocpi 'me sa di'ỹoq da'me l'onataxanaxac da' ỹimata'a'téna. Qaláxasa jen'me maliaxa huétaiỹi 'chi qoỹidolégue na' naloqtenaxanaxat da'me qod'aqtaxanem; 12qaidi da' dec'atenaxan, qaláxasa 'ená'am da' sa nauáañi, qataxa da' 'uootaxa naquiáxatac, qaláxasa sa ỹaỹáteneguet, qaidi nataq'en sa nadálaxatela't qataxa qoỹapalaxa't naua' loico.

So' Jesús ỹ'axat da' ladic so' janaxanaxaic

(Mateo 13.18-23; Lucas 8.11-15)

13So' Jesús nataq'en 'enaaco':

—¿Qa'chi sa 'auaỹáchiñiỹo' 'ami da'me ỹaloqtenaxanaxat? ¿'Te hua'ago' da'me 'auaỹáchiñii na' laỹi naloqtenaxanaxatpi? 14Ga' janaxanaxaic ỹaiñi jan' peta 'ená'am ga'me ỹ'axátetac da' n'aqtac. 15Qaa'le 'uo na' siỹaxadipi 'me 'ená'am jaso' peta 'me ta'nỹi so' naq'aic. Jen'me naquiáxatapega da'me n'aqtac. Qaláxasa da' qaỹat'ague da' naquiáxanaxac, qana'chi janac so' qadó'o paiỹac Satanás, qana'chi neuótec na' n'aqtacpi 'me qoỹanóoue jañi' liquidiaqte. 16Qataxa 'uo na' siỹaxadipi lai 'me 'ená'am jaso'me peta 'me talégue so' 'aléua 'me qadísat. Jen'me naquiáxana da'me n'aqtac, qana'chi ỹaconeguet qataxa 'uo da' lamanaxanaxa. 17Qaláxasa nep'átaseguem na' lepata', qana'chi sa 'eeta't. Chan'eesa da' janac da' n'iinaguec, 'uootaxa da' necanáguec ỹasouaxat da' n'aqtac, qana'chi jega'me qoséegue. 18Qataxa 'uo na' laỹi 'ená'am jaso' peta 'me talégue so' 'aléua 'me ta'sódesat. Jen'me naquiáxana da' n'aqtac. 19Qaláxasa ỹágueegue qa'en da' ỹima'aguet na' 'chi 'aléua lé'ec, qataxa da' loqovínaxanaxac da' nesaliaxa, qana'chi ỹivíd'a da' loqopi'chi ỹima na' chaqáina. Qana'chi ỹima jénjo' ỹapadeelégue da' n'aqtac, qana'chi sa ỹa'uo ga'me jaláỹaxac qa'en ga'me siỹaxaua. 20Qaláxasa 'uo na' naquiáxana da' n'aqtac, qana'chi ỹaconeguet, qana'chi ỹátaqta 'uo da' jaláỹaxac, 'ená'am jaso' peta 'me talégue so' 'ónaxaic 'aléua. 'Uo na' 'ená'am jaso' nañiise 'me ỹóvi' jaso' treinta jan' jalapi jañi' 'oonole lamo, qataxa 'uo jan' ỹóvi' sesenta, qataxa cien.

Qodaloqtenaxana jaso' necoỹadáxanaqte

(Lucas 8.16-18)

21So' Jesús nataq'en 'enaaco':

—Da' 'uootaxa qondóuo jaga' necoỹadáxanaqte, qana'chi ¿qo'li qoỹano'ot jaga'me cason, 'uootaxa jega'me n'ochaxala'? 'Axai', sa naq'áita. Na'chidáta da'me qoỹanaséguem jaga'me, qaidi ỹ'oqóchiiñi. 22Qá'a qaỹa 'te ga'me qoỹoxotétapiiñi taa'le sa di'ỹoq, qataxa qaỹa 'te ga'me sa di'ỹaxa taa'le sa qoỹaỹáten. 23Píiỹa ga'me quiáxanaxaic, n'óota da' naquiáxachiiñi.

24So' Jesús nataq'en 'enaaco':

—Ỹátaqta 'auloiỹiỹi qomle da'me 'anaquiáxanaxaquii. Qá'a ga'me 'adaloqtenaxanaxaquii da'me 'uo ga' 'auañíiỹi, qana'chi ỹaloqchíichiỹi ñi'me Dios ga'me 'ami ỹanema, qataxa ỹácteegue ga'me 'ami ỹanema, 'ami 'me 'anaquiáxañiitac. 25Qá'a ga'me 'uo ga'me huet'ot, na'chi ỹáisaiỹi ga'me qoỹanem, qaláxasa ga'me qaỹa 'te huet'ot, qonóuo' qomle, qoneuótec ga'me sa 'amaqtaqolec 'me huet'ot.

