Search form

Mak 13

Mara damona kana sisiya.

(Mat 24:1-2; Luk 21:5-6)

1Yesu Taparoro Numana ikiikiibutawei na kana kivikivina sago ivona bo, “Bada, kekitai. Wakima irakarakateyana vaghata! Taparoro Numana kana kita ibiibii kirakai!”

2Ma Yesu ivonesi bo, “Weni Taparoro Numana ghamana koideyei, bo? Mara sago wawaya weni wakimisi kudubina ina rikatawei da ke sago wakimina kwinana tepanai ina kena. Peyarina ina kuririghi ku tano.”

Nuwapoya ma vitupaketowana.

(Mat 24:3-14; Luk 21:7-19)

3Yesu na Oliv koyana baranai imakamakai ma anagha nevanai na Taparoro Numana imiimiiri. Ma Pita, Jemes, Jon da Anduru ivi tarakiiyana gavui bo, 4“Kevona. Weni berasi kuvi sisiyei na mara avai ina tupuwa? Ma avi matakirina ini nao, ini akovikai da weni berasi na gisina kava ina tupuwa?”

5Ma Yesu ivonesi bo, “Matami ekita da wawaya ke ini beroberowemi. 6Wawaya ipeyari avakuwai ina pisi ma ina vonavona da ti na God ina Vivinevine Wawayina. Ma bade wawaya ipeyari kirakai i vibero ini tumaghanei. 7Sisiya koni yanei da ghaviya dobu rabarabai etuputupuwa bo sisiya kona viiya da ghaviya kurimi epipisi na ke kona yabumana. Weni berasi ini nao ma mara damona na karakava da ina pisi. 8Dam sago ina vomiiri da dam viruwa kana ghaviya. Ma dobu sago ina vomiiri da dobu viruwa kana ghaviya. Ma nukenuke dobu bogii ma bogiiyai ina tuputupuwa ma bade gomara yavata. Weni berasi na nakanani ma wavine vituwa ita dagui na inivisina iti karei.”

9“Matami ekita ma kovi rewapana. Ina patumimi ma vitupavira babadisi ku imasi ina teremi da kiki numasiyai ina widimi. Taku kubiiku ina patumimi da babada ghamaghamasi ma kiikiivavo maghinosiyai kona miiri da ini tupaviremi. Ma God varana biibiina koni mamatarei kurisi. 10Ma kunona wawaya God varana biibiina ina dimei da dam ma dam kudubisi ini yanei ma muriyai mara damona ina nekiibau. 11Ma maranai ina patumimi ma ini tupaviremi na ke koni nuwapoya da ikikava koni sisiya. Maghinosiyai kona miiri na nani kamonai God nota ina vereveremi na kovi sisiyei. Nakanani kona berai na ke tami kota vivisisiya, ma Kanuma Vovokaravina ini sisiya kubiimi.- 12Wawaya ina vomiiri da varesina ini wawanei. Ma bade morapa tuna mani natuna ini wawanei. Ededa i maduwa mau ma i mami mau ini ghaviyesi na kii puka ina vowai. 13Kokivikiviniku kubiine na wawaya kudubisi ina baremi. Ma iyi tam kuna miirikikina da ku damona na yawasa makamakii nonowina kuna panani.”-

Sawara Bero Kirakiina.

(Mat 24:15-28; Luk 21:20-24)

