Search form

2 Corintios 1

Cartapa qallariyninmanta

1-Diospa munayninman hina Jesucristopa apostolnin ñoqa Pablom, wawqenchik Timoteopiwan, Corinto llaqtapi Diospa iglesiaman hinaspa Acaya lawpi kaq iñiqkunaman qellqamuykiku. 2Dios Taytanchikyá Señorninchik Jesucristopiwan kuyakuynintawan, hawkayayninta qosunkichik.

Pablopa ñakarisqankunamanta

3Señor Jesucristopa Taytan Diosninchikyá qapaqchasqa kachun, payqa llakipayakuq Taytam hinaspa sonqo tiyachiq Diosmi. 4Paymi tukuy sasachakuyninchikpi kallpanchawanchik, chaynapi ñoqanchikpas sasachakuypi kaqkunata Diospa kallpanchawasqanchikman hina kallpanchananchikpaq.

5Jesucristoraykum llumpayta ñakarinchik, hina paynintakamallataqmi sinchi kallpanchakuytapas chaskinchik. 6Ñoqayku ñakariptiykuqa qamkunam kallpanchasqa hinaspa salvasqa kankichik, sichum Dios kallpanchawaptinkuqa qamkunapas kallpanchasqa kaspam salvasqa kankichik, chaynapi imaynam ñakarisqaykuta hina, qamkunapas ñakarispaykichik pacienciakuspa allinta takyanaykichikpaq.

7Qamkunapim llumpayta confiakuniku, yachanikum ñakariqmasiyku kasqaykichikta, yachanikutaqmi llakipayasqamasiyku kasqaykichiktapas.

8-Wawqe-panillaykuna, Asia lawpi ñakarisqaykumantam yachanaykichikta munaniku. Chaypim hatu-hatun sasachakuypi karqaniku, manaña kallpaykupas kanankama, manañam kawsaytapas piensarqanikuñachu. 9Wañuypa patanpiñam karqaniku, kaykunam ichaqa yachachiwarqaku mana kikillaykupi hapipakuq kanaykupaq, aswanqa wañuqkuna kawsarichiq Diosllamanña hapipakuyta yachanaykupaq.

10Wañuymantapas Diosmi librawarqaku, paytaqmi qepatapas librawanqaku. Confiakuchkanikutaqmi hamuq punchawkunapipas librawanankuta.

11Sichum qamkuna ñoqaykupaq Diosta mañakuspa yanapawaptikikuqa. Sichum ñoqaykupaq Diosta achkaq mañakuptinkuqa, achkaqtaqmi Diosmanta graciasta qonqaku tukuy imapas chaskisqaykumanta.

Corinto llaqtaman Pablopa mana riy atisqanmanta

12Kaywanmi kusisqa kachkaniku, ñoqaykuqa kay pachapipas chaynataq qayllaykichikpipas allintam kawsarqaniku. Diosmi yanapawarqaku mana engañakuspa payllapaqña kawsanaykupaq, chaynataqa kawsarqaniku manam yachayniyuq kasqaykuraykuchu. 13Cartakuna apachimusqaykuqa manam leespa sasa entiendeychu, aswanqa entiendenaykichikpaq hinallam, ima allincha kanman lliwta entiendeptikichikqa. 14Wakintaqa entienderunkichikñam, Señor Jesuspa kutimusqan punchawmi ñoqaykumanta kusisqa kankichik, chaynallataqmi ñoqaykupas qamkunamanta kusikusaqku.

15Kay confianzawanmi puntata qamkuna watukuq hamuyta munarqani, chaynapi ristinpas hinaspa kutimustinpas yanapaykunaypaq. 16-Macedonia lawman riq hinam qamkuna watukuykuyta munarqani, chaynataqmi kutimustinpas watukuykuytataq munarqani, chaynapi Judea lawman rinaypaq yanapaykuwanaykichikpaq.

17Chay piensasqayqa ¿manachum allin karqa? ¿Mana iñiq runa hinachu ruwarqani? ¿Arí, niruchkaspaychu “Manam” nirqani? 18Diosqa sumaqtam yachan qamkunaman imam kaq nisqaykutaqa. 19-Silvanopa, Timoteopa hinaspa ñoqapa qamkunaman willasqay Diospa Churin Cristo Jesusqa manam “Arí” nirqachu nitaq “Manam” nirqachu. Cristopiqa lliwmi “Arí” niylla. 20Paypim Diospa llapallan prometesqankunaqa cumplikun, chaymi Diosta alabaspa Cristo Jesusnintakama “Amén” ninchik.

21Diosmi ñoqaykutapas chaynataq qamkunatapas Cristopi qaqa hina sayaqta ruwawarqanchik, hinaspam sapaqchawarqanchik payllapaqña kawsananchikpaq. 22Paytaqmi sellowan marcawarqanchik hinaspa Chuya Espiritutapas sonqonchikman garantiata hina qoykuwarqanchik.

23Ichaqa almayraykum Diosta testigopaq churani, qamkunata llakipayaspaymi Corinto llaqtamanqa manaraq hamurqaniraqchu. 24Ñoqaykuqa manam iñisqaykichikpi munaychakuytachu munachkaniku, munachkanikuqa kusisqa kanaykichikpaq yanapaykuytam, qamkunaqa qaqa hinañam iñisqaykichikpi sayachkankichik.