Search form

Matiu 25

Wiwikesi imaruwa miibiina.

1Yesu ivona bo, “God ina vikiivavona na weni nakanani. Mara sago wiwike imaruwa, i rampa ikavara ma inae da tomowa ita tavine na verupotena kubiine.- 2Kamosiyai wivine miikovi na nuwanuwagiurisi ma miikovi na neghaneghasi. 3Neghaneghasi na i rampa ikavara ma kamonai kii oira ke ghamana. 4Ma nuwanuwagiurisi na i rampa ikavara ma bade kii oira ku diudeu kamosi itepo na yavata ikavara. 5Tavine tomowina ivivi kayovira kubiine, wiwikesi matasi ipota na ivivi keneyana.”

6“Nubakutuva basunai ma yonayona wawayina ikiirara bo, ‘Tavine tomowina epipisi! Kokiibau da kona verupotei!’ 7Wiwikesi irumatamatakeyana da i rampa ivovovunagha. 8Ma neghaneghasi turaturasi kurisi ivi nowi bo, ‘Kade oira gisina kota verekai, akii rampa epekipeki.’ 9Ma nuwanuwagiurisi ivonapotesi bo, ‘Kegha. Konae da kubiimi kona gimara. Ke ruvaruvana da kana votepowemi.’ 10Vaghina ma, neghaneghasi inae da i oira ita gimara ma nani kamonai tavine tomowina inekiibau. Ma wiwikesi miikovi ivovunagha na tomowina yavata irui ku numa tavine kamna kubiine ma matuketa igudui.”

11“Muriyai neghaneghasi inekiibau ma ikwatukwatu bo, ‘Bada, Bada! Matuketa kevotawei da kana rui!’- 12Ma ivonapotesi bo, ‘Kegha! Vonavaghata avonavonemi da tami ke atakovimi!’” 13Ma Yesu ina sisiya turina iterei, ivona bo, “Tuna kubiine kovovunagha meyemi, iyamna ke kotakovi da mara avai Wawaya Natusi ina nekiibau.”

Bigabiga ivi aroba miibiina.

(Luk 19:11-27)

14Yesu ivonesi bo, “Ma bade God ina vikiivavona na weni nakanani. Mara sago mura tomowina ita numataya. Ina bigabiga ikwatusi ma ivi varavarisi da ina mura ita koyagha bubuni. 15Ma i akova ruvanai mane irereghisi. Sago na 5 tausan gold riririghisi, sago na 2 tausan gold riririghisi ma sago na 1 tausan gold riririghisi iverei. Ma iverukuyowesi da inae. 16Bigabiga tomowina 5 tausan iviiya na maninina inae da ivi gimagimara ma bade ku tepana 5 tausan ipanani. 17Ma bigabiga tomowina 2 tausan iviiya na berana sago iberai da ivi gimagimara da ku tepana 2 tausan ipanani. 18Ma bigabiga tomowina 1 tausan iviiya na inae da dowa iyabai ma ina bada ina mane iteregavui.”+

19“Mara gurina murinai ma mura tomowina ivovira. Ma ina bigabiga ikwaturiyariyesi da iti tarakiiyanesi da mane iveresi na ikikava iberai. 20Ma bigabiga tomowina sago ipisi ma ivona bo, ‘Bada, 5 tausan kuvereku na ku tepana 5 tausan aberai na kekitai, weni.’ 21Ma ina bada ivonapotei bo, ‘Kubera bubuni, tam bigabiga biibiim! Bera gisigisi kubiisi kuvi patutu kirakai, tuna kubiine ana terem da bera ghamaghamasi kuni badei. Kerui da yavata tinuwabiibai.’”

22“Ma bigabiga tomowina kana viruwa ipisi ma ivona bo, ‘Bada, 2 tausan kuvereku na ku tepana 2 tausan aberai na kekitai, weni.’ 23Ma ina bada ivonapotei bo, ‘Kubera bubuni, tam bigabiga biibiim! Bera gisigisi kubiisi kuvi patutu kirakai, tuna kubiine ana terem da bera ghamaghamasi kuni badei. Kerui da yavata tinuwabiibai.’”