14“Mara sago kona kitai da ‘Sawara Bero Kirakiina’ Taparoro Numana kamonai God kana gawara ina viiya da gawarina vovokaravina ina puyaki.” (Viyava wawayim na damim kevii bubuni.) “Nani maranai iyavo kava Judiya kamonai komakamakai na yaghiyaghinai ku koya koverau.- 15Ma tam iyai matarai kemakamakai ke kuna rui ku numa kamona da am sawara kuna yuna.- 16Wawaya vao kamonai na veru kevi karei, ke kuna vovira ku numa da kam gara kuna yuna. 17Nani maranai wivine manamanawisi ma vivisususi na ini kamyuyuwa kirakai. 18Konipowana kirakai da weni nuwapoyisi ke nuba kana mara kamonai ina tupuwa. 19Nani marasiyai na nuwapoya ina rakata kirakai, ke mara karenai God dobu iyamoni da ku karako nakanani. Ma murinai nani nuwapoyisi ke meyani ina tupuwame.- 20Nani marana berona ita guri kirakai na wawaya kudubisi ita rabobo yavu. Tuna kubiine God ina boriya da tupona, iyamna iyavo kava ivovinesi da ina wawaya na ini kamyuyuwesi.”

21“Nani maranai mikeda wawaya ina vonemi bo, ‘Kokitai, God ina Vivinevine Wawayina ipisi!’ bo ‘Kokitai, God ina Vivinevine Wawayina nokoni!’ na ke koni tumaghanei, 22iyamna Keriso vivibero ma peroperoveta vivibero ina pisi ma bera ma matakira ghamaghamasi ina berai, ina bera tovoni da God ina wawaya vovinesi ini noraveyana berosi. 23Tuna kubiine kokitaruvimi. Vaghina, mara damona kana bera na karakava ina tupuwa ma namada kudubina avi mamataremi.”

Wawaya Natusi ina nekiibau.

(Mat 24:29-31; Luk 21:25-28)

24“Ma nani nuwapoyisi murinai,

‘Madegha ina didibari

ma nawaravi yaseganina kegha.-

25Gwamegwame kiidamowai ina ririgha,

ma aviyavisina kudubina kunumai na ini nuke yavu.’-

26Nani maranai wawaya kudubisi ina kitai da taku Wawaya Natusi kwavuwai ere rewapaniku ma ere kadariku anororu ku dobu.- 27Ma aku aneya ana vonatawesi da dobu ku kudubina ina ne yavui. Ma God ina wawaya vovinesi ina rutinisi da ini kiidaburana.”+

Kii miibiina.

(Mat 24:32-35; Luk 21:29-33)

28“Kovi yana, kii kona kitai na ini beyemi. Kiina enumonumoi na namada akovina koviiviiya da kwamra kana mara epipisi. 29Ma bade maghimaghighina, nani berasi avivi sisiyei ina tuputupuwa na konakovi da mara damona gisina kava ina pisi, marana namada enenekiibau. 30Vonavaghata avonavonemi da weni kimitina ke ina rabobo yavu ma berasi ina tupuwa.+ 31Kunuma ma dobu ina wapa ma vonaku na ke meyani da ina wapa.”

Ke sago iyai itakovi da mara damona na avi maranai ina tupuwa.

(Mat 24:36-44)

32“Ke sago iyai itakovi da avi maranai weni berasi aisisiyei na ina tupuwa. Aneya kunumai ke itakovi ma bade nakanani taku God Natuna ke atakovi. Aku Mamai ina kina kava iakovi.- 33Tuna kubiine kokitaruvimi ma mara nonowa na kovovunagha meyemi, iyamna ke kotakovi da mara avai ana vovira. 34Tuna nakanani ma tomowa sago ita numataya. Muriyai da ita nae na ina bigabiga sago sago duma i biga iveresi. Ma bade matuketa kana koyakoyagha ivonei bo, ‘Matam ekita.’ Ma ivomiiri, ina numa ivoterei.- 35Ma tami bade nakanani, matami ekita, iyamna ke kotakovi da avi maranai numa badana ina vovira. Raviyai bo didibara punai, kokoreko ina vivitutuwana kamonai bo mara tomtomwai. 36Yaghiyaghinai ina nekiibau na ke ita biibai da ina pananimi da kokenakena. 37Weni sisiyina avonavonemi na bade wawaya kudubisi kii sisiya. ‘Matami ekita.’”