Search form

Marcos 5

So' Gadara lé'ec 'me 'uo so' lé'ec nataqtáqaic

(Mateo 8.28-34; Lucas 8.26-39)

1Qaa'le ma'le ỹivídede'ta da' lasego jaso' peróna, qoỹivídet'a di' 'aléua Gadara. 2Qana'chi mané'e ca'li huenótee'guesop jaso' licota so' Jesús, qana'chi nachimaxatá'a so'me so' siỹaxaua 'me chiỹaqáaue so' napa'lpi, 'uo so' lé'ec nataqtáqaic. 3So'me siỹaxaua nétapegooue so'me napa'lpi. Jeso'me ỹátaqta qaỹa 'te taa'le ỹicoñi', qana'chi 'ená'am da' qoỹin lequet ga' sa nedámita. 4Jeso'me sóxote jalcote noqo' da' qoỹicoñida'salo naua' lichil, qataxa naua' loua' qoỹicoñitec na' cadéena, qaláxasa na'chi 'ená'am ỹip'iaxatétapiỹi. Qana'chi qaỹa 'te ỹañoxot taa'le ỹicoñi'. 5Colen, qana'chi 'eeta't di' nolo' qataxa di' pí'ỹaq, ỹ'alqatapeelégue so' qasoxonaxa, qataxa jen' napalénaqa'pi, qataxa ỹapiac na' ló'oc, ỹidá'a na' qa'. 6Qaláxasa joca'li maliaxa qaỹat'aguet so' Jesús, qana'chi ỹauaat'eguet, qana'chi naqalégaq'aguet da'me ỹisocoto naua' liliictel jeso'me. 7Qana'chi ỹátaqta neten da' 'enaac:

—¿Tá'nooqo'chi 'aunóxotetac jaỹim, 'am Jesús, 'me 'am lec'óxot ñi' Dios 'me p'asáiỹi? Ñi' Dios jaỹim ỹauáachiỹi da' 'am ñachoxodenot da' 'ená'te 'aua'uo ga' ñi'queténaxac.

8Jeso'me 'enaac da'me dójo', qá'a so' Jesús sóxote 'eetapego' so'me, 'enaac:

—¡'Am né'ec nataqtáqaic, 'ocá'ai qomle na'me siỹaxaua!

9Qana'chi so' Jesús ỹachimaxata so'me, 'enaac:

—¿Jái'chi ga'me 'adenaxat?

Qana'chi ỹ'at so'me, 'enaac:

—Jaỹim ỹinaxat da' Lamái'i, qá'a qo'mi jalcote.

10Qana'chi ỹátaqta nachoxodéetapecot so'me Jesús, qaidi sa 'te qaỹa'ague ga' ỹamaxague so'me jeso'me qouét'a 'aléua. 11Qaa'le 'uo jaso' jalcote coochipi sa qaỹáaque, de'quétac, netalégue so' qasoxonaxa. 12Qana'chi so'me né'ecpi nachoxodéetapecot so' Jesús, 'enaac:

—Qo'mi 'auamaxalo qomle jadi' coochipi, qaidi senoxonaxáaue jadi'me.

13Qana'chi so' Jesús ỹaséet'em so'me da' ỹic'áta. Qana'chi so'me né'ecpi nataqtáqaic cá'ai so'me siỹaxaua, qana'chi ỹinoxonapégooue jaso' coochipi. Qana'chi jeso'me naqalégaqapii'ña so' comadáxa, qana'chi taỹapíinỹi jaso' peróna, qana'chi 'ouaxaipi. Qaa'le jaso'me coochipi dos mil di' tá'ña.