Qodaloqtenaxana jaso' peta 'me naséguem

26So' Jesús nataq'en 'enáacjo':

—Da'me l'onataxanaxac ñi' Dios da' ỹimata'a'téna, da'me 'ená'am ga' siỹaxaua 'me ỹanóoue jen' 'aléua jaga'me nepeta. 27Ỹim, qana'chi jec d'ochi, nolo' laqáỹa ñíseguem, qana'chi coovlo naua' noloqo'te qataxa naua' pi'ỹáxadi. Qana'chi jaso' nepeta naséguem, qana'chi jec da' naqaloxodétaseguem, qaláxasa jeso'me sa ỹaỹáten ga'me 'éeta da'me naqaloxodétaseguem jaso'me. 28Qá'a jen' 'aléua mai'chi ỹí'et da' naqaloxodétaseguem jaso'me; 'uáiñi da' naséguem jaso' lolelaxai, copa'ague qataxa 'uo jen' la'uo, qataxa jec jan' jalapi. 29Qana'chi jaso'me da' ỹivíta da' ỹi jan' jala, qaama'le qodíguee'ga qonapoc, qá'a ỹivíta di' lalóqo'.

Qodaloqtenaxana jaso' jala jan' mostaza

(Mateo 13.31-32; Lucas 13.18-19)

30Nataq'en ỹitaxa 'enaaco':

—¿Jái'chogamaxa 'ená'am qasenaq da' l'onataxanaxac ñi' Dios da' ỹimata'a'téna? qataxa ¿jái'chogamaxa táchiỹi da'me saloqtenaxanaxa? 31Jeda'me 'ená'am jaga' jala jan' mostaza 'me qoỹanóoue jen' 'aléua. Jan'me ỹátaqta qapi naua' jala, sa 'ená'am jan' laỹi nañiisepi 'me hualégue jen' 'aléua. 32Qaláxasa jaga'me da' sóxote qoỹaiñi, qana'chi noleliséguem, cha ỹivíd'a da' ỹátaqta lecaỹíñi, napacalégue jan' laỹi 'me nañiisepi. Jan' lepeepi ỹátaqta qaỹai'ỹilo, chan'eesa na' maỹo'pi na'chi taỹapéga, taavlo naua' lepeel da' nematéegue.

Da'me 'éet'ec so' Jesús da' ỹauót'ai naua' laloqtenaxanaxaqui'

(Mateo 13.34-35)

33Naq'áita da'me lapaxaguenataxanaxac so' Jesús da' ỹ'axat da' n'aqtac, ỹátaqta jalcote na' laloqtenaxanaxat 'ená'am dójo', ỹataqtelégue na' mai'chi taỹa ga' ỹañoxot da' demachíỹa so' siỹaxadipi. 34Na'chidáta da' ỹauót'ai jen' laloqtenaxanaxat, qaláxasa da'me nedot'eto saua' lasoxoñii's, qana'chi ỹátaqta d'aqtaxaat'ema.

So' Jesús v'iiỹet qa'en so' laỹat qataxa so' lepáxa

(Mateo 8.23-27; Lucas 8.22-25)

35Qana'chiso so' nolo' joca'li ma'le pí'ỹaq, qana'chi 'enapegalo saua' lasoxoñii's so' Jesús, 'enaac:

—Saxa'ta qomle da' lasego jan' peróna.

36Chan'eesa quéd'ai so' siỹaxadipi qodicot so' Jesús, qonánỹi jaso' chi'ena 'me nétanỹi licota. Na'chi 'ená'am ỹitaxa huo'oi saua' nilicotal laqáỹa' 'me náictapegue'. 37Qana'chi janac so' laỹat t'ádaic, qana'chi jen' lepáxa na' noxop taỹapíinỹi jaso' licota, qana'chi nichíctaseguem na' noxop jeso' lauel jaso'me. 38Qaa'le so' Jesús d'ochítac, huet'ague so' nasep p'áteegue jaso' licota, huót'ai so' naláanaxat. Qana'chi qonoqtoxonalégue, qoỹiit'oi:

—¡'Am 'me 'am paxaguenataxanaxaic! ¿Sa taỹapiỹo' di' 'adauel? Péga, sétaaque da' qo'mi damolídiñi.

39Qana'chi ñíseguem so' Jesús, qana'chi nelaxa so' laỹat, qataxa 'enapéga na' noxop, 'enaac:

—¡'An'emáxañi! ¡'Ad'emáqta!

Qana'chi so' laỹat v'iiỹet, qana'chi tóchiiñi ỹima so' noxop. 40Qaama'le 'enapegalo saua' lasoxoñii's, 'enaac:

—¿Tá'nooqo'chi 'au'óỹii? ¿Qaỹo' jogamaxa 'chi 'adip'iỹáxaquii?

41Qaa'le saa'me ỹátaqta 'uo da' loqolánaqa', qana'chi nesoxotapega'salo 'enapega't:

—¿Jái'chi da'me dójo' siỹaxaua? 'Chi ỹivíd'a na' laỹat qataxa na' noxop ỹalaxaguet.

Nuevo Testamento Pilagá

© 1993 Sociedad Bíblica Argentina

More Info | Version Index