Search form

Aposol 8

1Ma weni berasi ituputupuwa na Sol nani kamonai, tuna mani matanai ikitai ma ivi vaghinei da Sitivin ikiivunui.

Sol vitumaghana damsi ivi tupaketowanesi.

Nani maranai wawaya ivi karei da vitumaghana damsi Jerusalem kamonai ivivi tupaketowanesi. Ma peyarisi ivi verubogebogesi da ku Judiya ma Sameriya dobusi, ma aposol kava Jerusalem kamonai imakai. 2Ma vitumaghana tomotomowisi viya Sitivin ituwei ma tupuwina idogoi.

3Ma Sol ivi karei da vitumaghana damsi ivivi tupaketowanesi. Numa nununai tomotomowa ma wivine ititinakwarokwarosi da ku gabura itereteresi.-

Piripo Sameriya kamonai idima.

4Vitumaghana wawayisi Jerusalem ikiibutawei ma ivi verubogebogesi da meni ku dobuna inenekiibau na God vonana idimadimei. 5Ma Piripo inae ku kwanatu sago Sameriya kamonai, ma nani dobunai Keriso varana idimei. 6Koroto ghamana Piripo ivi yanei ma ikitai da matakira ghamaghamasi iberaberai na peyarisi ina sisiya ivivi yana bogai. 7Kanuma beroberosi ere kiikiirarisi wawaya ikiikiibutawesi. Ma digadigasi ma gibegibesisi peyarisi iyawayawasa. 8Tuna kubiine kwanatuna kamonai nuwabiibii irakata kirakai.

Saimon kiikiirapuna.

9Tomowa sago kana vava Saimon nani kwanatuna kamonai imakamakai, tuna kiikiirapuna. Ma namadani kava wawaya peyarisi Sameriya kamonai ina rewapana ivivi deyei. Saimon ikayokayotata da tuna wawaya ghamana. 10Ma babada ma wawayota kudubisi ivovokaravei ma ivi vavei ‘Rewapana Kirakiina’ bo ‘God Ina Rewapana.’ 11Namadani kava ina bera vigayagaya kubiine wawaya ivivi deyei ma ivivi tumaghanei. 12Ma maranai Piripo inekiibau na God ina vikiivavona ma Yesu Keriso varana biibiina idimei kurisi. Tuna kubiine tomotomowa ma wivine peyarisi ivi tumaghana ma ibabataito. 13Ma bade Saimon ivi tumaghana ma ibabataito. Ma Piripo iwagiyei ma ikitai da bera ma matakira ghamaghamasi iberaberai na inota kavakavai.

14Aposol Jerusalem kamonai ivi yanei da Sameriya damsi God vonana ivi tumaghanei na Pita da Jon ivonatawesi kurisi. 15Ivi ruwa inekiibau ku Sameriya na inipowana vitumaghana damsi vusi kubiisi da Kanuma Vovokaravina ita towatepanisi, 16iyamna Bada Yesu avanai kava ibabataito ma Kanuma Vovokaravina ke ita viiya. 17Ma Pita da Jon imasi ku tepasi iterei na Kanuma Vovokaravina itowatepanisi.

18Ma Saimon ikitai ikikava aposol imasi wawaya ku tepasi iterei da Kanuma Vovokaravina itowatepanisi na mane ivororona kurisi da nani rewapanina ita gimari. 19Ma ivonesi bo, “Taku bade rewapana kovereku da iyavo kava imaku ku tepasi ana tereterei na Kanuma Vovokaravina ina viiya.”

20Ma Pita ivonapotei bo, “Tam ma am mane yavata ku keyama karata makamakii nonowina kona nae! Ikikava kunotai da God ina puyo kuta gimari? 21Nuwanuwam didibarina God ku matana, tuna kubiine weni bigana kamonai ke kuna biga! 22Am bera berona kevi nuwapoyei ma kemiirikupukuputei. Ma Bada kurina kenipowana da mikeda am nota berona ina notatawei. 23Damim aviiya da nuwakapi nuwanuwam ivi beroi ma bade am berabero ipatumim.”

24Ma Saimon ivi nowi kirakai, ivona bo, “Kubiiku konipowana Bada kurina da aviyavisina kovi sisiyei na ke ina tupuwa kuriku.”

25Pita da Jon i vitumaghana ivi mamatara ikovi ma Bada Vonana idima yavui na ivomiiri da ita vovira ku Jerusalem. Ma Sameriya dobuna kamonai ibaba inenae na kwanatu nununai Bada Varana Biibiina idimadimei.

Piripo ma Itiyopiya badana.

26Mara sago Bada ina aneya Piripo ivonei bo, “Kevomiiri ma warere ketana eororu Jerusalem da ku Gasa kekivini.” 27Vaghina ma ivomiiri, ibaba inenae da Itiyopiya tomowa ikitai.+ Tomowina na wawaya ghamana ma tuna na Itiyopiya damsi i kiivavo wavinena Kandasi ina mura kana koyakoyagha.+ Tomowina ighae ku Jerusalem God vokavakavarina kubiine 28ma iororu ina ku dobu. Ina seriyoti+ tepanai igeru iveraverau ma peroveta Aisaya ina giruma ivivi yavi. 29Ma Kanuma Vovokaravina Piripo ivonei bo, “Kenae nani ku seriyoti ma ririnai kuna baba.” 30Ma Piripo iverau nake ma ivi yanei da tomowina peroveta Aisaya ina giruma ivivi yavi. Ma Piripo ivi tarakiiyana bo, “Kiyiyavi na iyamna keviivii bubuni, bo kegha?”

31Ma Itiyopiya tomowina ivonapotei bo, “Kegha, ke ata viiviiya. Ke sago wawaya da iti debei kuriku.” Ma tomowina Piripo ivonei da ita ghae ita geru. 32Ma giruma katamana ivivi yavi na weni,

“Tuna nakanani ma sipu, irutinaneyei da iti raboboi,

Ma nakanani ma sipu gegeyina, vunivunina eboribori na ke ita tutou,

Tuna bade nakanani, ke iti sisiya.

33Wawaya ikiiviberoi,

ma ke vonavaghata tepanai iti tupavirei,

Ke sago tupurereghina da tisisiyesi,

Iyamna, ina yawasa dobuwai iviitawei.”-

34Ma tomowina Piripo ivi tarakiiyanei bo, “Kuta voneku, peroveta tuna mani ivi sisiya meyei bo wawaya sago isisiyei?” 35Vaghina ma Piripo nani girumina tepanai sisiya ivi karei da Yesu Varana Biibiina ivi debei kurina. 36Ketiyai inenae da ku okowa inekiibau ma Itiyopiya tomowina ivona bo, “Kekitai, wena okowa. Vaghina bo kegha da ana babataito?” 37(-)+

38Ma tomowina ivona na ina seriyoti ivi kiimiiiriyei. Ma ivi ruwa ioru ku okowa da Piripo tomowina ibabataitoi. 39Okowai igheghae na yaghiyaghinai Kanuma Vovokaravina Piripo iviitawei da Itiyopiya tomowina ke ita kita meyei. Ma tomowina ere nuwabiibiina inae. 40Ma Piripo, Asotas kwanatunai irumatara ma baba ivi karei. Kwanatu nununai Yesu varana biibiina idimadimei inenae da ku Sisariya kwanatuna inekiibau.