14Qaa'le so'me nouatoqo'tpi jaso'me, dasóiỹi, dó'i. Na'chi jec da' d'aqtaxaneuó'o so' noic, qataxa jen'me nái'ỹa na' n'ónaxa. Qana'chi janac na' siỹaxadipi da' qonec'atenaxanée'ga da'me dójo'. 15Joca'li qonivíta ga'me huét'a so' Jesús, qana'chi qoỹilalégue so' siỹaxaua 'me 'uo ca'li so' lé'ecpi da' ñíchiiñi, huo'oi naua' leuo, nateet'egue da' siỹaxaua. Qaama'le dó'i so' siỹaxadipi. 16Qana'chi jen'me ỹauaatalégue da'me 'éeta so'me siỹaxaua, qana'chi ỹ'axátetac da'me 'éeta so'me siỹaxaua 'me 'uo so' lé'ec joca'li, nataq'en ỹ'axátetac da'me 'éeta jaso' coochipi. 17Chan'eesa qonachoxodéetapecot so' Jesús, da' qaidi cá'ai so'me n'aléua so'me siỹaxadipi.

18Qaa'le so' Jesús joca'li huenóchiinỹi jaso' licota, qana'chi jeso'me siỹaxaua 'me 'uo ca'li so' lé'ecpi nachoxodeet'ot so' Jesús da' naseet'eguet so'me da' 'equegue. 19Qaláxasa so' Jesús de'uotapeeguet. Qana'chidáta da' 'enapéga, 'enaac:

—'Auc'áta qomle ga' 'ad'acháqa', qataxa ga' 'adaỹi, 'au'axátem qomle ỹima da'me 'am ỹ'étec ñi' qadasoxola' Dios, qataxa da' lichoxodénataxanaxac da'me qonéta.

20Qana'chi so'me siỹaxaua jec, qana'chi 'ecot da' d'aqtaxanem ỹima naa'me noiqa 'me netalóo'te di' Decápolis, ỹ'axátetac ỹima da' 'éet'ec so'me so' Jesús. Chan'eesa so' siỹaxadipi ỹátaqta ỹ'aalátapeec da'me dójo'.

Jaso' lec'oqte so' Jairo qataxa jaso' ỹauo 'me ỹipoteuó'o jaso' lapoto so' Jesús

(Mateo 9.18-26; Lucas 8.40-56)

21Joca'li v'iỹílaxata so' Jesús, nétanỹi jaso' licota da' v'iỹílaxa'ta so' lasego, qana'chi noqoigaxasó'ma so' siỹaxadipi ga' huét'a. Qana'chi huá'a so'me ga' loxogue jaso' peróna. 22Qana'chi nóvi' so' 'oonolec so'me nasoxola'pi, so'me ỹilotalégue jaso' lemáxaqui na' judiopi, lenaxat da' Jairo. Mané'e joca'li ỹilá'a so' Jesús, qana'chi ỹisocoto naua' liliictel. 23Qana'chi ỹátaqta nachoxodeet'ot 'enaaco':

—Jadi' ỹale sóxote chitatátac. Ỹa 'auvídet'a toqo' 'chi 'auaselelégue, qaidi n'óxota qataxa nec'aléegue.

24Qana'chi so' Jesús 'equegue so'me. Qaláxasa jalcote so' siỹaxadipi 'me quétapegue' so'me, ỹátaqta ỹipataqta't. 25Qaa'le jeso'me siỹaxadipi jaso' ỹalquétaaue ỹauo 'me ỹilhuaac, jaso'me sóxote ỹovi't saua' doce 'uóidi da' naquétac jan' letauo'. 26Nataq'en jaso'me jalcote na' dachoxoỹa na' tadénataxanaxaicpi, cha ỹimatéteuo na' n'atetpi. Qaláxasa qaỹa 'te ỹachiỹoxotaỹi, lamá'asa nichiquet'a't. 27Mané'e joca'li p'iỹilégue so' Jesús, qana'chi jaso'me ỹauo naqaloxodé'uo so'me, quetoo'uet so' lóvi', qana'chi ỹipoteuó'o so' lapoto. 28Qá'a jaso'me da' leenataxac 'enaaco': “Da' 'chi satoxoiỹet ga' lapoto, qana'chi jaỹim n'óota qomle.” 29Huá'a, qana'chi v'iiỹet jan' letauo' jaso'me, qataxa nomt'eguet da' n'óota na' ló'oquiaxac, ma'le qaỹa so' lapite'na. 30Qana'chi so' Jesús nomtee'gue da' lañoqtaxanaxac da' 'uo ga' n'óxota qa'en, qana'chi so'me neselec da' ỹilápiỹi so' siỹaxadipi. Qana'chi dachimaqtaxan, 'enaaco':

—¿Jái'chi ga' ỹipoteuó'o na' ỹapoto?

