Search form

1 Corintios 1

Cartapa qallariyninmanta

1Ñoqa Pablotam munayninman hina Dios qayaykuwarqa Jesucristopa apostolnin kanaypaq. Iñiqmasinchik Sostenespiwanmi 2-Corinto llaqtapi iglesiaman kay cartata qellqamuykichik, qamkunaqa kankichik Cristo Jesuspi Diospa akllasqankunam. Diosmi qayasurqankichik Señor Jesucristota maypipas yupaychaqkunawan kuska akllasqakuna hina kawsanaykichikpaq. Jesusmi, paykunapapas ñoqanchikpapas Señorninchikqa. 3Dios Taytanchikwan Señorninchik Jesucristoyá hawkayaytawan kuyakuyninta qamkunaman qosunkichik.

Cristorayku bendecisqa kaymanta

4Tukuy tiempom qamkunamanta Diosman graciasta qoni, Jesucristontakama kuyakuyninta Dios qosusqaykichikmanta. 5Cristowan huklla kasqaykichikraykum Dios yanapasurqankichik allinta rimanaykichikpaq hinaspa allin yachayniyuq kanaykichikpaq. 6Cristomanta willakusqaykutam qamkunaqa allin kawsakuynikichikwan willakuchkankichik. 7Chaynapi Señorninchik Jesucristo rikurimunanta suyasqaykichikpi, Diospa qosusqaykichik mayqan atiyninpas mana pisisunaykichikpaq. 8Paytaqmi tukupay tiempokama takyachisunkichik, Señorninchik Jesucristo kutimuptin mana pipapas acusasqan kanaykichikpaq. 9Diosqa prometesqantaqa cumplinmi, payqa Churin Señorninchik Jesucristowan huklla kanaykichikpaqmi qayasurqankichik.

Iñiqpura rakinakurusqankumanta

10Wawqe-panillaykuna, Señorninchik Jesucristopa sutinpim ruegakamuykichik, rimaynikichikpas hukllayá kachun, amayá qamkunapiqa rakinakuyqa kachunchu; qamkunaqa huk sonqollayá hinaspa huk piensayniyuqllayá kaychik. 11Wawqe-panikuna, Cloepa ayllunmi niwan qamkuna ukupi liryanakuy kasqanmanta. 12-Kaytam nisqaykichik, qamkunam kaynata ninakunkichik:

Ñoqaqa Pablopam kani, ñoqaqa Apolospam kani, ñoqaqa Pedropam kani, ñoqañataqmi Cristopa kani, nispaykichik.

13¿Cristoqa rakinasqachu kachkan? ¿Pablochu qamkunarayku chakatasqa karqa? ¿Icha Pablopa sutinpichum bautizasqa karqankichik? 14--Diosman gracias kachun manam mayqannikichiktapas bautizarqaykichikchu, ñoqaqa bautizarqani Crispotawan Gayollatam, 15chaynaqa manam pipas ninmanchu sutiypi bautizasqaytaqa. 16-Bautizarqanitaqmi Estefanaspa aylluntapas, ichaqa manam yuyanichu hukkuna bautizasqaytaqa. 17Cristoqa kachamuwarqa manam bautizanaypaqchu, aswanqa allin noticiata willanaypaqmi, ichaqa manam runapa yachayninwanchu, chaynapi Cristopa chakatachikusqan mana yanqachasqa kananpaq.

Cristollapi Diospa atiyninwan yachayninqa kasqanmanta

18Chinkasqakunapaqqa, Cristopa cruzpi wañusqanmanta willakuyqa mana valeqpaq hapisqam, salvakuy munaqkunapaqmi ichaqa kay willakuyqa atiyniyuq. 19-Chuya Qellqapas kaynatam nin:

“Yachaysapa runapa yachaynintam chinkarachisaq,

yuyaysapa runapa yuyaynintam waspirachisaq”, nispa.

20-¿Maypitaq yachaysapa kachkan? ¿Maypitaq Diospa leynin yachachiq kachkan? ¿Maypitaq kay pachapi kaqkunamanta rimaq kachkan? Diosmi kay pachapi runakunapa yachayninta yanqacharun. 21Kay pachapi runakunaqa kikinkupa yachayninwanmi Diosta mana reqsirqakuchu, hinaptinmi Diosqa hatun yachayniyuq kaspa iñiqkunata salvayta munarqa Cristomanta allin noticiata willachispan, chaynatam kay pachapi runakunapaq ruwarqa, kay allin noticia mana valeqpaq rikchakuchkaptinpas.

22Judiokunam milagrokuna qawayta munanku, griegokunañataqmi yachayta maskanku, 23ñoqanchikmi ichaqa chakatasqa Cristomanta willakunchik. Judiokunapaqñataqmi kay willakuyqa urmachiqninku hina, mana judío kaqkunapaqñataqmi mana valeqman rikchakun. 24Diospa qayasqankunapaqñataqmi ichaqa judío kaptinpas, mana judío kaptinpas, Cristoqa Diospa atiyninwan hinaspa Diospa yachaynin. 25Diospa imapas yachachisqanqa runakuna mana valeqpaq hapichkaptinpas, runakunapa yachayninkumantaqa aswan yachayniyuqmi. Chaynataqmi Diospa imapas ruwasqanqa runakunapaq facilla rikchakapuptinpas, paykunapa ruwasqanmantaqa aswan atiywan ruwasqa kachkan. 26Wawqe-panikuna, imaynam qayasqa kasqaykichikmanta qawarikuychik, runakunapa qawasqanman hinaqa qamkuna ukupiqa asllam yachayniyuqkunaqa, asllataqmi atiyniyuqpas chaynataq ancha reqsisqakunapas kachkankichik. 27Aswanqa kay pachapi mana yachayniyuqkunatam Dios akllarqa, chaynapi yachayniyuqkunata penqayman churananpaq. Akllarqataqmi kay pachapi mana atiyniyuqkunatapas, chaynapi atiyniyuqkunata penqayman churananpaq. 28Diosqa akllarqa kay pachapi wakchakunatawan, despreciasqakunatam hinaspa mana imapaqpas valeqkunatam, chaynapi hatunchakuqkunata mana kaqpaqña churananpaq. 29Chaynapi Diospa qayllanpi mana pipas hatun tukunanpaq. 30Ichaqa qamkunataqa Diospunim Cristo Jesuswan hukllawasurqankichik, paytam churarqa yachayninchik, pampachaqninchik, chuyanchaqninchik hinaspa salvaqninchik kananpaq. 31-Imaynam Qellqapa kayna nisqanman hina:

“Pipas alabakuyta munaspaqa Señormantayá alabakuchun”, nispa.