Search form

2 Pedro 1

Cartapa qallariyninmanta

1Jesucristota serviq apóstol ñoqa Simón Pedrom, haykam ñoqayku hina kuyayllapaq iñiyta chaskiqkunaman kay cartata apachimuykiku. Diosninchikpas hinaspa salvaqninchik Jesucristopas allin kaqkuna ruwaqmi. 2Diospa kuyakuyninwan hawkayayninyá qamkunapi chaninninpi kachun, paytawan hinaspa Señorninchik Jesusta reqsisqaykichikrayku.

Iñiqkunaqa imaynam kananmanta

3Diosmi atiyninwan tukuy ima munasqanchikta kawsananchikpaq hinaspa servinanchikpaq qowarqanchik. Chaytaqa qowarqanchik hatun atiyninwan sumaq sonqo kayninwan pim qayawaqninchikta reqsichiwananchikpaqmi. 4Chaynintakamam ancha valorniyuq hatun promesankunata qowarqanchik, chaynapi Dioswan huklla kananchikpaq hinaspa kay pachapi mana allin ruway munasqanchikmanta ayqenanchikpaq. 5Chayraykuyá kallpanchakuychik iñiynikichikman allin kawsakuyta yapanaykichikpaq; allin kawsakuymanñataq, yachayta; 6yachaymanñataq, genio controlayta; genio controlaymanñataq, pacienciakuyta; pacienciakuymanñataq, Dios yupaychayta; 7Dios yupaychaymanñataq, wawqe-panintin kuyanakuyta; wawqe-panintin kuyanakuymanñataq, runamasin kuyayta.

8Sichum kaykuna qamkunapi kaptinqa, manam qellataqa nitaq yachaynikichikpi mana ruruqtaqa saqesunkichikchu, manataqmi yanqapaqchu Señorninchik Jesucristotapas reqsirqankichik. 9Pipas chaykunata mana ruwaspaqa ñawsa hina otaq mana ancha rikukuy atiq hinam kachkan, payqa ñawpaq huchankunamanta Jesucristopa mayllasqa kasqantapas qonqarunmi. 10Wawqe-panillaykuna, sichum Dios qayasurqankichik hinaspa akllasurqankichik, hinaptinqa qaqa hinayá sayaychik. Chaynata ruwaspaykichikqa manam haykapipas wichinkichikchu. 11Chaynapim Diosninchikqa hatun kuyakuywan chaskisunkichik Salvakuq Señorninchik Jesucristopa wiña-wiñaypaq munaychakuyninpi.

12Chayraykum kaykunamantaqa sapa kutilla yuyachisqaykichik, yachachkaptikichikñapas hinaspa cheqap kaqpi allinta sayachkaptikichikñapas. 13Kawsanaykamaqa deberniymi kaykunamanta qamkunata rimapayaspa qaqchanay. 14Señorninchik Jesucristoqa ñam chaylla wañukunaymanta niykuwanña. 15Kallpanchakuspaymi ruwasaq, wañukuptiypas kay rimarisqakunamanta mana qonqaspa yuyarinaykichikpaq.

Cristopa kanchariyninmanta

16Señorninchik Jesucristopa atiyninmantawan kutimunanmanta yachachisqaykuqa manam sakri cuentochu, aswanqa kikiykum ñawiykuwan Señorpa ancha atiyninta rikurqaniku. 17Dios Taytam payta hatunchaspan kancharichirqa, hinaptinmi atiywan hanaq pachamanta rimarimurqa: “Paymi kuyasqay Churiy, payraykum kusisqa kachkani”, nispa.

18-Ñoqaykupunim hanaq pachamanta chay rimariyta uyarirqaniku, chaytaqa uyarirqaniku Diospa akllasqan orqopi Señorwan kachkaspaykum.

19Kay uyarisqaykumantapas aswan hapipakunapaqqa profetakunapa qellqasqanmi kapuwachkanchik. Allintam ruwankichik chay qellqasqankuta tutayaypi ratachkaq mecherota hina sumaqta qawaspaykichikqa, chaynatam ruwankichik pacha achikyamunankama hinaspa achikyaq chaska lloqsimuspan sonqoykichikta kancharimunankama. 20Tukuymanta llalliqtaqa kaytayá yachaychik: Profetakunapa qellqasqanqa manam pipapas kikinpa munasqanman hina willakunanpaqchu. 21Manataqmi profetakunaqa qellqarqa runapa munasqanman hinallachu, aswanqa Chuya Espiritupa yuyay qosqanman hinam Diosmanta rimarqaku.