31Qana'chi saua' lasoxoñii's 'eedápega so'me, 'enaac:

—'Auaỹáten da' na' siỹaxadipi 'am ỹipataxa't, 'eetoqo'chi 'auachimaqtaxáatac da' 'onet'oi: “¿Jái'chi ga'me jaỹim ỹipoteuó'o?”

32Qaláxasa so' Jesús ỹilotapii'nỹi da'me sétaaque ỹilá'a ga'me ỹipoteuó'o so'me. 33Qana'chi jaso'me ỹauo ỹátaqta ỹivíloxolaqtet da' loqolánaxa, qá'a jaso'me mai'chi ỹaỹátaxadeeta da'me 'éeta joca'li. Qaama'le jec ỹic'áte'uo' so'me, qana'chi ỹisocoto naua' liliictel, qana'chi ỹ'axátem ỹima da'me huápiỹi. 34Qana'chi so' Jesús 'enapego' jaso'me, 'enaac:

—'Am ỹalole, 'am n'óota qoỹin, qá'a 'au'amaqtenataxan. 'Aue, 'oc qomle, qaỹa 'te 'uo 'am naỹi, sóxote qaỹa so'me 'adapite'na.

35Maliaxa dosétac joca'li so' Jesús, qana'chi huo'oi saua' novi't, chiỹoqodá'a so' l'acháqa' so'me lasoxola' ga' lemáxaqui na' judiopi. Qana'chi qod'aqtaxanem so'me let'a jaso' nootole, 'enaaco':

—Jadi' 'ac'oqte sóxote qaga, ¿chan'eesa saaquetáxa da' 'auqueuógaxan na'me dapaxaguenataxáatac?

36Qaláxasa so' Jesús sa ỹoqo'cha joca'li da'me n'aqtaxanaxac. Na'chi 'enapego' so' lasoxola' ga' lemáxaqui na' judiopi, 'enaac:

—'Ená'te 'auó'i, na'chidáta da' 'au'amaqtenataxan.

37Qana'chi qaỹa 'te naseneguet da'me 'uo ga' náicapegue', na'chisóta so' Pedro, qataxa Jacobo, qataxa so' laqáỹa Juan. 38Qana'chi joca'li ỹivídeda'uo ga' l'acháqa' so' lasoxola' ga' nemáxaqui, qana'chi ỹiláaue so' siỹaxadipi da' ỹ'iỹíitapega't qataxa noỹíitaỹi qataxa ỹ'alqátaỹi. 39Qana'chi ỹinoxonóoue ga' 'emec, qana'chi 'enapéga jeso'me siỹaxadipi, 'enaaco':

—¿Tá'nooqo'chi 'au'alqáitaỹi qataxa 'anoiñíitaỹi? Jadi'me nootole sa ỹileu, jadi'me 'chi d'ochítac.

40Qaláxasa qoni'viñíỹi so'me. Qana'chi so' Jesús ỹip'áxaneegue ỹima so' siỹaxadipi, ỹisamaxa't so' let'a, qataxa jaso' lat'e, qataxa saua' náictapee'to, qaama'le ỹinoxodé'uo ga' huét'a jaso' nootole. 41Qana'chi lasáq'a na' louaq jaso'me, qana'chi 'enapéga, 'enaac:

—Talita, cumi —da'me n'aqtac 'enaac: 'Am nootole, 'am senapéga, 'oñíseguem.

42Huá'a, qana'chi jaso'me nootole 'me sóxote doce naua' ne'uóidi, jaso'me ñíseguem qataxa nichaatétac. Qana'chi so' siỹaxadipi ỹátaqta huosái'isa da' l'aalaxac. 43Qaláxasa so' Jesús ỹátaqta netenec da' laqátaxac da'me qaỹa 'te qoỹ'axátem da'me dójo', na'chi damaxasoxolégue da' qoỹiqui'ỹáxan jaso'me.

Nuevo Testamento Pilagá

© 1993 Sociedad Bíblica Argentina

More Info | Version Index