24“Ma bigabiga tomowina turina ipisi ma ivona bo, ‘Bada, akovim da tam na wawaya bagibagim. Pei ke kuta vovoni ma keyabayaba. Wereka ke kuta bubuni ma kevovopura. 25Tuna kubiine ayabumanem ma anae da am 1 tausan gold riririghisi tano kamonai ateregavui. Kekitai, am mane na weni.’ 26Ma ina bada ivonapotei bo, ‘Tam bigabiga berom, kayobarim! Namada kuakovi da taku pei ke ata vovoni ma kegha da ayabayaba, ma wereka ke ata bubuni ma kegha da avovopura. 27Aku gold riririghisi averem na mane kii vovidaburana wawayisi benki kamonai kuta veresi da mane gisina ku tepana ita yamoni. Ma maranai avovira na aku mane gwabisiyai kuta viiya ma bade ku tepana iyamoni na yavata kuta vereku.’”

28“Ma ina wawaya ivonesi bo, ‘Weni bigabiga wawayina gwabinai gold riririghisi koviitawei da nokoni bigabiga wawayina 10 tausan gwabinai na tuna kona verei.’

29‘Avonavonemi da iyavo kava avi puyona God gwabinai iviiya ma ina bera bubuni na ku tepana ina vere kirakiiyesi. Ma iyavo kava puyo gisina gwabisiyai ma ke ina bera bubuni na God kudubina ina viitawei.- 30Ma weni bigabiga kayobarina kotawanakiibuwei ku nubakutuva. Nani dobunai ina tutou ma okena ina vivitarakikitei.’”-

Vitupavira turina.

31“Mara sago Wawaya Natusi ere kadarina ma ere rewapanina ina aneya yavata ina nekiibau na ina vikiivavo gawarina tepanai ina makiivipika ma ini bada.- 32Ma wawaya dam ma dam ku maghinona ina kiiriyariyesi ma wawaya ina vorereghisi da koroto ruwa. Nakanani ma sipu kii koyakoyagha ghamoghamo ita rereghisi da sipu bogiiyai ma gote bogiiyai. 33God ina wawaya maninisi, ti nakanani ma sipu na ina vonatawesi da katagheyanai ina makai. Ma wawaya ke maninisi na ina vonatawesi da dugenai ina makai, ti nakanani ma gote. 34Nani murinai na Kiivavo ina vona bo, ‘Tami katagheyakuwai na kopisi. Aku Mamai ivi biibiinimi. Dobu karenai ina vikiivavona ivovunaghi tami kubiimi da koni rapenei, 35iyamna vitonara ikariku na vavai kovereku da akani. Kaiyoku ikanakana na okowa kovereku da aumai. Anumataya ma ke kotakoviku ma kegha da korutiniku ami ku numa. 36Kaku gara kegha na gara kovereku. Agubaga na korapa bubuniku. Taku gabura kamonai na korugenariku.’ 37Ma wawaya maninisi ivonapotei bo, ‘Bada, avi maranai kakitim da vitonara ikarim na kavi kanim? Bo kaiyom ikanakana na okowa kaverem? 38Ma avi maranai ke katakovim ma kegha da karutinim akii ku numa? Bo kam gara kegha ma gara kaverem? 39Avi maranai kugubaga na kanae kakitim? Bo gabura kamonai kumakamakai na karugenarim?’ 40Ma kiivavo ina vonapotesi bo, ‘Vonavaghata avonavonemi, wawayota vivikamyuyuwina na nakanani ma varesiku. Ma aviyavisina kurina koberai na nakanani ma taku kuriku kota berai.’”

41“Ma wawaya dugenai ina vonesi bo, ‘Konetaweyana! Tami God ivi magimi. Keyama karata makamakii nonowina ivovunaghi da Devil ma ina aneya kubiisi na tami yavata nake konae, 42iyamna vitonara ikariku na vavai ke kota vereku. Kaiyoku ikanakana na okowa ke kota vereku. 43Ke kotakoviku na kokitakuyoweku da ke kota rutiniku ami ku numa. Kaku gara kegha na gara ke kota vereku. Gabura kamonai agubaga na ke kota rugenariku.’”

44“Ma nani wawayisi dugenai ina vonapotei bo, ‘Bada, avi maranai kakitim da vitonara ikarakarim, bo kaiyom ikanakana, bo kunumataya da kakitakuyowem, bo kam gara kegha, bo kugubaga gabura kamonai na ke kati vitem?’ 45Ma kiivavo ina vonapotesi bo, ‘Vonavaghata avonavonemi, wawayota vivikamyuyuwina kokitakuyowei ma ke koti vitei na tuna nakanani ma taku kuriku kota berai.’ 46Vaghina ma, nani damsi dugenai na ina nae da kovogha makamakii nonowina ina viiya. Ma wawaya maninisi na ina nae da yawasa makamakii nonowina ina viiya.”-