Search form

Mak 15

Yesu, Pailat maghinonai imiiri.

(Mat 27:1-2, 11-14; Luk 23:1-5; Jon 18:28-38)

1Mara boiboi vaghata Sanhidran damsi ivi kiidaburana. Ti na taparoro babadisi i babada ma Jiu damsi i babada ma vonaviyoyovana vibeyebeyena wawayisi na kudubisi Yesu ivivi dughuwei da vivaghina iberai. Ma imana ikutatani ma irutini inae Pailat kurina.+ 2Ma Pailat, Yesu ivonei bo, “Tam Jiu damsi i kiivavo bo?”

Ma Yesu ivonapotei bo, “E, ikikava kisisiya na taku nakanani.”

3Ma taparoro babadisi i babada wavu kudubina Yesu kurina iterei. 4Tuna kubiine Pailat ivi tarakiiyanei bo, “Kade, kuna vonapotesi da kam papara kuna vowai bo kegha? Kiyanei da wavu kudubina kurim etereterei.”

5Ma Yesu ke sago aviyavisina ita vonapotei. Ma Pailat ivi deyei da tuna mani kana papara ke ita vowai.

Pailat ivonakiiyaragha da Yesu ina tuparatui.

(Mat 27:15-26; Luk 23:13-25; Jon 18:39–19:16)

6Pailat ina bera imakamakai da Pasova kamna nununai wawaya sago gabura kamonai ivovotawei. Koroto i kayowana iyai na tuna wawayina ini kiibuni. 7Ma wawaya viya gabura kamonai, ti na Israel damsi ma ivomiiri da ivi ghaviya da Rome damsi ita kwavinisi. Ma nani viruwina kamonai wawaya viya ivi kiivunuwana. Tuna kubiine gabura ku kamona iteresi. Ma sago kana vava na Barabas. 8Ma Yesu patana da Pailat maghinonai imiimiiri na koroto ghamana ipisi ma Pailat ivonei da i kayowana da ikikava madegha nununai iberaberai na nakanani ina berai, wawaya sago gabura kamonai ita terekiibuwei. 9Ma Pailat koroto ivi tarakiiyanesi bo, “Ami kayowana iyai? Kokayokayowei da Jiu dami ami kiivavo ana votawei, bo?” 10Nakanani ivi tarakiiyanesi iyamna iakovi da taparoro babadisi i babada Yesu inuwakapiyei, tuna kubiine ipaniya ma irutinaneyei kurina.

11Ma taparoro babadisi i babada koroto nuwanuwasi ipiroi da peyarisi ke i kayowana Yesu. I kayowana da Barabas ita votawei. 12Ma Pailat ivona bo, “Ma aviyavisina ana berai weni tomowina kurina, tami kovonavona da tuna na Jiu dami ami kiivavo?”

13Ma korotona ikiirarapotei bo, “Kotuparatui.”

14Ma Pailat ivona bo, “Avi kubiine? Aviyavisina ibera beroi?”

Ma kegha, korotona gamosi irakata da ikarayogosi bo, “Kotuparatui!”

15Ma Pailat ina kayowana da nani korotona iti nuwabiibiinisi da nuwanuwasi ita pika. Tuna kubiine Barabas gabura kamonai ivi kiibuni. Ma seri wawayisi ivonesi da Yesu iwidi kirakiiyei ma ivonatawei da ita tuparatui.

Seri wawayisi Yesu ivonavinamei.

(Mat 27:27-31; Jon 19:2-3)

16Seri wawayisi Yesu irutinaruwei da Pailat ina numa garina ku kamona. Ma gawara kana vava Praitoriyum ku kamona irui ma turaturasi ikwaturiyariyesi. 17Tarasovo yebayebarina iviini da Yesu ivi kotei.+ 18Ma ivi karei da ivonavonavinamei bo, “Kiiwa kiiwa! Tam Jiu damsi i kiivavo ghamam!” 19Ma diwona ikavarapiyei da gayamina iraravi ma bade ikanukanui. Ivivi tuwaporeruruwana ma ere vivinamesi irurunomei. 20Ivi namei ikovi na tarasovo yebayebarina ivotawei ma kana gara vaghata ivi kote meyei. Ma irutinakiibuwei da ita tuparatui.

Yesu ituparatui.

