Search form

2 Juan 1

Cartapa qallariyninmanta

1Ñoqa ancianom, Diospa akllasqan señoramanwan wawankunaman qellqamuykichik. Qamkunataqa cheqaptam kuyaykichik, manataqmi ñoqallachu aswanqa haykam cheqap kaq reqsiqkunapiwanmi. 2Kuyaykikuqa ñoqanchikpi cheqap kaq takyasqanraykum, chayqa wiña-wiñaypaqmi ñoqanchikwan kanqa.

3Dios Taytanchikpa hinaspa Dios Taytapa churin Jesucristoyá kuyakuyninman hina, llakipakuyninta, hawkayayninta, cheqap kayninta hinaspa kuyakuyninta qamkunaman chaqchurimusunkichik.

4Wakin wawaykikunatam tariramuni, imaynam Dios Taytanchikpa kamachikuynin chaskisqanchikman hina cheqap kaqpi kawsachkaqta, chaymi llumpay kusisqa kachkani. 5-Señora, kunanñataqmi ruegakamuyki lliwchanchikyá kuyanakusun. Kay qellqamusqayqa manam musoq kamachikuychu, aswanqa ñawpaqmantaraq Diospa qowasqanchik kamachikuymi.

6Kuyanakuyqa Diospa kamachikuyninkunaman hina kawsakuymi, ñawpaqmantaraq uyarisqaykipi hinapas kamachiwarqanchikqa kuyanakuspa kawsananchikpaqmi.

Pantachikuqkunamanta

7Achkaq pantachikuqkunam kay pachapi purichkanku, paykunaqa Jesucristopa runa kayninpi hamusqantapas negankum, chayna yachachiqkunaqa pantachikuqmi hinaspa anticristom. 8Cuidakuychikyá tukuy llamkasqaykichikpa ruruynin ama yanqachasqa kananpaq, chaynapi llapan premioykichikta Señorninchikmanta chaskinaykichikpaq.

9Pantaruspa Jesucristopa yachachikuyninpi mana takyaq runapiqa Diosqa manam kanchu. Jesucristopa yachachikuyninkunapi takyaq runapim ichaqa Dios Taytapas hinaspa Dios Churipas kachkan. 10Sichum pipas qamkunaman hamuspa mana Jesucristopa yachachikuynintachu apamusunkichik hinaptinqa amayá chaskiychikchu nitaq “yaykukamuy” niychikchu. 11Pipas “yaykukamuy” niqqa mana allin ruwaqmasinñam rikurirun.

Cartapa tukuyninmanta

12Achkam qamkunaman qellqamunay kachkan, ichaqa manam cartallawanqa lliwtaqa nimuykichikmanchu, chaymi piensachkani watukamuspayña qamkunawan rimayta, chaynapi anchata kusikunanchikpaq.

13Diosninchikpa akllasqan ñañaykipa wawankunam rimaykamusunkichik. Amén.