Search form

1 Pedro 1

Cartapa qallariyninmanta

1Jesucristopa apostolnin ñoqa Pedrom qellqamuykichik, Ponto lawpi, Galacia lawpi, Capadocia lawpi, Asia lawpi hinaspa Bitinia lawpi cheqesqakunaman. 2Qamkunataqa Dios Taytam yachayninman hina ñawpaqmantaraq akllasurqankichik. Espiritunwanmi chuyanchasurqankichik kasukuq kanaykichikpaq hinaspa Jesucristopa yawarninwan mayllasqa kanaykichikpaq. Diospa kuyakuyninwan hinaspa hawkayayninyá qamkunapi llimparichun.

Confianzawan kawsaymanta

3Señorninchik Jesucristopa Taytan Diostayá qapaqchasunchik, paymi hatun kuyapayakuyninman hina Jesucristopa kawsarimusqanwan musoqmanta nacechiwarqanchik. Chay confianzawan suyaspam kawsachkanchik. 4Chaynapim qamkunapas chaskinkichik Diospa hanaq pachapi waqaychasqan herenciata, chayqa mana tukuqmi, mana qachachakuqmi, mana chakiqmi. 5Qamkunaqa Diospi iñiyniyuq kasqaykichikraykum, payqa atiyninwan waqaychasunkichik salvación haypanaykichikpaq, chayqa allichasqañam kachkan tukupay punchawpi reqsisqa kananpaq.

6Chayraykum qamkunaqa llumpay kusisqa kachkankichik pisi tiempollapas achka sasachakuykunata ñakarinaykichik kachkaptinpas. 7Qoripa allin kasqantapas otaq mana allin kasqantapas yachanapaqqa ninapim chulluchinku, chaynam iñiynikichikpas pruebasqa kanqa. Tukuruqlla qorimantapas chay iñiynikichikmi aswanqa valen. Jesucristo rikurimuptinmi chay iñiynikichikqa alabasqa, qapaqchasqa hinaspa hatunchasqa kanqa.

8Jesucristotaqa mana rikuchkaspapas kuyankichikmi, creenkichiktaqmi mana rikuchkaspapas, payta hatunchaspam llumpa-llumpayta kusikunkichik, chaymantaqa manam imayna rimariytapas atichwanchu. 9Iñisqaykichikraykullam almaykichikpa salvacionnintapas chaskinkichik.

10Ñawpaq tiempokunapim profetakuna allinta estudiarqaku hinaspa kay salvacionmanta sumaqta tapukachakurqaku, hinaspam imayna Diospa kuyakuyninmanta willakurqaku. 11Cristopa Espiritunmi profetakunaman ñawpaqmantaraq yachachirqa Cristopa ñakarinanmanta hinaspa chaykuna pasaruptin hatunchasqa kananmanta. Paykunam yachaykuyta munarqaku Cristopa imaynam ñakarinanmanta hinaspa chaykunapa qepanta hatun kusikuy hamunanmanta. 12Diosmi paykunaman nirqa chay willakusqankuqa mana kikillankupaqchu, aswanqa ñoqanchikpaqwan kasqanmanta. Kunanñataqmi salvacionmanta willakuqkunaqa willasuchkankichik hanaq pachamanta hamuq Chuya Espiritupa yanapakuyninwan. Chaykunataqa angelkunapas yachaykuytam munanku.

Diosllapaqña kawsakuymanta

13Chaynaqa, listolla kaspayá imam ruwanaykichikmanta sumaqta yuyaymanaychik, rikchan-rikchanllayá kaychik Jesucristo rikurimuptin Diospa kuyakuyninman hina imam qosunaykichikta tukuy sonqoykichikwan suyaspa. 14Kasukuq churinkuna hinayá kawsaychik, amañayá Diosta manaraq reqsispa ñawpaq vidaykichikpi hinaqa kawsaychikchu. 15Aswanqa, imaynam qayasuqnikichik Diospas chuya, chaynayá qamkunapas tukuy kawsaynikichikpi chuya kaychik. 16-Qellqasqam kachkan:

“Chuyayá kaychik, imaynam ñoqapas chuya kasqayrayku”, niq.

17Sichum “Taytáy” ninkichik pimanpas mana sayapakuspa runakunapa ruwayninman hina juzgaq Diosta, hinaspaqa tukuy tiempo kasukuspayá huklaw llaqtayuq hina kawsaychik. 18Diosmi ñawpaq taytaykichikpa mana allin costumbrenkuna chaskisqaykichikmanta salvasurqankichik. Yachasqaykichikpi hinapas kay salvacionpa preciontaqa manam pipas pagarqa tukuruqlla qoriwanchu nitaq qollqewanchu, 19aswanqa Cristom pagarqa precioyuq chuyay-chuyay yawarninwan, chayqa karqa mana manchayuq sano carneropa yawarnin hinam. 20Chaynata wañunanpaqqa manaraqpas kay pacha unanchasqa kachkaptinmi citasqaña karqa, ichaqa kay tukupay tiempokunapim kuyasusqaykichikrayku rikurimurqa. 21Señorninchik Jesucristontakamam Diospiqa iñinkichik, paymi wañuqkuna ukumanta Cristota kawsarichimuspan hatuncharqa, chaynataqa ruwarqa iñiynikichik hinaspa imapas suyasqaykichik Diosllapiña kanapaqmi.

22Kunanqa Espirituntakama cheqap kaqta kasukuspam, almaykichiktapas chuyancharunkichikña wawqe-paninchikkunawan kuyanakunaykichikpaq. Chaynaqa, qamkunapurayá chuya sonqoykichikwan hinaspa tukuy kallpaykichikwan kuyanakuychik. 23Qamkunaqa musoqmantam nacerqankichik, ichaqa manam wañuq tayta-mamamantachu, aswanqa Diospa kawsaq hinaspa takyaq palabranmantam. 24Chuya Qellqam kaynata nin:

“Llapa runakunaqa qora hinallam,

kuyayllapaq kayninkupas qorapa waytan hinallam.

Qora chakiruptinqa waytanpas wichirunmi.

25-Señorpa palabranmi ichaqa wiña-wiñaypaq takyan”, nispa.

Chay palabranqa allin noticiam, qamkunamanmi willasqa karqa.