Search form

1 Tesalonicenses 1

Cartapa qallariyninmanta

1-Ñoqa Pablom, Silvanowan hinaspa Timoteowan kay cartata Tesalónica llaqtapi kaq iglesiaman apachimuykiku, qamkunaqa Dios Taytawan hinaspa Señor Jesucristowanmi huklla kachkankichik. Dios Taytawan Señor Jesucristoyá kuyakuynintawan hinaspa hawkayayninta qamkunaman chaqchurimuchun.

Tesalónica llaqtapi kaq iñiqkunapa allin ejemplonmanta

2Qamkunamantam tukuy tiempo Diosman graciasta qoniku, sapa mañakuyniykupipas yuyarikikum. 3Yuyarinikutaqmi Dios Taytanchikpa qayllanpi iñiynikichikman hina llamkasqaykichikta, kuyakuynikichikman hina servisqaykichikmanta hinaspa Señorninchik Jesucristorayku ñakarispa qaqa hina sayasqaykichikmantapas. 4Diospa kuyasqan wawqe-paniykuna, yachanikum Dios akllasqan kasqaykichiktaqa. 5Qamkunaman Cristomanta allin noticia willasqaykutaqa manam rimayllachu-rimarqaniku, aswanqa Chuya Espiritupa atiyninwanmi chayamusurqankichik, ñoqaykupas cheqappaq hapispaykum willarqaykiku. Yachasqaykichikpi hinapas qamkunata kuyaspam allinta kawsarqaniku.

6-Qamkunaqa ñoqaykupa hinaspa Señorninchikpa ejemplontam qatichkankichik, llumpayta ñakarichkaspaykichikpas Diospa palabrantam Chuya Espiritupa kusikuy qosusqaykichikwan chaskirqankichik. 7Chaynapim qamkunaqa Macedonia lawpi hinaspa Acaya lawpi llapallan iñiqkunapaqpas ejemplonña kachkankichik. 8Qamkunamanta qallaykuspam Señorpa palabranqa willakusqa karqa. Chayqa manam Macedonia lawllapichu nitaq Acaya lawllapichu, aswanqa tukuy hinastinpim. Diosman iñisqaykichikmantaqa lliwñam yacharunku chaymi ñoqaykuqa manaña willakunaykuñachu. 9Paykunañam willakuchkanku qamkunaman chayamuptiyku imaynam chaskiwasqaykikuta hinaspa Diosman iñikuspaykichik idolokunata qepanchakuruspa kawsaq cheqap Diostaña servisqaykichikmantapas, 10willakuchkankutaqmi hanaq pachamanta Diospa Churin Jesús kutimunan suyasqaykichiktapas, paytam wañusqanmanta Dios kawsarichimurqa. Paymi hamuq tiempokunapi castigomanta librawasunchik.