Search form

2 Tesalonicenses 1

Cartapa qallariyninmanta

1-Ñoqa Pablom Silvanowan hinaspa Timoteom Tesalónica llaqtapi lliw iñiqkunata rimaykamuykiku, qamkunaqa Dios Taytawan hinaspa Señor Jesucristowanmi huklla kachkankichik. 2Dios Taytatawan Señor Jesucristoyá kuyakuynintawan hawkayayninta qamkunaman chaqchurimuchun.

Jesucristo kutimuptin Diospa juzgananmanta

3Wawqe-panillaykuna, qamkunamantam Diosman tukuy tiempo graciasta qonayku, chayqa allinmi, chaynataqa ruwanayku qamkunapa iñiynikichik wiñasqanraykum chaynataq sapakamapa kuyanakuynikichik mirasqanraykum. 4Chaynallataqmi ñoqaykuqa Diospa iglesiankunapi qamkunamanta alabakuniku; sasachakuykunapi, ñakariykunapi pacienciawan iñiynikichikpi qaqa hina sayasqaykichikmanta. 5Kayqa qawachiwanchik Diospa juicionqa justo kasqantam, qamkunaqa Diospa munaychakusqanpaqñam kankichik, chayraykum ñakarichkankichikpas.

6Diosqa justom, haykam ñakarichisuqnikichiktaqa paymi ñakarichinqa, 7kunan ñakariqkunamanñataqmi samayta qosunkichik ñoqaykumanwan kuska, kaykunaqa pasakunqa Señor Jesucristo hanaq pachamanta atiy qosqan angelninkunawan rawrachkaq ninapi hina hamuptinmi. 8Hinaspam Dios mana reqsiqkunatawan Señorninchik Jesusmanta allin noticia mana kasukuqkunata vengakunqa. 9Paykunaqa wiñaypaq castigasqa kaspankum Señorpa qayllanmanta hinaspa suma-sumaq atiyninmanta qarqosqa kanqaku. 10Chay punchawmi Señor kutimunqa chuya llaqtanpa alabasqan chaynataq iñiqkunapa admirasqan kananpaq. Chaypim qamkunapas kankichik allin noticia willasqaykupi iñisqaykichikrayku.

11Chayraykum tukuy tiempo qamkunapaq Diosta mañapuykiku. Diosninchikyá allinpaq hapisuspaykichik qayasusqaykichikman hina, atiyninwan tukuy allin munasqaykichikta cumplichun, cumplichuntaqyá iñiynikichikwan llamkasqaykichikpipas. 12Chaynapim Señor Jesucristopa sutin hatunchasqa qamkunapi kanqa, paypitaqmi qamkunapas hatunchasqa kankichik, chaynaqa kanqa Dios Taytanchikpa chaynataq Señor Jesucristopa kuyakuyninraykum.