(Mat 27:32-44; Luk 23:26-43; Jon 19:17-27)

21Ketiyai inenae ma tomowa kana vava Saimon ipanani, tuna wekarakava dobu rabarabai ipisi da ku Jerusalem irurui. Tomowina ina dobu Sairini ma natunatuna kii vava Ariksanda ma Rupas. Seri wawayisi ikwatui ma idarui da Yesu kana korosi ita kavari ma yavata ita nae.- 22Ma Yesu irutini inae da ku gawara kana vava Gorugata, nani vavana iyamna ‘Teuteu Gawarina.’ 23Ma wain ita verei da itumai, kamonai na gegura kana vava meya ivirai. Ma Yesu ibarei. 24Ma muriyai na ituparatui. Ma kana gara ita vorereghi kubiine na virekwa sago iberai da kamosiyai Yesu kana gara irereghi.- 25Marana ituparatui na madegha namada ivovomuyamuya.+ 26Ma gayamina tepanai giruma sago itutui ivi debei da avi wavuna ikavakavari. Igiruma bo, “Jiu damsi i kiivavo.” 27Ma yapiyapi wawayisi ruwa yavata ituparatusi, sago ku katagheyana ma sago ku dugena.- 28(-)+

29Ma wawaya ketiyai ibababa na ivivi avaberowei ma gayamisi ivivi ruruwini. Ikiikiirara bo, “Damidamina! Taparoro Numana kuta rikai ma mara aroba kamonai kuta vowa meyei.- 30Korosi tepanai keoru da kuni yawasa meyem!”

31Ma bade nakanani taparoro babadisi i babada ma vonaviyoyovana vibeyebeyena wawayisi Yesu ikarakara vibagibagiyei. Ma ti mani kamosiyai ivonavona bo, “Wawaya ivivi yawasisi ma ke kovokovoghina da tuna mani ini yawasa meyei. 32Ivona da tuna na God ina Vivinevine Wawayina ma Israel ina kiivavo. Mede wekarakava korosiyai eoru da takitai ma titumaghanei.”

Ma tomotomowa ruwa Yesu yavata ituparatusi na ti bade ivi avaberowei.

Yesu irabobo.

(Mat 27:45-56; Luk 23:44-49; Jon 19:28-30)

33Madegha punai dobu kudubina ivi didibara yavui ma nakanani imakai da madegha inubanuba kana ku mara.+ 34Ma tuna maranai Yesu ikiirara bo, “Eloi, Eloi, lama sabachthani?” iyamna, “Aku God, aku God, avi kubiine kukuyoweku?”-

35Ma wawaya viya ririnai imiimiiri na ivi yanei ma ivona bo, “Kovi yana, Elaidiya ekwatukwatui.”

36Ma tomowa sago iverau da gumba+ ivokutuvi wain tomatomana ku kamona ma kiiyai ivi kavini ma ivororona da Yesu ita susui. Ma ivona bo, “Wekarakava na tavoterei. Takitai da kade Elaidiya ina pisi da ina tereoruwei.”-

37Ma Yesu ikiirara, yana turina itawei ma irabobo.

38Irabobo na Taparoro Numana garana itamosika da ruwa. Tepanai da ioru ku kapina.+ 39Ma senturiyon, tuna seri wawayisi i bada Yesu maghinonai imiimiiri na ivi yanei da ikiirara, ma ikitai da ikikava irabobo. Ma ivona bo, “Vonavaghata, weni tomowina na God Natuna.”

40Ma wivine viya gisina rabarabai imiimiiri ma kamosiyai na Meri Magadarini, Sayome ma Meri (tuna na Jemes murimurina ma Joses i maduwa).- 41Weni wivinesi na Yesu ikivikivini, yavata ibababa Gariri kamonai da ikoyakoyaghi. Ma bade wivine viya ikivini, ti na yavata ighae ku Jerusalem.

Yesu tupuwina ku buba iterei.

(Mat 27:57-61; Luk 23:50-56; Jon 19:38-42)

42Vovunagha marana kamonai na Yesu irabobo. Ravi ita pika na viyakam marana iti karei.+ Gisina kava ravi ita pika, 43tuna kubiine tomowa sago kana vava Josepa Arimateya ivi yaghiyaghina ma ere tepatorana inae Pailat kurina. Tuna na wawaya ghamana Sanhidran kamonai ma nimonimoriyai ivivi koyakoyagha da God ina vikiivavona ita pisi. Inae ma ivi nowi da Yesu tupuwina ita viiya. 44Pailat ivi yanei da Yesu namada irabobo ma ivi deyei. Senturiyon ikwatui ma ivi tarakiiyanei da vonavaghata da irabobo bo kegha. 45Ma akova senturiyon gwabinai iviiya da irabobo ikovi na ivi vaghinei da Josepa, Yesu tupuwina ita viiya. 46Ma Josepa inae da gara vuna igimari+ ma Yesu tupuwina korosiyai itereoruwei da igerei, ma buba ku kamona iterei. Bubana na koya baranai itarai da karawaga iyamoni. Muriyai wakima ghamana itabiri inae da bubana igudupotai. 47Ma Meri Magadarini ma Joses ina maduwa Meri na ivi ruwa ikitai da tupuwina meni dobunai iterei.